Ahmedabad News: 8 વર્ષની બાળકી સાથે દુષ્કર્મ ગુજારનાર નરાધમને આજીવન કેદની સજા

Ahmedabad News: અમદાવાદની સ્પેશિયલ સેશન્સ કોર્ટે (Sessions Court) એક અત્યંત સંવેદનશીલ અને ગંભીર કેસમાં કડક વલણ અપનાવતા આરોપીને આજીવન કેદની સજા ફટકારી છે. આ મામલો 10 જાન્યુઆરી, 2025 ના રોજ શહેરના ઠક્કરનગર (Thakkarnagar) વિસ્તારમાં બનેલી દુષ્કર્મની ઘટના સાથે જોડાયેલો છે, જેમાં માત્ર 8 વર્ષની નિર્દોષ બાળકીને હવસનો શિકાર બનાવવામાં આવી હતી. આ ઘટનાએ સમગ્ર વિસ્તારમાં ચકચાર મચાવી દીધી હતી.

આરોપી દલપત વઢિયારીને દોષિત જાહેર

ન્યાયાલય સમક્ષ રજૂ કરવામાં આવેલા પુરાવાઓ અને ફરિયાદી પક્ષની દલીલોને ધ્યાને લેતા કોર્ટે આરોપી દલપત વઢિયારીને દોષિત ઠેરવ્યો છે. બાળકીની ઉંમર ખૂબ જ નાની હોવી અને ગુનાની ગંભીરતાને ધ્યાનમાં રાખીને, ન્યાયાધીશે આરોપીને જ્યાં સુધી તે જીવિત રહે ત્યાં સુધી જેલમાં રહેવાની સજા સંભળાવી છે. સેશન્સ કોર્ટના આ ચુકાદાને સમાજમાં એક મજબૂત સંદેશ તરીકે જોવામાં આવી રહ્યો છે.

7 લાખ રૂપિયા પીડિત બાળકીને વળતર આપવા હુકમ

માત્ર જેલવાસ જ નહીં, પરંતુ કોર્ટે દંડ પણ ફટકાર્યો છે. આરોપીને કુલ 10 લાખ રૂપિયાનો દંડ (Penalty) ભરવાનો આદેશ કરવામાં આવ્યો છે. આ ચુકાદાની સૌથી મહત્વની બાબત એ છે કે, કોર્ટે દંડની રકમમાંથી 7 લાખ રૂપિયા પીડિત બાળકીને વળતર (Compensation) તરીકે ચૂકવવાનો હુકમ કર્યો છે. આ આર્થિક રાહત બાળકીના ભવિષ્ય અને તેના પુનર્વસન માટે ખૂબ જ મહત્વપૂર્ણ માનવામાં આવે છે.

 પરિવારને ન્યાય મળતા રાહત

ઠક્કરનગરની આ ઘટના બાદ સ્થાનિક રહેવાસીઓમાં ભારે રોષ જોવા મળ્યો હતો. પોલીસ તપાસમાં પણ ઝડપી કાર્યવાહી કરવામાં આવી હતી, વકીલની ધારદાર દલીલો અને કોર્ટમાં રજૂ કરાયેલા નક્કર પુરાવાઓને કારણે આ કેસમાં ન્યાયિક પ્રક્રિયા ઝડપી બની હતી. બાળ સુરક્ષા અને મહિલાઓની સુરક્ષા માટે અમદાવાદ સેશન્સ કોર્ટનો આ ચુકાદો અત્યંત મહત્વનો માનવામાં આવે છે.

આ પણ વાંચોઃ Ahmedabad Firing Case: ફાયરિંગ બાદ પોલીસ સ્ટેશનમાં નિવૃત DySP એ કરી દાદાગીરી