Hakabha VS Nilesh Arvadiya: જેતપુર ખેડૂત આંદોલને હવે નવો વળાંક લીધો છે. આ આંદોલનમાં હકાભા ગઢવીએ ખેડૂત આગેવાન નિલેશ એરવાડીયા પર ગંભીર આક્ષેપ કરતા મામલો ગરમાયો છે. આજે લોકગાયક હકાભા ગઢવીએ એક પ્રેસ કોન્ફરન્સ કરીને અનેક મોટા ખુલાસા કર્યા હતા જેમાં તેમણે કહ્યું કે, "નિલેશભાઈએ સરકારમાં માગ થાય તો 25 કરોડની માગ કરવા કહ્યું અને મળવા માટે એડવાન્સ 2 કરોડ રુપિયા માગ્યા આ આક્ષેપોને નિલેશ એરવાડીયાએ ફગાવ્યા હતા. અને તેમણે હકાભા પર આક્ષેપ કર્યા હતા વાયરલ ઓડિયો ખોટો છે. આ આક્ષેપો પર હકાભાએ પડકાર ફેંક્યો છે કે જો ઓડિયો ક્લિપની સત્યતા તપાસવી હોય તો તે FSLમાં મોકલી શકાય છે. ગુજરાત ફસ્ટ સાથેની વાતચીતમાં હકાભાએ આ મામલે અનેક મોટા ખુલાસા કર્યા છે....
"મારે નેતા નથી બનવું, હું માત્ર ખેડૂતોના સમર્થનમાં છું"
નિલેશ એરવાડીયા દ્વારા હકાભા પર 'નેતૃત્વ મેળવવાની લાલસા'નો આક્ષેપ કરવામાં આવ્યો હતો, જેના જવાબમાં હકાભાએ સ્પષ્ટ શબ્દોમાં કહ્યું હતું કે, "મારી ઉંમર 52 વર્ષ છે, મારે રાજકારણમાં જવું નથી. મેં ક્યારેય કોઈ રાજકીય ખેસ પહેર્યો નથી. અત્યારે લાખો ખેડૂતો મને સમર્થન આપી રહ્યા છે, મારે નેતા બનવાની કોઈ ઈચ્છા નથી. હું તો માત્ર ખેડૂતોને ન્યાય મળે તે માટે તેમની સાથે જોડાયો હતો."
"મારી પાસે પુરાવા છે, હું સાચો છું"
ઓડિયો ક્લિપ અંગે હકાભાએ જણાવ્યું હતું કે, આંદોલન બગડે નહીં તે માટે તેઓ અત્યાર સુધી ચૂપ રહ્યા હતા. તેઓ ઈચ્છતા હતા કે સરકાર ખેડૂતોને ન્યાય આપે, ત્યારબાદ જ તેઓ આ ઓડિયો જાહેર કરે. તેમણે કહ્યું કે, "નિલેશ કહે છે કે આ અવાજ તેમનો નથી, પરંતુ હું કહું છું કે રેકોર્ડિંગ મેં કર્યું છે. જો તેની લીગલ ચેલેન્જ આપવામાં આવે તો ઓડિયો FSLમાં મોકલવામાં આવે એટલે એક દિવસમાં સત્ય બહાર આવી જશે."
"ખેડૂતોને ખબર નહોતી કે તેમની પાસે જ વિભીષણ છે"
આંદોલન કેમ એક જ વ્યક્તિના ખભા પર ચાલે છે અને અન્ય કોઈ કેમ નથી બોલી શકતું તેવા પ્રશ્નના જવાબમાં હકાભાએ ઉમેર્યું કે, "પહેલા લોકોને લાગતું હતું કે આ જ સર્વસ્વ છે, પણ નિલેશે માણસ પારખવામાં ભૂલ કરી. મને ખોટી ઓફર આપીને તેણે પોતાની પોલ પોતે જ ખોલી દીધી છે."
હકાભા ગઢવીએ અંતમાં પુનરોચ્ચાર કર્યો હતો કે તેઓ આંદોલનના આગેવાન બનવા માંગતા નથી, પરંતુ ખેડૂતોના હિત માટે હંમેશા સાથે રહેશે. ભવિષ્યમાં જો કોઈ નવો આગેવાન આવશે, તો તેને પણ તેઓ સંપૂર્ણ સમર્થન આપશે. આ સમગ્ર વિવાદે ખેડૂત આંદોલનને એક નવો વળાંક આપ્યો છે. હવે આ મામલે આગળ શું થાય છે તે જોવું રહ્યું....
આ પણ વાંચો: Hakabha Gadhvi On Jetpur Andolan: "સરકાર પાસે 25 કરોડની માંગણી કરો, 2 કરોડ એડવાન્સ લો" હકાભા ગઢવીએ કર્યા સનસનીખેજ ખુલાસા
