Dandi Path Yatra : 3 થી 17 જાન્યુ. સુધી આયોજન, દેશભરમાંથી નિવૃત્ત સશસ્ત્ર દળોના અધિકારીઓ-નાગરિકો 405 KM ની યાત્રા કરશે
- 3 જાન્યુઆરીથી 17 જાન્યુઆરી 2026 દરમિયાન Dandi Path Yatra નું આયોજન
- સમાન વિચારધારાવાળા નાગરિકો, નિવૃત્ત સશસ્ત્ર દળોના અધિકારીઓ જોડાશે
- અંદાજે 405 કિમી લાંબી આ યાત્રા એ તમામ ગામો-શહેરોમાંથી પસાર થશે
- જ્યાંથી ગાંધીજીએ મીઠા સત્યાગ્રહ દરમિયાન પગપાળા મુસાફરી કરી
- આ યાત્રા ઇતિહાસ રચવાનો, રાજકીય-વિચારધારાત્મક સંદેશથી પ્રેરિત નથી
Ahmedabad : વર્ષ 2026નું સ્વાગત કરવા માટે 62 વર્ષથી વધુ વયના વરિષ્ઠ નાગરિકોનો એક સમૂહ દાંડી માર્ગ પર 400 કિમીથી વધુ પગપાળા ચાલવાનું કેમ પસંદ કરે? આ પ્રશ્ન સહજ રીતે મનમાં ઉદ્ભવે. તેનો જવાબ ન તો નાટકીય છે, ન તો કોઈ વીરસાહસથી ભરેલો. એ તો બસ માનવીય છે. 3 જાન્યુઆરીથી 17 જાન્યુઆરી 2026 દરમિયાન, ભારતના વિવિધ ખૂણાઓમાંથી આવેલા સમાન વિચારધારાવાળા નાગરિકો, જેમાં નિવૃત્ત સશસ્ત્ર દળોના અધિકારીઓ ( Retired Armed Forces Officers) અને નાગરિકોનો સમાવેશ થાય છે, દાંડી પથયાત્રા (Dandi Path Yatra) પર નીકળશે. આ યાત્રા મહાત્મા ગાંધીજીની (Mahatma Gandhi) વર્ષ 1930 ની ઐતિહાસિક દાંડી કૂચને ફરીથી અનુભવી શકવાના ઉદ્દેશથી સાબરમતી આશ્રમથી દાંડી સુધી કરવામાં આવશે. અંદાજે 405 કિલોમીટર લાંબી આ યાત્રા એ તમામ ગામો અને શહેરોમાંથી પસાર થશે, જ્યાંથી ગાંધીજીએ મીઠા સત્યાગ્રહ દરમિયાન પગપાળા મુસાફરી કરી હતી.
Dandi Path Yatra ઇતિહાસ રચવાનો, રાજકીય-વિચારધારાત્મક સંદેશથી પ્રેરિત નથી
આ યાત્રા ઇતિહાસને ફરી રચવાનો પ્રયત્ન નથી, ન તો તે કોઈ રાજકીય કે વિચારધારાત્મક સંદેશથી પ્રેરિત છે. યાત્રિકો ખુદ સ્વીકારે છે કે તેમની પાસે ગાંધીજી જેવી શાંતિ, નૈતિક મહાનતા કે એકલવ્ય ધ્યેય નથી. તેમનો આશય ઘણો સાદો છે કે ગાંધીજીએ ( Mahatma Gandhi) તે લાંબી યાત્રા દરમિયાન શારીરિક અને માનસિક રીતે શું અનુભવું હશે, તેનો થોડો વ્યક્તિગત અનુભવ મેળવવાનો. મહાત્મા ગાંધીજીએ કહેલું છે, “તમે જે બદલાવ દુનિયામાં જોવા માંગો છો, એ પહેલા તમે પોતે બનો.” આ યાત્રા દ્વારા યાત્રિકો આ વિચારને ભાષણો કે નારા દ્વારા નહીં, પરંતુ જીવંત અનુભૂતિ દ્વારા આત્મસાત કરવાનો પ્રયાસ કરે છે. ચાલીને, થાક સહન કરીને, નિરીક્ષણ કરીને અને આત્મમંથન કરીને.
