ત્રાગડના ગોડાઉનમાંથી ₹20 લાખનો દારૂ ઝડપાયો, 2 દિવસ પહેલાં ભાડે રાખ્યું હતું ગોડાઉન

2 દિવસ પહેલાં જ ગોડાઉન ભાડે રખાયું હતું

પોલીસ તપાસમાં સામે આવેલી વિગતો અનુસાર, બુટલેગરોએ પોલીસની નજરથી બચવા માટે ત્રાગડ ગામમાં એક અવાવરું ગોડાઉન માત્ર બે દિવસ પહેલાં જ ભાડે રાખ્યું હતું. ગોડાઉન ભાડે લીધા બાદ તરત જ તેમાં બહારના રાજ્યમાંથી મોટો દારૂનો કન્સાઇનમેન્ટ ઠાલવવામાં આવ્યો હતો. જોકે, દારૂનો જથ્થો ઉતારાયો હોવાની ચોક્કસ અને ગુપ્ત બાતમી ઝોન 2 એલસીબીની ટીમને મળી ગઈ હતી.

₹20 લાખની 11,292 બોટલો અને વાહનો કબ્જે

બાતમી મળતાં જ પોલીસે તાત્કાલિક સમગ્ર વિસ્તારમાં ઘેરાબંધી કરીને ગોડાઉન પર છાપો માર્યો હતો. દરોડા દરમિયાન ગોડાઉનની અંદરથી અલગ-અલગ બ્રાન્ડની કુલ 11,292 દારૂની બોટલો મળી આવી હતી, જેની બજાર કિંમત અંદાજે રૂ. 20 લાખ થાય છે. આ ઉપરાંત, દારૂની હેરાફેરી માટે ઉપયોગમાં લેવાયેલી એક આઈસર ટ્રક અને એક ટેમ્પો પણ પોલીસે સ્થળ પરથી કબ્જે કર્યા છે.

બુટલેગરો વિરુદ્ધ કાયદેસરની કાર્યવાહી

ઝોન 2 LCB પોલીસે તમામ મુદ્દામાલ જપ્ત કરીને સાબરમતી પોલીસ મથકે પ્રોહિબિશન એક્ટ (Prohibition Act) હેઠળ ગુનો નોંધવાની તજવીજ હાથ ધરી છે. આ ગોડાઉન કોણે ભાડે રાખ્યું હતું, દારૂનો આટલો મોટો જથ્થો ક્યાંથી લાવવામાં આવ્યો હતો અને અમદાવાદના કયા-કયા સ્થાનિક બુટલેગરોને સપ્લાય કરવાનો હતો તે અંગે પોલીસે ઊંડાણપૂર્વક તપાસ શરૂ કરી છે.

આ પણ વાંચો: સુરત હીરા બજારમાં 4.80 કરોડની ઠગાઈ, દુબઈથી નેપાળ થઈ સુરત આવતાં જ પોલીસે દબોચ્યો, દેશભરમાં નોંધાઈ છે 227 ફરિયાદો