Gujarat Heatwave : ગુજરાતમાં ગરમીનો કાળો કહેર
અમદાવાદમાં તાપમાન 44.8 ડિગ્રી સુધી પહોંચ્યું
રાજકોટમાં 44.4  અને અમરેલીમાં 44.5 ડિગ્રી તાપમાન 
ગાંધીનગરમાં 44.2 તાપમાન નોંધાયું
વડોદરા, ભુજ, દીસા સહિત અનેક શહેરોમાં 43 ડિગ્રીને પાર
સુરતમાં પણ 41.6 ડિગ્રી સાથે ઉકળાટભર્યું વાતાવરણ
સામાન્ય કરતાં 2 થી 4 ડિગ્રી વધુ તાપમાન
લોકોને બપોરે બહાર ન નીકળવાની સલાહ
હીટસ્ટ્રોકના જોખમને લઇ આરોગ્ય વિભાગ એલર્ટ

Heatwave Alert : ગુજરાત રાજ્યમાં હાલ ગરમીનો પ્રકોપ ચરમસીમાએ પહોંચ્યો છે. છેલ્લા કેટલાક દિવસોથી અમદાવાદ (Ahmedabad) સહિત સમગ્ર રાજ્યમાં સૂર્યનારાયણ અગનગોળા વરસાવી રહ્યા હોય તેવી સ્થિતિ સર્જાઈ છે. તાપમાનનો પારો સતત ઉપર ચડી રહ્યો છે, જેના કારણે જનજીવન ભારે પ્રભાવિત થયું છે.

જાણો તમારા શહેરમાં કેવી છે સ્થિતિ

રાજ્યના મોટાભાગના શહેરોમાં તાપમાન સામાન્ય કરતા 2 થી 4 ડિગ્રી વધુ નોંધાઈ રહ્યું છે. સૌથી વધુ ગરમીનો માર અમદાવાદ (Ahmedabad) સહન કરી રહ્યું છે, જ્યાં તાપમાન 44.8 ડિગ્રી સુધી પહોંચી ગયું છે. આ જ રીતે અમરેલી (Amreli) માં 44.5 ડિગ્રી અને રાજકોટ (Rajkot) માં 44.4 ડિગ્રી તાપમાન નોંધાતા લોકો અસહ્ય ગરમીથી ત્રસ્ત થઈ ગયા છે. પાટનગર ગાંધીનગર (Gandhinagar) માં પણ 44.2 ડિગ્રી તાપમાન સાથે કાળઝાળ ગરમીનો અનુભવ થઈ રહ્યો છે.

અન્ય શહેરોની સ્થિતિ પર નજર કરીએ તો, વડોદરા (Vadodara) માં 43.0 ડિગ્રી અને ભુજ (Bhuj) માં 43.8 ડિગ્રી તાપમાન નોંધાયું છે. ડીસા (Deesa) સહિતના અનેક વિસ્તારોમાં તાપમાન 43 ડિગ્રીને પાર કરી ગયું છે. દક્ષિણ ગુજરાતના સુરત (Surat) માં 41.6 ડિગ્રી તાપમાન સાથે ઉકળાટભર્યું વાતાવરણ પ્રવર્તી રહ્યું છે, જેણે લોકોને ઘરમાં પૂરાઈ રહેવા મજબૂર કરી દીધા છે.

આરોગ્ય વિભાગ એલર્ટ

આટલી ભયાનક ગરમીને ધ્યાનમાં રાખીને તંત્ર પણ એલર્ટ મોડ પર આવી ગયું છે. આરોગ્ય વિભાગ દ્વારા ખાસ કરીને બાળકો, વયોવૃદ્ધો અને બીમાર વ્યક્તિઓને બપોરના સમયે ઘરની બહાર ન નીકળવાની કડક સલાહ આપવામાં આવી છે. હીટસ્ટ્રોક (લૂ) લાગવાની શક્યતાઓને પગલે સરકારી હોસ્પિટલોમાં પણ જરૂરી તૈયારીઓ રાખવા સૂચના આપવામાં આવી છે.

રસ્તાઓ પર કર્ફ્યુ જેવો માહોલ

તબીબોના મતે, આ કાળઝાળ ગરમીથી બચવા માટે લોકોએ વધુમાં વધુ પાણી પીવું, સુતરાઉ કપડાં પહેરવા અને કામ વગર બહાર નીકળવાનું ટાળવું જોઈએ. રસ્તાઓ પર બપોરના સમયે ટ્રાફિક ઘણો ઓછો જોવા મળી રહ્યો છે, જાણે કે રસ્તાઓ પર કર્ફ્યુ જેવો માહોલ હોય. ગરમીની આ લહેર આગામી થોડા દિવસો સુધી યથાવત રહેવાની શક્યતાઓ હવામાન વિભાગ દ્વારા વ્યક્ત કરવામાં આવી રહી છે.

આ પણ વાંચો: 44 Degree Temperature: અમદાવાદ બન્યું અગનગોળો: સિવિલ હોસ્પિટલ હાઈ એલર્ટ! બાળકો અને વૃદ્ધો રાખજો ખાસ સાવચેતી!