દાંડી માર્ગ મિતવ્યયિતા અને આત્મચિંતન માટેનું આમંત્રણ
દાંડી માર્ગ માત્ર શારીરિક યાત્રા નથી; તે મિતવ્યયિતા અને આત્મચિંતન માટેનું આમંત્રણ છે. તડકો, ધૂળ, થાક અને અસ્વસ્થતા અનુભવીને જીવનની ગતિ ધીમી કરવાની તક આપે છે. ગામડાંમાંથી પસાર થતી આ યાત્રા ભારતને તેની સહજ શાંતિમાં દર્શાવે છે. દૈનિક જીવનમાં વ્યસ્ત લોકો, શાંતિપૂર્વક ચાલતી પરંપરાઓ અને શહેરી જીવનથી સાવ અલગ ગતિએ વહેતો સમય. યાત્રિકોને આશા છે કે આ અનુભવ તેમને ગાંધીયન ભાવનાને માત્ર દૂરથી પ્રશંસા કરવાની બદલે તેને અનુભવી શકવામાં મદદ કરશે. આજે વારંવાર ઉલ્લેખ થતી સ્વચ્છ ભારત (Swachh Bharat), આત્મનિર્ભર ભારત (Atmanirbhar Bharat) અને ફિટ ઈન્ડિયા (Fit India) જેવી કલ્પનાઓ 1930 જેટલી જ આજેય પ્રાસંગિક છે અને કદાચ તે અભિયાન તરીકે નહીં, પરંતુ દૈનિક જીવનની શિસ્ત રૂપે વધુ સારી રીતે સમજી શકાય.
ગાંધીજી 78 વર્ષના જીવનકાળમાં અંદાજે 79,000 કિમી પગપાળા ચાલ્યા!
મહાત્મા ગાંધીજી જ્યાં રહ્યા ત્યાં ચાલ્યા. દક્ષિણ આફ્રિકા, ઇંગ્લેન્ડ અને ભારત. નોંધનીય છે કે તેમના 78 વર્ષના જીવનકાળ દરમિયાન તેમણે અંદાજે 79,000 કિલોમીટર પગપાળા ચાલ્યા હોવાનું માનવામાં આવે છે. આ રીતે તેઓ માત્ર નૈતિક બળ જ નહીં, પરંતુ આજના શબ્દોમાં કહીએ તો ‘ફિટ ઈન્ડિયા’નું જીવતું પ્રતિક પણ હતા. આ યાત્રા વર્ષોથી સંજાતું સપનું છે, જે સરદાર વલ્લભભાઈ પટેલ (Sardar Vallabhbhai Patel), મહાત્મા ગાંધી અને સરોજિની નાયડુ (Sarojini Naidu) દ્વારા કલ્પાયેલ ઐતિહાસિક માર્ગ પર સુચિત આયોજન સાથે કરવામાં આવી છે. દેશભરના આશરે 15 યાત્રિકો અમદાવાદમાં (Ahmedabad) ભેગા થઈ યાત્રાની શરૂઆત કરશે, જ્યારે કેટલાક યાત્રિકો માર્ગમાં વિવિધ તબક્કે જોડાશે.
