અમિતભાઈ શાહે જણાવ્યું કે જણાવ્યું કે દરેક ગામમાં એક નાની લાઈબ્રેરી ખોલવામાં આવશે, જેથી જ્ઞાનનો લાભ માત્ર શહેરો સુધી સીમિત ન રહે. ટેક્નોલોજી અને પુસ્તકાલય વ્યવસ્થાના સંકલન દ્વારા ગ્રામ્ય બાળકોને શહેર જેવી વાંચન સુવિધાઓ ઉપલબ્ધ કરાવવાનો પ્રયાસ કરવામાં આવી રહ્યો છે. આ એપ માત્ર ડિજિટલ પ્લેટફોર્મ નહીં પરંતુ ગ્રામ્ય સમાજને જ્ઞાન સાથે જોડતું એક સેતુ બનશે.
ગાંધીનગર લોકસભા ક્ષેત્રની લાઈબ્રેરીઓ થશે ઇન્ટિગ્રેટ
આ નવી એપ હેઠળ ગાંધીનગર લોકસભા ક્ષેત્રની વિવિધ લાઈબ્રેરીઓને એક જ નેટવર્કમાં જોડવામાં આવશે. હાલમાં વિસ્તારમાં 63 લાઈબ્રેરી શરૂ કરવામાં આવી છે અને દરેક લાઈબ્રેરીમાં અંદાજે 5થી 6 હજાર પુસ્તકો ઉપલબ્ધ કરાવવામાં આવ્યા છે. અમિતભાઈએ વધુમાં જણાવ્યું કે પુસ્તકોની પસંદગી તેમણે પોતે કરી છે. તેમાં ગુજરાત અને ભારતના ઇતિહાસ, સ્વાતંત્ર્ય આંદોલન, મહાન વ્યક્તિત્વો, સંસ્કૃતિ, વિજ્ઞાન, સમાજજીવન અને મૂલ્ય શિક્ષણ જેવા વિષયોનો સમાવેશ કરવામાં આવ્યો છે. તેમનો ઉદ્દેશ્ય એ છે કે ગામડાના બાળકને મૂળભૂત અને ગુણવત્તાસભર જ્ઞાન માટે શહેર સુધી જવું ન પડે.
મોટી અને નાની લાઈબ્રેરી વચ્ચે જ્ઞાનનો સેતુ
યોજનાનો સૌથી મહત્વપૂર્ણ ભાગ મોટી અને નાની લાઈબ્રેરીઓ વચ્ચેનું ઇન્ટિગ્રેશન છે. તાલુકા કે શહેર સ્તરની મોટી લાઈબ્રેરીઓને ગામડાની નાની લાઈબ્રેરીઓ સાથે જોડવામાં આવશે. દર 15 દિવસે ખાસ લાઈબ્રેરી વાન ગામોમાં જઈને પુસ્તકોનું વિતરણ કરશે અને નવા પુસ્તકો પહોંચાડશે. આ વ્યવસ્થાથી આશરે 2 લાખ 80 હજાર પુસ્તકો ગ્રામ્ય વિસ્તારોના બાળકો, વિદ્યાર્થીઓ, મહિલાઓ અને વાચકો માટે ઉપલબ્ધ થશે. કોઈપણ ગામની લાઈબ્રેરીમાં માંગ પ્રમાણે અન્ય લાઈબ્રેરીમાંથી પુસ્તક મંગાવી શકાય તેવી સુવિધા પણ ઉપલબ્ધ થશે.
પોતાના જીવનના વાંચનના અનુભવો કર્યા શેર
અમિતભાઈ શાહે પોતાના બાળપણની યાદો તાજી કરતાં જણાવ્યું કે તેમણે માણસાની લાઈબ્રેરીમાં 16 વર્ષ સુધી સતત વાંચન કર્યું હતું. તે સમય દરમિયાન તેઓ સાયકલ લઈને પુસ્તકાલય સુધી જતા હતા અને ઘણી વખત કોઈ ખાસ પુસ્તક માટે મહિનાઓ સુધી રાહ જોવી પડતી હતી. તેમણે જણાવ્યું કે બાદમાં અમદાવાદ આવ્યા પછી તેઓ ગુજરાત વિદ્યાપીઠની લાઈબ્રેરી સાથે જોડાયા. વિવિધ વિષયોના પુસ્તકો વાંચવાથી તેમના વિચારોનો વ્યાપ વધ્યો અને દરેક ક્ષેત્રમાં જાણકારી મેળવવાની વૃત્તિ વિકસતી ગઈ. તેમણે કહ્યું કે “પુસ્તકાલયનો મારા જીવનમાં ખૂબ મોટો રોલ રહ્યો છે.”
બાળકના સર્વાંગી વિકાસ માટે વાંચન જરૂરી
અમિતભાઈએ ભારપૂર્વક જણાવ્યું કે વાંચન માત્ર પરીક્ષા પાસ કરવાની પ્રક્રિયા નથી, પરંતુ તે બાળકના વિચાર, કલ્પનાશક્તિ, ભાષા, વ્યક્તિત્વ અને નિર્ણયક્ષમતાના વિકાસ માટે અત્યંત મહત્વપૂર્ણ છે. મોબાઇલ અને સોશિયલ મીડિયા તરફ વધતી આકર્ષણ વચ્ચે બાળકોમાં પુસ્તક વાંચવાની ટેવ વિકસાવવી સમયની સૌથી મોટી જરૂરિયાત છે. તેમણે વાલીઓને ખાસ અપીલ કરી કે બાળકોને નાની ઉંમરથી જ વાંચન તરફ પ્રોત્સાહિત કરવામાં આવે. ઘરમાં વાંચનનું વાતાવરણ ઊભું કરવાથી બાળકમાં જિજ્ઞાસા, સંસ્કાર અને જ્ઞાનપ્રેમ વિકસે છે.
ગ્રામ્ય ગુજરાત માટે મહત્વપૂર્ણ પહેલ
‘ગ્રામીણ જ્ઞાન સેતુ’ એપ અને લાઈબ્રેરી નેટવર્કને ગ્રામ્ય ગુજરાત માટે મહત્વપૂર્ણ શૈક્ષણિક અને સાંસ્કૃતિક પહેલ માનવામાં આવી રહી છે. આ યોજનાથી ગામડાના વિદ્યાર્થીઓને ગુણવત્તાસભર પુસ્તકો, ઇતિહાસ અને જ્ઞાનના સ્રોતો સરળતાથી ઉપલબ્ધ થશે. સાથે સાથે ડિજિટલ ટેક્નોલોજી અને પરંપરાગત પુસ્તકાલય વ્યવસ્થાના સંયોજન દ્વારા ગ્રામ્ય સમાજમાં વાંચન પ્રત્યે નવી જાગૃતિ ઉભી થવાની અપેક્ષા વ્યક્ત કરવામાં આવી રહી છે.
આ પણ વાંચોઃ Surat: કીમ પોલીસ સ્ટેશનના PI પી.સી. સરવૈયાને સસ્પેન્ડ કરાતાં ખળભળાટ, જાણો કેમ કરાયા સસ્પેન્ડ?
આ પણ વાંચોઃ Rajkot: મેયરે પોલીસ કમિશનરનું નામ બોલતાં ભાંગરો વાટ્યો, પોલીસ કમિશનર તરીકે રાજુ ભાર્ગવનું નામ બોલ્યા
