Ahmedabad Fake Plasma Scam : અમદાવાદ ગ્રામ્ય પોલીસે પ્લાઝમા ચોરીના હાઈપ્રોફાઈલ રેકેટનો પર્દાફાશ કરીને તપાસનો વ્યાપ વધાર્યો છે. અત્યાર સુધીમાં કુલ 7 આરોપીઓની ધરપકડ કરવામાં આવી છે, જેણે મેડિકલ ક્ષેત્રે ખળભળાટ મચાવી દીધો છે.
Ahmedabad માં પ્લાઝમા ચોરીના કેસમાં મોટો ખુલાસો
તપાસ દરમિયાન સામે આવ્યું છે કે, ચોરી થયેલું પ્લાઝમા માત્ર ગુજરાત પૂરતું સીમિત ન રહેતા મહારાષ્ટ્ર અને બેંગલુરુ સુધી પહોંચતું હતું. આરોપીઓ આ પ્લાઝમાને ત્યાંની બ્લડ બેંકો અને ફાર્મા કંપનીઓમાં ગેરકાયદે રીતે ઊંચા ભાવે વેચતા હતા.
કુલ 7 લોકોની ધરપકડ
આ કેસમાં અત્યાર સુધીમાં કુલ 7 લોકોની ધરપકડ થઈ ચૂકી છે. જેમાં મુખ્ય સૂત્રધાર દિનેશ ચૌધરી, મોહન ગાયકવાડ, અને વિવિધ ડ્રાઈવરોનો સમાવેશ થાય છે. તાજેતરની તપાસમાં મહારાષ્ટ્રની બ્લડ બેંક સાથે સંકળાયેલા પ્રકાશ સાંગલે અને અશોક સાંગલેની ધરપકડ કરવામાં આવી છે.
ડ્રાઈવર અજીત સોલંકીની ભૂમિકા
જીતેન્દ્ર જૈનની પૂછપરછ બાદ ગુજરાતના રહેવાસી ડ્રાઈવર અજીત સોલંકીનું નામ સામે આવ્યું હતું. અજીત રાજસ્થાન, મધ્યપ્રદેશ અને છત્તીસગઢથી પ્લાઝમાના જથ્થાનું પરિવહન કરતો હતો.તપાસમાં ચોંકાવનારો ખુલાસો થયો છે કે અજીત સોલંકી દ્વારા લાવવામાં આવેલા પ્લાઝમાના જથ્થામાંથી કુલ 275 પ્લાઝમા બેગની ચોરી કરવામાં આવી હતી.
વધુ તપાસ તેજ
અમદાવાદ ગ્રામ્ય એસ.પી. ઓમ પ્રકાશ જાટના માર્ગદર્શન હેઠળ પોલીસ હાલ આ આંતરરાજ્ય રેકેટની તમામ કડીઓ જોડવા માટે વધુ ઊંડાણપૂર્વકની તપાસ કરી રહી છે. આ ચોરી પાછળ હજુ અન્ય કોઈ મોટા માથાઓ કે ફાર્મા કંપનીઓનો હાથ છે કે કેમ, તે દિશામાં પણ તપાસ તેજ કરવામાં આવી છે.
આ પણ વાંચો: Ahmedabad Rath Yatra Security: અમદાવાદમાં રથયાત્રાની સુરક્ષા માટેની મોકડ્રીલ યોજાઈ, ટીયર ગેસની અસરથી નાગરિકોને હાલાકી
