અમદાવાદના ફૂટપાથ દબાણો સામે હાઈકોર્ટમાં PIL: 'રાઈટ ટુ વોક' નાગરિકોનો અધિકાર

દબાણોના કારણે રાહદારીઓ જોખમી રીતે રસ્તા પર ચાલવા મજબૂર

અરજીમાં રજૂઆત કરવામાં આવી છે કે શહેરના મોટાભાગના વિસ્તારોમાં ફૂટપાથો ગેરકાયદે વાહન પાર્કિંગ (Illegal Vehicle Parking), લારી-ગલ્લાં અને વ્યાવસાયિક પ્રવૃત્તિઓ (Commercial Encroachments)નો અડ્ડો બની ગયા છે. આ અડચણોને કારણે રાહદારીઓ, વૃદ્ધો, મહિલાઓ અને બાળકોને ફૂટપાથ છોડીને ભારે ટ્રાફિક વચ્ચે જીવના જોખમે મુખ્ય માર્ગો પર ચાલવાની ફરજ પડી રહી છે, જેના કારણે અવારનવાર જીવલેણ અકસ્માતો સર્જાય છે.

‘રાઈટ ટુ વોક’ બંધારણીય અધિકાર: સુપ્રીમ કોર્ટના ચુકાદાનો સંદર્ભ

PIL માં સુપ્રીમ કોર્ટ (Supreme Court of India)ના ઐતિહાસિક ચુકાદાઓનો આધાર ટાંકીને સ્પષ્ટ દલીલ કરવામાં આવી છે કે નાગરિકો માટે સુરક્ષિત ફૂટપાથ ઉપલબ્ધ કરાવવો એ બંધારણની કલમ 21 હેઠળ જીવવાના અધિકાર સાથે જોડાયેલો ‘રાઈટ ટુ વોક’ (Right to Walk) નો મૂળભૂત હિસ્સો છે. આ ઉપરાંત ખાસ કરીને દિવ્યાંગ નાગરિકો સરળતાથી ચાલી શકે તેવા અવરોધમુક્ત અને સુલભ ફૂટપાથનું નિર્માણ કરવાની માંગ પણ ઉઠાવવામાં આવી છે.

વોર્ડવાઈઝ સર્વે અને કમ્પ્લાયન્સ રિપોર્ટની માંગ

અરજદારે હાઈકોર્ટ સમક્ષ મહત્વપૂર્ણ નિર્દેશો આપવાની વિનંતી કરી છે, જેમાં અમદાવાદના તમામ ફૂટપાથોનું યોગ્ય ડિમાર્કેશન (Demarcation of Footpaths) અને તાત્કાલિક સર્વે કરાવવો. ગેરકાયદે દબાણો અને વ્યવસાયિક ગતિવિધિઓ હટાવવા માટે અમદાવાદ મહાનગરપાલિકા (AMC) તેમજ ટ્રાફિક પોલીસ પાસેથી વોર્ડવાઈઝ એક્શન રિપોર્ટ (Ward-wise Action Report) મંગાવવો.

ફૂટપાથ પર થતા ગેરકાયદે પાર્કિંગ વિરુદ્ધ કડક દંડાત્મક કાર્યવાહી હાથ ધરવી. દબાણમુક્ત બનાવ્યા બાદ કોર્ટ સમક્ષ નિયમિત કમ્પ્લાયન્સ રિપોર્ટ (Compliance Report) રજૂ કરવો. આ જાહેર હિતની અરજી દાખલ થતાં જ મ્યુનિસિપલ કોર્પોરેશન અને ટ્રાફિક તંત્રમાં દોડધામ મચી જવા પામી છે.

આ પણ વાંચો: ભુજ કોર્ટમાં પોલીસની નજર સામે જ યુવકને છરી ઝીંકી: કાયદાના ઉડ્યા ધજાગરા!