ફૂટ ઓવરબ્રિજ પર કર્મચારીને આંતરી સોનું લૂંટ્યું
3 ઓક્ટોબરની સાંજે આશરે 5:30 વાગ્યે ગ્રોમોર વેલ્યુ પ્રાઇવેટ લિમિટેડનો 21 વર્ષીય કર્મચારી ભરત ચૌધરી હાવડા-અમદાવાદ એક્સપ્રેસ ટ્રેનમાં સોનાના પાર્સલ લઈને નડિયાદ પહોંચ્યો હતો. પ્લેટફોર્મ નંબર 2 પરથી પ્લેટફોર્મ નંબર 1 તરફ જતા ફૂટ ઓવરબ્રિજ પર ચાર શખ્સોએ તેને આંતર્યો હતો.
Advertisement ![Navratri Banner]()
આરોપીઓએ ભરત ચૌધરીને ધમકી આપી તેની પાસે રહેલી લીલા રંગની બેગ ઝૂંટવી લીધી હતી. બેગમાં અંદાજે 2.90 કિલો સોનું, જેની કિંમત લગભગ ₹4 કરોડ હતી. ફરિયાદીએ આરોપીઓની કારનો ફોટો પણ લઈ લીધો હતો.
CCTVથી આરોપીઓની શોધ
ઘટનાની જાણ થતાં રેલવે પોલીસે CCTV ફૂટેજ તપાસી હતી. આરોપીઓ ટિયાગો કારમાં ફરાર થયા હોવાનું સામે આવ્યું હતું. આ માહિતી સ્ટેટ પોલીસ કંટ્રોલ રૂમ સુધી પહોંચાડવામાં આવી હતી. ત્યારબાદ અમદાવાદ ગ્રામ્ય, વડોદરા અને આસપાસની પોલીસ ટીમો સક્રિય થઈ હતી.
વિરમગામ પાસે પોલીસનું ફિલ્મી ઢબે ઓપરેશન
અમદાવાદ ગ્રામ્ય પોલીસે સંભવિત રૂટ પર નાકાબંધી કરી હતી. ગુપ્ત માહિતીના આધારે આરોપીઓ બનાસકાંઠા તરફ જઈ રહ્યા હોવાનું જાણવા મળ્યું હતું. પોલીસે નંબર પ્લેટ વગરની બલેનો કાર પણ ટ્રેક કરી હતી અને મુખ્ય આરોપી સાવન ચૌધરીને ઝડપી લીધો હતો.
ત્યારબાદ વિરમગામના નીલકી ગામ પાસે ટિયાગો કારને રોકવામાં આવી હતી. PI એસ.એ. ગઢવીએ હિંમત દાખવી ચાલુ કારમાં પ્રવેશ કર્યો હતો. આરોપી સાથે રકઝક દરમિયાન તેમણે કારનું હેન્ડબ્રેક ખેંચી વાહન રોકી દીધું હતું. ત્યારબાદ પોલીસે ત્રણ આરોપીઓને ઝડપી લીધા હતા. ફરાર થયેલા અન્ય આરોપીને પણ બાદમાં ઝડપી લેવામાં આવ્યો હતો.
ચાર મહિનાથી લૂંટનું કાવતરું ઘડ્યું હોવાનો ખુલાસો
પોલીસની પ્રાથમિક પૂછપરછમાં સાવન ચૌધરીએ છેલ્લા 4 મહિનાથી લૂંટનું કાવતરું ઘડ્યું હોવાનું સામે આવ્યું છે. તે મૂળ બનાસકાંઠાના દિયોદરનો હોવાનું અને પાન પાર્લર ચલાવતો હોવાનું જાણવા મળ્યું છે. લૂંટ બાદ સોનું દિયોદરમાં સંતાડી થોડા દિવસ બાદ ભાગબટાઈ કરવાનો પ્લાન હતો. જોકે પોલીસના સંકલિત ઓપરેશનથી આરોપીઓનો પ્લાન નિષ્ફળ ગયો હતો.
આ પણ વાંચો---- Bhavnagar News : ભાવનગરમાં દૂધના ફેટમાં મોટો ખેલ, ડેરી કંપનીને 54 લાખનો ચૂનો ચોપડનાર 6 આરોપીઓને LCB એ દબોચ્યા