સ્થાનિક સમુદાય સાથે સંવાદ મહત્ત્વનું પાસું
આરોગ્ય અને સુરક્ષા માટે વિશેષ કાળજી લેવામાં આવી છે. યાત્રિકોએ મહીનાઓથી તૈયારી કરી છે, સાથે પ્રાથમિક સારવાર સામગ્રી અને જરૂરી દવાઓ રહેશે, તેમજ જરૂર પડ્યે સ્થાનિક સરકારી આરોગ્ય સુવિધાઓનો સહારો લેવાશે. શક્ય હોય ત્યાં યાત્રિકો દાંડી પથયાત્રી નિવાસોમાં રોકાશે. તે તમામ સ્થળોએ જ્યાં ગાંધીજીએ પોતાની 24 દિવસની દાંડી યાત્રા દરમિયાન વિરામ લીધો હતો, જેમાં નડિયાદનું સંત્રામ મંદિર પણ સમાવિષ્ટ છે. યાત્રાનો એક મહત્ત્વપૂર્ણ પાસું સ્થાનિક સમુદાય સાથે સંવાદ હશે. શાળા અને કોલેજનાં વિદ્યાર્થીઓ તથા ગામનાં આગેવાનો સાથે. આ સંવાદ પ્રવચન નહીં, પરંતુ સંવાદરૂપ હશે. વધુ સાંભળવાનું અને ઓછું બોલવાનું, જેથી પેઢીઓ વચ્ચે પરસ્પર સમજ વિકસે. જ્યારે ઘણા લોકો આ વયે ગતિ ધીમી કરે છે, ત્યારે આ સમૂહ અલગ ભાવનાથી આગળ વધે છે. આ વાત પુનઃસ્થાપિત કરવા કે જિજ્ઞાસા, શીખવાની તરસ અને અર્થસભર પડકારો સ્વીકારવાની તૈયારી વય સાથે ઓછી થતી નથી. આવી યાત્રા શરૂ કરવા માટે અસાધારણ હોવાની જરૂર નથી. માત્ર પ્રથમ પગલું ભરવાની ઇચ્છા હોવી જરૂરી છે.
આ રીતે, યાત્રિકોને આશા છે કે તેમનો શાંત પ્રયાસ અન્ય લોકોને પણ તેમની પોતાની રીતે અને ગતિએ સહનશક્તિ, જોડાણ અને હેતુંને ફરી શોધવા પ્રેરણા આપશે. ક્યારેક તો માત્ર સાથે ચાલવાની સરળ પરંતુ ગહન ક્રિયા દ્વારા. લેફ્ટનન્ટ જનરલ અનિલ પુરી (Lt. Gen. Anil Puri ) લેખક નિવૃત્ત સશસ્ત્ર દળોના અધિકારી છે. હાલમાં તેઓ લખનૌ બેન્ચના આર્મ્ડ ફોર્સિસ ટ્રિબ્યુનલનાં સભ્ય છે અને દાંડી પથયાત્રાનાં ભાગીદાર છે.
દાંડી યાત્રાનું સમયપત્રક
નવું વર્ષ આવકારતા, અમારામાંથી કેટલાકે વર્ષ 2026 ની શરૂઆત 3 જાન્યુઆરીનાં રોજ સવારે 6:30 વાગ્યે સાબરમતી આશ્રમથી (Sabarmati Ashram) દાંડી તરફ દાંડીપથ પર પગપાળા ચાલીને કરવાની યોજના બનાવી છે. ધીમી ગતિએ, ઐતિહાસિક માર્ગનાં દરેક અંશને સ્પર્શતા, તેને જીવતા, અનુભતા આ યાત્રા ( Dandi Path Yatra) હાથ ધરવામાં આવશે. આ દાંડી યાત્રા માત્ર પગપાળા અંતર કાપવા માટે નથી, તેના કારણો ઘણાં ઊંડા અને અર્થસભર છે. ઇતિહાસને યાદ રાખવા માટે નહીં, પરંતુ તેને સન્માન આપવા માટે છે.
