Ahmedabad Flower Show: 'ભારત એક ગાથા' થીમ સાથે રચાયો નવો ઇતિહાસ, બે ગિનિસ વર્લ્ડ રેકોર્ડ નોંધાયા
- Ahmedabad: અમદાવાદ ફ્લાવર શોએ સતત ત્રીજા વર્ષે વર્લ્ડ રેકોર્ડ નોંધાવ્યો
- ભારત એક ગાથા" થીમ હેઠળ આયોજિત આ ભવ્ય ફ્લાવર શોનું આયોજન
- એક સાથે બે ગિનિસ બુક ઓફ રેકોર્ડ નોંધાવ્યા
Ahmedabad Flower Show 2026: સાબરમતી રિવરફ્રન્ટ પર આયોજિત વાર્ષિક ફ્લાવર શો ફરી એકવાર વૈશ્વિક ફલક પર ચમક્યો છે. સતત ત્રીજા વર્ષે અમદાવાદ ફ્લાવર શોએ પોતાની સફળતાનો સિલસિલો જાળવી રાખતા એકસાથે બે ગિનિસ બુક ઓફ વર્લ્ડ રેકોર્ડ પોતાના નામે કર્યા છે. મુખ્યમંત્રી ભૂપેન્દ્રભાઈ પટેલના હસ્તે ખુલ્લો મૂકાયેલો આ શો 'ભારત એક ગાથા' થીમ પર આધારિત છે, જે મુલાકાતીઓ માટે જ્ઞાન અને કુદરતી સૌંદર્યનો અનોખો સંગમ સાબિત થઈ રહ્યો છે.
વિશ્વનું સૌથી મોટું ફ્લાવર મંડલા
અમદાવાદ મ્યુનિસિપલ કોર્પોરેશન (AMC) દ્વારા નિર્મિત આ ફ્લાવર શોમાં પ્રથમ રેકોર્ડ 'વિશ્વના સૌથી મોટા ફ્લાવર મંડલા' તરીકે નોંધાયો છે. આ અદભૂત કલાકૃતિનું ચોક્કસ માપ લેવા માટે આધુનિક DGPS (Differential Global Positioning System) ટેક્નોલોજીનો ઉપયોગ કરવામાં આવ્યો હતો. ગિનિસ બુકની ટીમે માપણી કર્યા બાદ પુષ્ટિ કરી છે કે આ મંડલાનો વ્યાસ આશરે 33.6 મીટર છે અને તેનો કુલ વિસ્તાર 886.789 ચોરસ મીટર નોંધાયો છે. હજારો રંગબેરંગી ફૂલોની આ ગોળાકાર ગૂંથણી આકર્ષણનું મુખ્ય કેન્દ્ર બની છે.
સરદાર વલ્લભભાઈ પટેલનું ભવ્ય ફ્લાવર પોર્ટ્રેટ
બીજો ઐતિહાસિક રેકોર્ડ અખંડ ભારતના શિલ્પી સરદાર વલ્લભભાઈ પટેલના નામે નોંધાયો છે. રિવરફ્રન્ટ પર સરદાર પટેલનું વિશ્વનું સૌથી મોટું ફ્લાવર પોર્ટ્રેટ તૈયાર કરવામાં આવ્યું છે. સર્વે રિપોર્ટ અનુસાર, આ પોર્ટ્રેટની કુલ લંબાઈ 41.17 મીટર અને પહોળાઈ 8 મીટર છે, જે કુલ 329.360 ચોરસ મીટરના વિશાળ વિસ્તારમાં ફેલાયેલું છે. ફૂલો દ્વારા કંડારવામાં આવેલી સરદાર સાહેબની આ પ્રતિકૃતિ શ્રદ્ધાંજલિ અને કલાનો ઉત્કૃષ્ટ નમૂનો છે.
गुजरात की खुशबू, पूरी दुनिया में… 🌸
अहमदाबाद म्युनिसिपल कॉर्पोरेशन द्वारा आयोजित 14वें फ्लावर शो में इस वर्ष दो गिनीज़ बुक ऑफ वर्ल्ड रिकॉर्ड का सृजन होना हम सभी के लिए अत्यंत हर्ष और गर्व का विषय है।
विश्व का सबसे बड़ा फ्लावर मंडला और सरदार वल्लभभाई पटेल जी का विश्व का सबसे… pic.twitter.com/daY4PEWYYn
— Bhupendra Patel (@Bhupendrapbjp) January 1, 2026
ભવ્ય ઉદ્ઘાટન અને મહાનુભાવોની ઉપસ્થિતિ
મુખ્યમંત્રી ભૂપેન્દ્રભાઈ પટેલે ફ્લાવર શો 2026નું ઉદ્ઘાટન કર્યું હતું. આ પ્રસંગે અમદાવાદના મેયર, ડેપ્યુટી મેયર, મ્યુનિસિપલ કમિશનર અને અન્ય ઉચ્ચ અધિકારીઓ ઉપસ્થિત રહ્યા હતા. મુખ્યમંત્રીએ મ્યુનિસિપલ કોર્પોરેશનની આ સિદ્ધિને બિરદાવતા જણાવ્યું હતું કે, આ આયોજન અમદાવાદની ગરિમામાં વધારો કરે છે.
પ્રદર્શનના મુખ્ય આકર્ષણો
આ વર્ષે 'ભારત એક ગાથા' થીમ હેઠળ દેશના ગૌરવશાળી ઇતિહાસને ફૂલોના માધ્યમથી રજૂ કરવામાં આવ્યો છે. વિવિધ આકર્ષક સ્કલ્પ્ચર્સ, દુર્લભ ફૂલોની પ્રજાતિઓ અને સેલ્ફી પોઈન્ટ્સ મુલાકાતીઓને મંત્રમુગ્ધ કરી રહ્યા છે. ખાસ કરીને સરદાર પટેલની વિશાળ પ્રતિમા અને ઐતિહાસિક સ્થાપત્યોની પ્રતિકૃતિઓ લોકોમાં ભારે આકર્ષણ જમાવી રહી છે. અમદાવાદીઓ અને પ્રવાસીઓ માટે આ ફ્લાવર શો 25 જાન્યુઆરી સુધી ખુલ્લો રહેશે. દર વર્ષની જેમ આ વર્ષે પણ રેકોર્ડબ્રેક સંખ્યામાં લોકો ઉમટી પડે તેવી શક્યતા છે. વિશ્વ રેકોર્ડના સર્જન સાથે અમદાવાદ ફ્લાવર શોએ માત્ર ગુજરાત જ નહીં પરંતુ સમગ્ર ભારતનું નામ વિશ્વ સ્તરે રોશન કર્યું છે.
આ પણ વાંચોઃ Ahmedabad: સાણંદના કલાણામાં થયેલી જૂથ અથડામણમાં 3 મહિલા સહિત 25ની ધરપકડ