Ahmedabad krishnanagar robbery case: અમદાવાદના કૃષ્ણનગર વિસ્તારમાં ધોળા દિવસે કારનો કાચ તોડીને કરવામાં આવેલી 50 લાખની લૂંટની સનસનીખેજ ઘટનાનો પોલીસે સફળતાપૂર્વક ભેદ ઉકેલી નાખ્યો છે. ઝોન-5 LCB અને કૃષ્ણનગર પોલીસની સંયુક્ત ટીમે આ ગુનાના મુખ્ય સૂત્રધાર એવી એક મહિલા આરોપીને દબોચી લીધી છે. પોલીસની તપાસમાં લૂંટના આયોજન પાછળ મહિલાનો જ હાથ હોવાનું સામે આવતા પોલીસ પણ ચોંકી ઉઠી છે.
શું હતી સમગ્ર ઘટના?
ઘટનાની વિગતો મુજબ, કૃષ્ણનગર ખાતે મારુતિ પ્લાઝામાં આવેલી ADC બેંકની સામે ફરિયાદી પોતાની ક્રિયાશીલ કારમાં હતા, ત્યારે લૂંટારુઓએ ફિલ્મી ઢબે લૂંટને અંજામ આપ્યો હતો. પૂર્વ આયોજિત કાવતરાના ભાગરૂપે એક બાઈક ચાલકે ફરિયાદીની કારને પાછળથી ટક્કર મારી હતી. ફરિયાદી જેવી કારમાંથી નીચે ઉતરીને તપાસ કરવા ગયા કે તરત જ આરોપીઓએ બોલાચાલી કરીને તેમનું ધ્યાન ભટકાવ્યું હતું. આ તકનો લાભ લઈને અન્ય બે હેલ્મેટધારી શખ્સોએ કારનો કાચ તોડીને અંદર પડેલી 50 લાખની રોકડ રકમની બેગ ઉઠાવીને ફરાર થઈ ગયા હતા.
પોલીસ તપાસ
ઘટનાની ગંભીરતાને ધ્યાને લઈ ક્રાઈમ બ્રાન્ચ, LCB અને સ્થાનિક પોલીસની ટીમોએ સીસીટીવી ફૂટેજ અને ટેકનિકલ સર્વેલન્સના આધારે તપાસ હાથ ધરી હતી. તપાસ દરમિયાન પોલીસને મોટી સફળતા મળી છે અને મુખ્ય સૂત્રધાર મહિલાની ધરપકડ કરવામાં આવી છે. મહિલા આરોપી પાસેથી લૂંટાયેલી રકમમાંથી 25 લાખનો મુદ્દામાલ રિકવર કરવામાં પોલીસને સફળતા મળી છે. હાલ પોલીસ અન્ય બે ફરાર આરોપીઓને ઝડપી પાડવા માટે સઘન તપાસ કરી રહી છે. પોલીસના જણાવ્યા અનુસાર, ટૂંક સમયમાં બાકીના આરોપીઓ પણ પોલીસની ગિરફતમાં હશે.
આ પણ વાંચો: Vadodara News: 16 વર્ષની વિદ્યાર્થીનીની જાતીય સતામણી કરનાર નરાધમ શિક્ષકને 5 વર્ષની સખત કેદની સજા
