Website Scam: ધાર્મિક સ્થળોના નામે નકલી વેબસાઇટ બનાવી કૌભાંડ, એડવાન્સ રૂમ બુકિંગના નામે લાખો પડાવ્યા

એડવાન્સ રૂમ બુકિંગના નામે છેતરપિંડી

પોલીસ તપાસમાં સામે આવ્યું છે કે, આ કુખ્યાત કૌભાંડનો મુખ્ય આરોપી દિલ્હીનો રહેવાસી વિકી ગુપ્તા (Vicky Gupta) છે. આ આરોપીએ દેશના અલગ-અલગ અને જાણીતા ધાર્મિક સ્થળોની કુલ 126 જેટલી નકલી વેબસાઇટો બનાવી હતી. શ્રદ્ધાળુઓ જ્યારે હોટલ કે રૂમ બુક કરવા માટે ઓનલાઈન સર્ચ કરતા, ત્યારે આ નકલી વેબસાઇટ્સ ગૂગલ પર ઉપર દેખાતી હતી. ભોળા શ્રદ્ધાળુઓ તેને અસલી માનીને એડવાન્સ રૂમ બુકિંગના નામે ઓનલાઈન નાણાં જમા કરાવતા અને છેતરપિંડીનો ભોગ બનતા હતા.

ગુજરાતની જ 41 જેટલી નકલી વેબસાઇટો બનાવી

આ રેકેટનું નેટવર્ક માત્ર એક રાજ્ય પૂરતું મર્યાદિત નહોતું, પરંતુ ખૂબ જ વિશાળ હતું. આરોપીઓએ ગુજરાતની જ 41 જેટલી નકલી વેબસાઇટો બનાવી હતી. આ ઉપરાંત મહારાષ્ટ્ર, આંધ્રપ્રદેશ અને પશ્ચિમ બંગાળ જેવા મુખ્ય રાજ્યોના પ્રખ્યાત ધાર્મિક સ્થળોના નામે પણ નકલી સાઈટો બનાવીને લોકોના ખાતા ખાલી કરવામાં આવ્યા હતા. સાયબર એક્સલન્સની ટીમે ટેક્નિકલ સર્વેલન્સ અને હ્યુમન ઇન્ટેલિજન્સના આધારે દિલ્હીમાં દરોડા પાડીને આ મુખ્ય આરોપીને દબોચી લીધો છે.

Website Scam: આ કૌભાંડમાં કેટલા લોકો જોડાયેલા છે તે તપાસ

આ કેસની ગંભીરતાને ધ્યાનમાં રાખીને સાયબર પોલીસ હવે એ દિશામાં તપાસ કરી રહી છે કે આ કૌભાંડમાં તેની સાથે અન્ય કયા કયા લોકો સંકળાયેલા છે અને અત્યાર સુધીમાં તેણે કુલ કેટલા રૂપિયા પડાવ્યા છે. ધાર્મિક પ્રવાસન સ્થળો સાથે જોડાયેલા આ પ્રકારના ઓનલાઈન ફ્રોડથી બચવા માટે નાગરિકોએ હંમેશાં સત્તાવાર અને સરકારી વેબસાઇટ્સનો જ ઉપયોગ કરવો જોઈએ તેવી અપીલ પોલીસ દ્વારા કરવામાં આવી છે. આ ઝડપથી ફેલાતા સાયબર ક્રાઈમ સામે પોલીસની આ કડક કાર્યવાહીથી ઠગ ટોળકીઓમાં ફફડાટ ફેલાઈ ગયો છે.

આ પણ વાંચો: Sukhbir Singh Badal Attack : નાંદેડમાં સુખબીર સિંહ બાદલ પર હુમલો, ડાબા હાથમાં ઈજા થતાં હોસ્પિટલ ખસેડાયા