અમદાવાદ SOGએ મધ્ય પ્રદેશથી લાવવામાં આવેલું એમડી ડ્રગ્સ ઝડપ્યું
ગુજરાતને નશા મુક્ત બનાવવાના વિઝન અંતર્ગત અમદાવાદ શહેર પોલીસની સ્પેશિયલ ઓપરેશન ગ્રુપ (SOG) ની ટીમે નશીલા પદાર્થોની હેરાફેરી સામે આકરી ઝુંબેશ હાથ ધરી છે. આ ઝુંબેશ અંતર્ગત બાતમીના આધારે પોલીસે દરોડો પાડીને મધ્ય પ્રદેશથી ગુજરાતમાં ઘૂસાડવામાં આવતા એમડી ડ્રગ્સના મોટા જથ્થાને વટવા ખાતે જપ્ત કર્યો છે.
આરોપી મધ્ય પ્રદેશના રતલામથી ટ્રેન મારફતે અમદાવાદ રેલ્વે સ્ટેશને પહોંચ્યો હતો. ત્યાંથી તે વટવા વિસ્તારમાં સ્થાનિક પેડલરને માલ પહોંચાડવા માટે જઈ રહ્યો હતો ત્યારે જ પોલીસે તેને પકડી પાડ્યો હતો.
રતલામના શકીલ ખાનની ધરપકડ અને રૂ. 20 લાખનો મુદ્દામાલ
પોલીસે અટકાયત કરેલા આરોપીની ઓળખ મધ્ય પ્રદેશના રતલામ ખાતે રહેતા શકીલ ખાન પઠાણ તરીકે થઈ છે. તપાસ દરમિયાન સામે આવ્યું કે આરોપી શકીલ ખાન મધ્ય પ્રદેશના મંદસૌર જિલ્લામાંથી આ ડ્રગ્સનો જથ્થો લઈને અમદાવાદ આવ્યો હતો.
પોલીસે આરોપી પાસેથી 200 ગ્રામ શુદ્ધ એમડી ડ્રગ્સ કબ્જે કર્યું છે, જેની આંતરરાષ્ટ્રીય બજારમાં કિંમત અંદાજે રૂ. 20 લાખ જેટલી થાય છે. ડીસીપી એસઓજી રાહુલ ત્રિપાઠીના નિરીક્ષણ હેઠળ પોલીસે આરોપી વિરુદ્ધ એનડીપીએસ (NDPS) એક્ટ હેઠળ ગુનો નોંધી વધુ તપાસ લંબાવી છે.
મંદસૌરમાં બેઠા નેટવર્ક ચલાવતા પિતરાઈ ભાઈ ઈમરાનનું ષડયંત્ર
એસઓજી દ્વારા પકડાયેલા આરોપી શકીલ ખાનની આકરી પૂછપરછમાં ચોંકાવનારા ખુલાસા થયા છે. આરોપીને એક વખત ડ્રગ્સની ડિલિવરી કરવા માટે માત્ર રૂ. 5,000 ની રકમ મળતી હતી. છેલ્લા 20 દિવસમાં તે બીજી વખત ડ્રગ્સનો જથ્થો લઈને અમદાવાદ આવ્યો હોવાની કબૂલાત તેણે કરી છે. આ અગાઉ તેણે શાહઆલમ વિસ્તારમાં 200 ગ્રામ ડ્રગ્સ સફળતાપૂર્વક સપ્લાય કર્યું હતું.
આ સમગ્ર કાળા કારોબારનો મુખ્ય સૂત્રધાર તેનો પિતરાઈ ભાઈ ઈમરાન પઠાણ છે, જે મંદસૌરમાં બેસીને આખું નેટવર્ક ઓપરેટ કરતો હતો. ઈમરાન કેરિયર શકીલને સ્થાનિક પેડલરનો કોઈ મોબાઈલ નંબર આપતો ન હતો. શકીલને અમદાવાદમાં કોઈ ચોક્કસ જગ્યાએ ઊભા રહેવાનો આદેશ અપાતો અને ત્યારબાદ સ્થાનિક પેડલરો તેની પાસેથી માલ મેળવી લેતા હતા.
"આરોપી શકીલ ખાન માત્ર એક કેરિયર છે. આ આખું મોડ્યુલ એમપીના મંદસૌરથી ઈમરાન દ્વારા ચલાવવામાં આવતું હતું. મધ્ય પ્રદેશમાં તપાસ લંબાવીને આ નેટવર્કના તમામ તાર જોડવામાં આવી રહ્યા છે." - રાહુલ ત્રિપાઠી, ડીસીપી (SOG અમદાવાદ)
મજૂરથી ડ્રગ્સ કેરિયર બનવા સુધીની સફર અને રિમાન્ડ હેઠળ તપાસ
તપાસકર્તા અધિકારીઓએ જણાવ્યું કે પકડાયેલ આરોપી શકીલ ખાન મૂળ મધ્ય પ્રદેશમાં વીજળીના થાંભલા બનાવવાની ફેક્ટરીમાં સામાન્ય મજૂરી કામ કરતો હતો. તેના પિતરાઈ ભાઈ ઈમરાને તેને ઝડપી પૈસા કમાવવાની લાલચ આપીને આ ગેરકાયદેસર ડ્રગ્સ રેકેટમાં ધકેલ્યો હતો.
અમદાવાદ એસઓજીની ટીમે આરોપીના કોર્ટમાંથી રિમાન્ડ મેળવીને તપાસ આગળ ધપાવી છે. અમદાવાદના વટવા અને શાહઆલમમાં તેના આ ડ્રગ્સના જથ્થાના ખરીદદારો કોણ હતા અને ગુજરાતમાં આ નેટવર્ક ક્યાં સુધી ફેલાયેલું છે તે દિશામાં આકરી તપાસ હાથ ધરવામાં આવી છે.
આ પણ વાંચો : અમદાવાદના કાલુપુર વિસ્તારમાં અકસ્માત સર્જી ₹2.50 લાખની લૂંટ, LCB એ 2 રીઢા ગુનેગારોને દબોચ્યા
