Ahmedabad Rain: અમદાવાદ (Ahmedabad) શહેરમાં બપોર બાદ મેઘરાજાએ પુનઃ ધમાકેદાર બેટિંગ શરૂ કરી છે. સાંજ સુધીમાં શહેરમાં સરેરાશ 24.24 મિલીમીટર વરસાદ નોંધાયો છે, જેમાં પશ્ચિમ ઝોનના થલતેજ (Thaltej) માં સૌથી વધુ 58 મિલીમીટર વરસાદ પડ્યો છે. સામાન્ય વરસાદમાં જ બોપલ (Bopal) અને સરસપુર (Saraspur) ના રસ્તાઓ પર પાણી ભરાઈ જતાં વાહનચાલકો ભારે હાલાકી ભોગવી રહ્યા છે.
Ahmedabad Rain: અમદાવાદ શહેરના પશ્ચિમ ઝોનમાં વરસાદનું જોર સૌથી વધુ જોવા મળ્યું હતું. વરસાદના સત્તાવાર આંકડા મુજબ થલતેજ (Thaltej) માં સૌથી વધુ 58 મિલીમીટર, સાયન્સ સિટી (Science City) માં 51.5 મિલીમીટર, બોડકદેવ (Bodakdev) માં 49 મિલીમીટર, બોપલ (Bopal) માં 48.5 મિલીમીટર, ચાંદલોડિયા (Chandlodiya) માં 42 મિલીમીટર, મોટેરા (Motera) માં 37 મિલીમીટર અને રાણીપ (Ranip) માં 35.5 મિલીમીટર વરસાદ નોંધાયો છે.
બોપલ વકીલ સાહેબ બ્રિજ પાસે પાણી ભરાતાં વાહનચાલકો બેહાલ
બપોર પછી શરૂ થયેલા વરસાદના કારણે બોપલ (Bopal) વિસ્તારમાં સામાન્ય વરસાદમાં જ જળબંબાકારની પરિસ્થિતિ સર્જાઈ હતી. બોપલ વકીલ સાહેબ બ્રિજથી આંબલી (Ambli) ગામ તરફ જતો મુખ્ય માર્ગ પાણીમાં ગરકાવ થઈ ગયો હતો. રસ્તા પર પુષ્કળ પ્રમાણમાં વરસાદી પાણી ભરાઈ જવાથી વાહનચાલકોની મુશ્કેલીઓમાં ભારે વધારો થયો છે. રેડ એલર્ટ વચ્ચે તંત્રની તૈયારીઓની પોલ ખુલતાં વાહનચાલકો અને સ્થાનિકોમાં ભારે રોષ જોવા મળી રહ્યો છે.
સરસપુર વોરાના રોજા વિસ્તારમાં ડ્રેનેજ સિસ્ટમ ફેલ: કાયમી ઉકેલની માંગ
બીજી તરફ પૂર્વ અમદાવાદના સરસપુર (Saraspur) ના વોરાના રોજા વિસ્તારમાં પણ સામાન્ય વરસાદી ઝાપટાંમાં રસ્તાઓ તળાવમાં ફેરવાઈ ગયા હતા. દર વર્ષે આ ચોક્કસ વિસ્તારમાં પાણી ભરાવાની ગંભીર સમસ્યા યથાવત રહેતાં સ્થાનિકોએ અમદાવાદ મ્યુનિસિપલ કોર્પોરેશન (Ahmedabad Municipal Corporation - AMC) ની ડ્રેનેજ વ્યવસ્થા સામે ગંભીર સવાલો ઉઠાવ્યા છે.
રસ્તાઓ પર ગુડણસમા પાણી ભરાતાં અનેક વાહનો બંધ પડી ગયા હતા અને વાહનચાલકો તથા રાહદારીઓને કલાકો સુધી હાલાકી ભોગવવી પડી હતી. વરસાદી પાણીના નિકાલના પોકળ દાવાઓ સામે આક્રોશ વ્યક્ત કરીને સ્થાનિકોએ આ સમસ્યાના કાયમી ઉકેલની ઉગ્ર માંગ કરી છે.
આ પણ વાંચો: AMC નો મોટો નિર્ણય: કાંકરિયા અને રિવરફ્રન્ટ પર જયા-પાર્વતી વ્રતનું વિશેષ આયોજન મોકૂફ
