Ahmedabad: પાલડીની જાણીતી શારદા મંદિર સ્કૂલમાં બબાલ: ધોરણ 11-12ના વિદ્યાર્થીઓ બાખડ્યા, મામલો પોલીસ ચોકીએ પહોંચ્યો!

Ahmedabad: અમદાવાદ શહેરના પોશ ગણાતા પાલડી (Paldi) વિસ્તારમાં આવેલી પ્રતિષ્ઠિત શારદા મંદિર સ્કૂલ (Sharda Mandir School) માં વિદ્યાર્થીઓ વચ્ચેની સામાન્ય તકરારે ઉગ્ર સ્વરૂપ ધારણ કર્યું છે. શાળા કેમ્પસમાં ધોરણ 11 અને ધોરણ 12 ના વિદ્યાર્થીઓ વચ્ચે થયેલી ઉગ્ર બોલાચાલી અને ઝઘડા બાદ મામલો હવે પોલીસ મથકે પહોંચતાં શિક્ષણ જગતમાં ચકચાર મચી ગઈ છે.

પ્રાપ્ત પ્રાથમિક વિગતો અનુસાર, શાળામાં અભ્યાસ કરતી એક વિદ્યાર્થિની સાથે વાતચીત કરવા બાબતે ધોરણ 11 અને ધોરણ 12 ના વિદ્યાર્થીઓ આમને-સામને આવી ગયા હતા. શરૂઆતમાં બંને પક્ષો વચ્ચે સામાન્ય શાબ્દિક બોલાચાલી થઈ હતી, પરંતુ જોતજોતામાં મામલો બિચક્યો હતો અને વિદ્યાર્થીઓના બંને જૂથો વચ્ચે ઉગ્ર ઘર્ષણ તેમજ ધક્કામુક્કી જેવી પરિસ્થિતિ સર્જાઈ હતી. શાળા કેમ્પસમાં થયેલા આ હોબાળાથી અન્ય વિદ્યાર્થીઓ અને સ્ટાફમાં પણ દોડધામ મચી ગઈ હતી.

વિદ્યાર્થીઓ વચ્ચે તકરાર વધી જતાં શાળા સત્તાધીશો તાત્કાલિક હરકતમાં આવ્યા હતા. શાળા પ્રશાસન દ્વારા ઝઘડામાં સંડોવાયેલા બંને જૂથના વિદ્યાર્થીઓને ઓફિસમાં બોલાવીને સમગ્ર મામલો થાળે પાડવાનો પ્રયાસ કરવામાં આવ્યો હતો. શાળા દ્વારા બંને પક્ષના વિદ્યાર્થીઓ પાસેથી લેખિતમાં માફીનામું (Apology Letter) પણ લખાવી લેવામાં આવ્યું હતું, જેથી મામલો કેમ્પસ પૂરતો જ સીમિત રહે. જોકે, માફીનામું લખાવ્યા બાદ પણ વિદ્યાર્થીઓ વચ્ચેનો તણાવ શમ્યો નહોતો અને આખરે સમગ્ર વિવાદ સ્થાનિક પોલીસ સ્ટેશનના ઉંબરે પહોંચ્યો હતો.

ઘટના અંગે મીડિયા દ્વારા જ્યારે શારદા મંદિર સ્કૂલના સંચાલકો અને પ્રિન્સિપાલનો સંપર્ક કરવામાં આવ્યો ત્યારે શાળા પ્રશાસને સમગ્ર મામલે મૌન સેવી લીધું હતું. શાળાના અધિકારીઓએ કેમેરા સમક્ષ કંઈપણ બોલવાનો સ્પષ્ટ ઇનકાર કરી દીધો હતો અને આંતરિક બાબત ગણાવીને પલ્લું ઝાડી લીધું હતું.

આ મામલે બંને પક્ષના વાલીઓ પણ સક્રિય થયા છે. વિદ્યાર્થીઓ વચ્ચે વધુ કોઈ અનિચ્છનીય ઘટના ન બને તે માટે સ્થાનિક પોલીસે સમગ્ર વિવાદની કડીઓ મેળવીને તપાસ શરૂ કરી છે. શાળામાં સીસીટીવી (CCTV) ફૂટેજ અને પ્રત્યક્ષદર્શી વિદ્યાર્થીઓના આધારે હકીકત શું હતી તે દિશામાં પોલીસ દ્વારા પ્રાથમિક પૂછપરછ હાથ ધરવામાં આવી છે.