AMC નો માસ્ટર પ્લાન: અમદાવાદના 9 ફ્લાયઓવર અને અંડરબ્રિજ નીચે બનશે હાઇટેક સ્પોર્ટ્સ સેન્ટર્સ

Flyover Sports Centers: અમદાવાદ (Ahmedabad) માં રમતગમત સંસ્કૃતિને પ્રોત્સાહન આપવા માટે અમદાવાદ મ્યુનિસિપલ કોર્પોરેશન (Ahmedabad Municipal Corporation - AMC) દ્વારા એક અનોખો અને ભવ્ય પ્રોજેક્ટ હાથ ધરવામાં આવ્યો છે. આ સ્માર્ટ સિટી પ્રોજેક્ટ અંતર્ગત શહેરના 9 મોટા ફ્લાયઓવર અને અંડરબ્રિજ નીચેની ખાલી જગ્યાઓને હાઇટેક સ્પોર્ટ્સ સેન્ટર્સ (High-Tech Sports Centers) માં ફેરવવામાં આવશે. આ સમગ્ર પ્રોજેક્ટ પબ્લિક પ્રાઇવેટ પાર્ટનરશિપ એટલે કે પીપીપી (Public-Private Partnership - PPP) મોડલ હેઠળ ચલાવવામાં આવશે અને તેના માટેની ટેન્ડર પ્રક્રિયા પણ શરૂ કરી દેવામાં આવી છે.

આ પ્રોજેક્ટ પાછળનો મુખ્ય ઉદ્દેશ્ય વર્ષ 2030 ની કોમનવેલ્થ ગેમ્સ (Commonwealth Games) અને વર્ષ 2036 ની ઓલિમ્પિક્સ (Olympics) માટે સ્થાનિક સ્તરેથી જ રમતવીરોને તૈયાર કરવાનો અને યોગ્ય ઇન્ફ્રાસ્ટ્રક્ચર પૂરું પાડવાનો છે.

કયા બ્રિજ નીચે શું છે કામની સ્થિતિ?

અમદાવાદના જુદા જુદા વિસ્તારોમાં આવેલા બ્રિજનો આ પ્રોજેક્ટમાં સમાવેશ કરાયો છે, જેમાં કામ અલગ-અલગ તબક્કામાં ચાલી રહ્યું છે. સિમ્સ હોસ્પિટલ (CIMS Hospital) બ્રિજ અને રાણીપ (Ranip) અંડરબ્રિજ નીચે સ્પોર્ટ્સ સેન્ટરનું કામ લગભગ પૂરું થવા આવ્યું છે અને તે ટૂંક સમયમાં જાહેર જનતા માટે ખુલ્લું મુકાઈ શકે છે. તો બીજી તરફ અંજલી (Anjali) બ્રિજ, ઘોડાસર (Ghodasar) બ્રિજ અને લક્ષ્મણરાવ વકીલ (Lakshmanrao Vakil) બ્રિજ નીચે સ્પોર્ટ્સ ઝોન બનાવવાની કામગીરી પૂરજોશમાં શરૂ કરી દેવાઈ છે.

આ સિવાય ગુજરાત કોલેજ (Gujarat College) બ્રિજ, દિનેશ ચેમ્બર (Dinesh Chamber) બ્રિજ, ગુરુજી (Guruji) બ્રિજ અને રાજેન્દ્ર પાર્ક (Rajendra Park) બ્રિજ નીચે પણ ટૂંક સમયમાં અદ્યતન સ્પોર્ટ્સ ઝોન આકાર લેશે.

મલ્ટીપલ ગેમ્સ સાથે આધુનિક સુવિધાઓ

આ હાઇટેક સ્પોર્ટ્સ સેન્ટર્સમાં યુવાનો અને બાળકો માટે લોકપ્રિય રમતો જેવી કે ક્રિકેટ (Cricket), ફૂટબોલ (Football), બાસ્કેટબોલ (Basketball), સ્કેટિંગ (Skating) અને હાલમાં ખૂબ ટ્રેન્ડિંગ એવી પિકલબોલ (Pickleball) જેવી રમતો માટેના પ્રોફેશનલ કોર્ટ તૈયાર કરવામાં આવશે. બ્રિજ નીચે રમનારા ખેલાડીઓની સુરક્ષા માટે સમગ્ર વિસ્તારને સીસીટીવી (CCTV) કેમેરાથી સજ્જ કરાશે. આ ઉપરાંત, નોકરીયાત વર્ગ અને વિદ્યાર્થીઓ રાત્રિના સમયે પણ રમી શકે તે માટે હાઈ-બીમ એલઈડી (LED) લાઈટોની ખાસ વ્યવસ્થા કરવામાં આવશે.

આ પણ વાંચો: Mumbai-Ahmedabad બુલેટ ટ્રેન માટે તૈયાર થયો વિશાળ સ્ટીલનો બ્રિજ, જાણો તેની ખાસિયતો