Ahmedabad: CNG ભાવ વધારા સામે રિક્ષા ચાલકોનો વિરોધ, હડતાળને મળ્યો મિશ્ર પ્રતિસાદ

અમુક વિસ્તારોમાં જ અસર દેખાઈ

શહેરના વેજલપુર સહિતના અમુક વિસ્તારોમાં રિક્ષા ચાલકોના એક જૂથે અન્ય રિક્ષાઓ બંધ કરાવવાનો પ્રયાસ કર્યો હતો. કેટલાક સ્થળોએ રસ્તા પર ઊભા રહીને ચાલતી રિક્ષાઓને અટકાવવામાં આવી હતી અને મુસાફરોને રિક્ષામાંથી નીચે ઉતરવાની ફરજ પડી હતી. જેના કારણે મુસાફરોને મુશ્કેલીનો સામનો કરવો પડ્યો હતો. વેજલપુર વિસ્તારમાં સવારે કેટલાક કલાકો સુધી રિક્ષાઓની અવરજવર ઘટી હતી, પરંતુ ત્યારબાદ ઘણી રિક્ષાઓ ફરીથી સેવા આપતી જોવા મળી હતી.

એક લાખ રિક્ષા ચાલકો જોડાવાનો દાવો પોકળ

પ્રગતિ રિક્ષા એસોસિએશન દ્વારા કરવામાં આવેલો એક લાખ રિક્ષા ચાલકો હડતાળમાં જોડાશે એવો દાવો શહેરની સ્થિતિને જોતા પોકળ સાબિત થયો છે. અનેક રિક્ષા ચાલકોએ જણાવ્યું હતું કે CNG ના ભાવવધારાથી તેમની આવક પર અસર થઈ રહી છે, છતાં રોજિંદી કમાણી બંધ રાખવી શક્ય નથી.

મુસાફરોને હાલાકીનો સામનો

જે વિસ્તારોમાં હડતાળનો આંશિક પ્રભાવ જોવા મળ્યો ત્યાં ઓફિસ જતાં કર્મચારીઓ, વિદ્યાર્થીઓ અને અન્ય મુસાફરોને મુશ્કેલી પડી હતી. કેટલીક જગ્યાએ રિક્ષા વચ્ચે જ બંધ કરાવવામાં આવતા મુસાફરોને અન્ય વાહનની વ્યવસ્થા શોધવી પડી હતી.

CNG ભાવવધારો મુદ્દે સરકાર પાસે માંગ

રિક્ષા ચાલકોની મુખ્ય માગ CNG ના ભાવમાં થયેલા વધારાને પાછો ખેંચવાની અથવા રિક્ષા ચાલકોને રાહત આપવાની છે. એસોસિએશનનું કહેવું છે કે સતત વધતા ઈંધણ ખર્ચને કારણે દૈનિક કમાણીમાં ઘટાડો થઈ રહ્યો છે અને ભાડામાં વધારો કર્યા વિના વ્યવસાય ચલાવવો મુશ્કેલ બન્યો છે. બાળકોનું શિક્ષણ અને ઘર ચલાવવું પણ મુશ્કેલીભર્યું થઈ રહ્યું છે.

આ પણ વાંચોઃ Panchmahal: ગોધરાના ઇસરોડિયા ગામે પાણી અને ગટરની વિકરાળ સમસ્યા, કલેક્ટર, ડીડીઓ સુધી રજૂઆત