અમદાવાદમાં અસામાજિક તત્વોનો આતંક: સોસાયટીમાં ઘૂસી વાહનો તોડ્યા, સીન સપાટા ભારે પડ્યા!

Girivrund Society Attack: અમદાવાદ (Ahmedabad) શહેરના સૈજપુર (Saijpur) વિસ્તારમાં મોડી રાત્રે અસામાજિક તત્વોએ આતંક મચાવ્યો હોવાની ગંભીર ઘટના સામે આવી છે. સૈજપુરની ગિરિવૃંદ સોસાયટી (Girivrund Society) માં અચાનક ધસી આવેલા શખ્સોએ હથિયારો સાથે તોડફોડ શરૂ કરી હતી. રાત્રિના સમયે જ્યારે સોસાયટીના રહીશો સૂતા હતા, ત્યારે આ અસામાજિક તત્વોએ સોસાયટીના કમ્પાઉન્ડમાં અને ઘર બહાર પાર્ક કરેલા વાહનોને નિશાન બનાવ્યા હતા. આ ઘટનાને પગલે સમગ્ર વિસ્તારમાં ભય અને ફફડાટનો માહોલ વ્યાપી ગયો છે.

બેઝબોલના ડંડા વડે વાહનોના કાચ ફોડ્યા

પ્રત્યક્ષદર્શીઓ અને સૂત્રોના જણાવ્યા અનુસાર, હુમલાખોરો પોતાના હાથમાં બેઝબોલના ડંડા (Baseball bats) જેવા જીવલેણ હથિયારો લઈને આવ્યા હતા. તેઓએ સોસાયટીમાં પાર્ક કરેલી કાર અને ટુ-વ્હીલર્સ પર બેઝબોલના ડંડા વડે ઉપરાછાપરી ઘા ઝીંક્યા હતા અને વાહનોના કાચ તોડી નાખ્યા હતા. રાત્રિના સમયે અચાનક થયેલા આ હુમલા અને કાચ તૂટવાના અવાજથી સોસાયટીના રહીશો જાગી ગયા હતા. જોકે, સ્થાનિક લોકો એકઠા થાય તે પહેલાં જ આ તમામ અસામાજિક તત્વો ઘટનાસ્થળેથી નાસી જવામાં સફળ રહ્યા હતા. તોડફોડના કારણે વાહન માલિકોને મોટું આર્થિક નુકસાન વેઠવાનો વારો આવ્યો છે.

રાયોટિંગનો ગુનો નોંધી 6 આરોપીઓની ધરપકડ

આ હિંસક ઘટના અંગે ગિરિવૃંદ સોસાયટીના રહીશો દ્વારા તાત્કાલિક પોલીસને જાણ કરવામાં આવી હતી. આ મામલે શહેર કોટડા પોલીસ સ્ટેશન (Shaher Kotda Police Station) માં વિધિવત ફરિયાદ નોંધાવવામાં આવી છે. પોલીસે પરિસ્થિતિની ગંભીરતાને ધ્યાનમાં લઈને અસામાજિક તત્વો સામે કાયદેસરનો ગુનો દાખલ કર્યો છે અને તપાસમાં રાયોટિંગ (Rioting) એટલે કે રમખાણની કલમોનો ઉમેરો કર્યો છે. ઘટનાના સીસીટીવી ફૂટેજ અને સ્થાનિક બાતમીદારોની મદદથી શહેર કોટડા પોલીસે ગણતરીના કલાકોમાં જ આતંક મચાવનારા 6 આરોપીઓની ધરપકડ કરી લીધી છે. પોલીસે આ તમામ શખ્સોની કડક પૂછપરછ હાથ ધરી છે કે આ તોડફોડ પાછળનો મુખ્ય હેતુ કે કોઈ જૂની અદાવત હતી કે કેમ.

આ પણ વાંચો: ગાંધીનગરમાં કાળજું કંપાવતો આપઘાત: 'દીકરી અંદર ના આવતી...' દરવાજે ચિઠ્ઠી લખી પિતાએ જીવન ટૂંકાવ્યું!