મૂળ દાંડી કૂચ ગુસ્સાનો વિરોધ નહોતો, પરંતુ નૈતિક સાહસ, શિસ્ત અને સ્પષ્ટ હેતુંનો પ્રતિક હતી. એ જ માર્ગ પર ફરી ચાલીને, અમે ઇતિહાસને પાઠ્યપુસ્તકમાંથી બહાર લાવીને એક જીવંત અને સ્મરણિય અનુભવ બનાવવાનો પ્રયાસ કરીએ છીએ. શાંત દૃઢતા શું હાંસલ કરી શકે છે તે જાતે યાદ કરાવવા માટે ગાંધીજીએ બતાવ્યું કે બદલાવ હંમેશા બળ, અવાજ કે સંખ્યાથી જ આવે એવું નથી—પરંતુ ધીરજ, સંયમ અને આંતરિક શક્તિથી પણ આવે છે. દિવસો સુધી ચાલતા રહેવું આ ભાવનાને કોઈ સમારોહ કે ભાષણ કરતાં વધુ સારી રીતે પ્રતિબિંબિત કરે છે. અર્થસભર રીતે તંદુરસ્તી ઉજવવા માટે આ વયે દરરોજ 25–30 કિમી ચાલવું સહનશક્તિ સાબિત કરવા માટે નથી, પરંતુ એ દર્શાવવા માટે છે કે વય હેતુ કે તંદુરસ્તી માટે અવરોધ નથી.
સરળતાથી ફરી જોડાવા માટે આ યાત્રા જીવનને મૂળભૂત બાબતો સુધી સીમિત કરે છે. સતત પગલાં, સાથે લીધેલું ભોજન, વાતચીત અને મૌન. ઝડપભરી અને વિક્ષેપોથી ભરેલી દુનિયામાં આ સરળતા મનને સ્થિરતા અને નવજીવન આપે છે. આગામી પેઢીને પ્રેરણા સોંપવા માટે જ્યારે યુવાનો વડીલોને ગૌરવ અને હેતુ સાથે ચાલતા જુએ છે, ત્યારે તેઓ સમજે છે કે દેશપ્રેમ, તંદુરસ્તી અને પ્રતિબદ્ધતા 60 ની ઉંમરે નિવૃત્ત થતી નથી. સાથે ચાલવા માટે 1930 ની જેમ, આજે પણ દાંડી યાત્રાની શક્તિ સાથમાં ચાલવામાં છે. ભિન્ન પૃષ્ઠભૂમિઓ, પરંતુ એક જ દિશા. આ રસ્તો એવા બંધનો બાંધે છે, જે કોઈ બેઠકખંડ કે પરિષદ કદી બાંધી શકે નહીં. આ સંદેશનો હેતુ તમને જાણ કરવાની સાથે એ પણ છે કે જો તમને રસ હોય કે સમય મળતો હોય, તો આવીને આ ઊર્જાનો અનુભવ કરો.
દાંડી પથ યાત્રાના યાત્રિકોની યાદી :
- કર્નલ જયચંદ્રન નાયર – પુણે
- લેફ્ટનન્ટ જનરલ અનિલ પુરી – લખનઉ
- બ્રિગેડિયર તુષાર મિશ્રા – ભુવનેશ્વર
- બ્રિગેડિયર એસ. કે. ચતુર્વેદી – દેહરાદૂન
- લેફ્ટનન્ટ જનરલ એમ. વી. સુચિન્દ્ર કુમાર – બેંગલુરુ
- કર્નલ એમ. જે. એસ. પાઠાણિયા – જમ્મુ
- લેફ્ટનન્ટ કર્નલ વી. શ્રીનિવાસન – બેંગલુરુ
- બ્રિગેડિયર ગિરિશ જોશી – નોઇડા, ઉત્તર પ્રદેશ
- કર્નલ આર. કે. સિંહ – પુણે
- કર્નલ લલિત ગૈરોલા – હૈદરાબાદ
- કર્નલ સુભાષ ચંદ – દિલ્હી
- લેફ્ટનન્ટ જનરલ પી. એન. અનંતનારાયણન – ચેન્નઈ
- મેજર જનરલ એન. ડી. પ્રસાદ – હૈદરાબાદ
- કર્નલ ગિરિશ ભંડારી – નોઇડા, ઉત્તર પ્રદેશ
- શ્રી સેંગાથિર સેલ્વરાજ (આઈપીએસ) – ચેન્નઈ
- મેજર આશિષ ચઢા – ગુડગાંવ, હરિયાણા
આ પણ વાંચો- DRDO જલ્દી બનાવશે 'સુદર્શન ચક્ર' એર ડિફેન્સ શીલ્ડ, રાજનાથ સિંહે કરી ઘોષણા