વંદે ભારત ટ્રેને રચ્યો મેડિકલ ઇતિહાસ, સુરતથી અમદાવાદ સફળતાપૂર્વક પહોંચાડાયું જીવંત હૃદય

જીવંત હૃદયને સમયસર દર્દી સુધી પહોંચાડાયું

એક દર્દીના અંગદાન (Organ Donation) થી પ્રાપ્ત થયેલા જીવંત હૃદયને સમયસર જરૂરિયાતમંદ દર્દી સુધી પહોંચાડવાનું હતું. સુરતથી અમદાવાદનું આ અંતર ટ્રેન દ્વારા ખૂબ જ ઝડપથી અને સુરક્ષિત રીતે કાપવામાં આવ્યું હતું. અમદાવાદની નામાંકિત યુ.એન. મહેતા ઇન્સ્ટિટ્યૂટ ઓફ કાર્ડિયોલોજી એન્ડ રિસર્ચ સેન્ટર (U.N. Mehta Institute of Cardiology) ખાતે આ જીવંત હૃદયનું કુશળ ડોક્ટરોની ટીમ દ્વારા સફળતાપૂર્વક પ્રત્યારોપણ (Heart Transplant) કરવામાં આવ્યું છે, જેનાથી એક દર્દીને નવું જીવન મળ્યું છે.

હૃદયને કોઈપણ ટ્રાફિક કે વિલંબ વગર પહોંચાડાયું

આટલી મોટી મેડિકલ કટોકટી અને સંવેદનશીલ મિશનને પાર પાડવા માટે સુરત અને અમદાવાદ રેલવે સ્ટેશન તેમજ રસ્તાઓ પર ખાસ વ્યવસ્થા કરવામાં આવી હતી. આરપીએફ (RPF - Railway Protection Force) અને ગુજરાત પોલીસ (Gujarat Police) દ્વારા સંયુક્ત રીતે અત્યંત ચુસ્ત ગ્રીન કોરિડોર (Green Corridor) તૈયાર કરવામાં આવ્યો હતો. પોલીસ અને રેલવે તંત્રની આ સરાહનીય અને ત્વરિત કામગીરીના કારણે હૃદયને કોઈપણ ટ્રાફિક કે વિલંબ વગર નિર્ધારિત સમય કરતાં પણ વહેલા હોસ્પિટલ પહોંચાડી દેવામાં આવ્યું હતું.

આ પણ વાંચો: Navsari Flood Rescue Alert : નવસારીમાં આભ ફાટ્યું, 4 હજારથી વધુ લોકોનું સ્થળાંતર, આર્મી સ્ટેન્ડબાય