Ahmedabad Rain : મેઘરાજાની ધમાકેદાર એન્ટ્રી ! શાહીબાગ અંડરબ્રિજ અને એરપોર્ટ રોડ પર વરસાદી પાણી ભરાતા હાલાકી

વહેલી સવારથી શરૂ થયેલા ધોધમાર વરસાદને પગલે શહેરના અનેક નીચાણવાળા વિસ્તારોમાં પાણી ભરાવાના દ્રશ્યો જોવા મળ્યા છે. રસ્તાઓ પર પાણી ભરાઈ જવાથી નોકરી-ધંધા અને શાળા-કોલેજે જતા વાહનચાલકો તથા સામાન્ય જનતાને ભારે હાલાકીનો સામનો કરવો પડી રહ્યો છે.

Ahmedabad Rain : શાહીબાગ અંડરબ્રિજમાં પાણી ભરાતા હાલાકી

ઉલ્લેખનીય છે કે અમદાવાદના શાહીબાગ અંડરબ્રિજમાં પણ અતિશય પાણી ભરાઈ જવાના કારણે સુરક્ષાના ભાગરુપે તંત્ર દ્વારા તેને વાહનવ્યવહાર માટે સંપૂર્ણપણે બંધ કરી દેવામાં આવ્યો છે. મ્યુનિસિપલ કોર્પોરેશન દ્વારા પાણી નિકાલની કામગીરી હાથ ધરવામાં આવી છે, પરંતુ સતત વરસી રહેલા વરસાદને કારણે રાહત કામગીરીમાં થોડી મુશ્કેલીઓ પડી રહી છે. હવામાન વિભાગ દ્વારા આગામી દિવસોમાં પણ ભારે વરસાદની આગાહી કરવામાં આવી હોવાથી તંત્ર દ્વારા નાગરિકોને બિનજરૂરી ઘરની બહાર ન નીકળવાની અપીલ કરવામાં આવી છે.

અમદાવાદના એરપોર્ટ રોડ પર વરસાદી પાણી ભરાયા

મહત્વનું છે કે પૂર્વ વિસ્તારના મુખ્ય માર્ગો પર જળબંબાકાર જેવી સ્થિતિ સર્જાઈ છે. ખાસ કરીને એરપોર્ટ રોડ પર ભારે વરસાદી પાણી ભરાઈ જવાના કારણે મોટો ટ્રાફિક જામ જોવા મળ્યો છે. રસ્તાઓ પર પાણી ભરાઈ જવાથી કામ અર્થે બહાર નીકળેલા વાહનચાલકો અને નોકરીયાત વર્ગ મુશ્કેલીમાં મૂકાયા છે. પાણીમાં વાહનો બંધ પડી જવાની ઘટનાઓને કારણે લોકોને ભારે હાલાકીનો સામનો કરવો પડી રહ્યો છે. મ્યુનિસિપલ તંત્ર દ્વારા પાણીના નિકાલ માટેની કામગીરી હાથ ધરવામાં આવી છે, પરંતુ સતત વરસી રહેલા વરસાદને કારણે વાહનચાલકોને અવરજવરમાં ભારે મુશ્કેલીઓનો સામનો કરવો પડી રહ્યો છે.

આ પણ વાંચો : GPSC Exam Postponed: 1 ઓગસ્ટની પરીક્ષા મોકૂફ: નવી તારીખ જાહેર, 9 ઓગસ્ટે લેવાશે પરીક્ષા