Ahmedabad: શિક્ષકોનો શિક્ષણ વિભાગ સામે વિરોધ, ખાલી જગ્યાઓ કરતાં અનેકગણા ઉમેદવારોને બોલાવાતા ભારે વિવાદ

ખાલી જગ્યાઓ સામે વધુ ઉમેદવારો બોલાવ્યાનો આક્ષેપ

વિરોધ કરી રહેલા ઉમેદવારોના જણાવ્યા અનુસાર, સામાજિક વિજ્ઞાન વિષયમાં માત્ર 36 જગ્યાઓ હોવા છતાં આશરે 350 ઉમેદવારોને કાઉન્સેલિંગ માટે બોલાવવામાં આવ્યા હતા. આ જ રીતે ગુજરાતી વિષયમાં માત્ર 3 જગ્યાઓ સામે લગભગ 80 ઉમેદવારોને હાજર રહેવા સૂચના આપવામાં આવી હતી. ઉમેદવારોએ આ પ્રક્રિયાને ગેરવ્યવસ્થિત ગણાવી પ્રશ્નો ઉઠાવ્યા છે.

ઈતિહાસ વિષયમાં જગ્યા નહીં છતાં કાઉન્સેલિંગ?

ઉમેદવારોએ વધુમાં આક્ષેપ કર્યો છે કે ઇતિહાસ વિષયમાં કોઈ ખાલી જગ્યા ઉપલબ્ધ ન હોવા છતાં 26 ઉમેદવારોને કાઉન્સેલિંગ માટે બોલાવવામાં આવ્યા હતા. જેના કારણે ઉમેદવારોમાં ભારે ગૂંચવણ સર્જાઈ હતી. ઘણા ઉમેદવારોએ દૂરદૂરથી અમદાવાદ આવી સમય અને ખર્ચ બગાડવાનો વારો આવ્યો હોવાની ફરિયાદ કરી હતી.

ભરતી પ્રક્રિયામાં પારદર્શકતાની માગ

ઉમેદવાર શિક્ષકોનું કહેવું હતું કે ભરતી પહેલાં વિષયવાર ખાલી જગ્યાઓ, મેરિટ ક્રમ અને કાઉન્સેલિંગ માટે બોલાવવામાં આવેલા ઉમેદવારોની ચોક્કસ માહિતી જાહેર થવી જોઈએ. પારદર્શક માહિતીના અભાવે ઉમેદવારોમાં અસંતોષ અને અવિશ્વાસ વધી રહ્યો હોવાનું તેઓએ જણાવ્યું હતું.

કાયમી ભરતી કરવાની ઉઠી માગ

વિરોધ દરમિયાન ઉમેદવારોએ જ્ઞાન સહાયકોની તાત્કાલિક નહીં પરંતુ કાયમી ભરતી કરવાની માગ પણ ઉઠાવી છે. શિક્ષણ ક્ષેત્રમાં લાંબા સમયથી કાયમી ભરતી ન થતા હજારો શિક્ષિત યુવાનો અનિશ્ચિતતાનો સામનો કરી રહ્યા હોવાનો મુદ્દો પણ રજૂ કરવામાં આવ્યો છે.

શિક્ષણ વિભાગ સામે સૂત્રોચ્ચાર

જિલ્લા તાલીમ ભવન ખાતે એકત્રિત થયેલા ઉમેદવારોએ શિક્ષણ વિભાગ સામે સૂત્રોચ્ચાર કરી યોગ્ય અને ન્યાયસંગત ભરતી પ્રક્રિયા અમલમાં મૂકવાની માગ કરી છે. પરિસ્થિતિને ધ્યાનમાં રાખીને તંત્ર દ્વારા ઉમેદવારોને સમજાવવાનો પ્રયાસ કરવામાં આવ્યો છે.

આ પણ વાંચોઃ Ahmedabad: CNG ભાવ વધારા સામે રિક્ષા ચાલકોનો વિરોધ, હડતાળને મળ્યો મિશ્ર પ્રતિસાદ, અમુક વિસ્તરોમાં જ અસર

આ પણ વાંચોઃ Aravalli Land Dispute: મેઘરજમાં જમીન વિવાદમાં મારામારી, 4 વ્યક્તિ સામે હત્યાના પ્રયાસનો ગુનો દાખલ