ગુજરાતના યુવાનોને વૈશ્વિક સ્તરે રોજગારીની તકો મળી રહે અને ઉદ્યોગોની જરૂરિયાત મુજબનું કૌશલ્ય તેઓ મેળવી શકે તે માટે રાજ્ય સરકાર સતત પ્રયત્નશીલ છે. આ જ દિશામાં એક મહત્વપૂર્ણ કદમ ઉઠાવતા ગત ૨ જુલાઇ, ૨૦૨૬ ના રોજ અમદાવાદની હોટેલ લે મેરિડિયન ખાતે 'ઉદ્યોગ-એકેડેમિયા–સેક્ટર સ્કિલ કાઉન્સિલ્સ આઉટરીચ' કાર્યક્રમનું આયોજન કરવામાં આવ્યું હતું. ગુજરાત સરકારના શ્રમ, કૌશલ્ય વિકાસ અને રોજગાર વિભાગ હેઠળના DSD અને DET દ્વારા આ વિશેષ ઇવેન્ટનું આયોજન 'નમો ગુજરાત કૌશલ્ય અને રોજગાર મિશન' (NGKRM) અંતર્ગત કરાયું હતું.
Namo Gujarat Kaushalya and Rojgar Mission : મુખ્ય હેતુ
આ કાર્યક્રમનો મુખ્ય ઉદ્દેશ્ય ઉદ્યોગો (Industries), શૈક્ષણિક સંસ્થાઓ (Academia) અને સેક્ટર સ્કિલ કાઉન્સિલ્સ (SSCs) વચ્ચે એક મજબૂત કડી સ્થાપિત કરવાનો હતો. આ ઉપરાંત, સરકારની મહત્વની યોજનાઓ જેવી કે:
1.નમો ગુજરાત કૌશલ્ય અને રોજગાર મિશન(Namo Gujarat Kaushalya and Rojgar Mission )
2.PM-SETU
3.પ્રધાનમંત્રી ઇન્ટર્નશિપ યોજના
4.મુખ્યમંત્રી એપ્રેન્ટિસશિપ યોજના આ તમામ યોજનાઓ અંગે ઉદ્યોગ જગતમાં વધુમાં વધુ જાગૃતિ લાવવાનો પ્રયાસ કરવામાં આવ્યો હતો.
વિકસિત ભારત અને ગુજરાત માટે ઉદ્યોગલક્ષી તાલીમ અનિવાર્ય
કાર્યક્રમમાં મુખ્ય અતિથિ તરીકે ઉપસ્થિત શ્રમ, કૌશલ્ય વિકાસ અને રોજગાર વિભાગના સચિવ લોચન સહેરાએ યુવાનોના કૌશલ્ય વર્ધન પર ખાસ ભાર મૂક્યો હતો. તેમણે જણાવ્યું હતું કે:
"વિકસિત ભારત અને વિકસિત ગુજરાતના સપનાને સાકાર કરવા માટે આપણી પાસે વિશ્વસ્તરીય અને ઉદ્યોગલક્ષી તાલીમ પામેલું કુશળ માનવબળ હોવું ખૂબ જ જરૂરી છે. તો જ આપણા યુવાનો વૈશ્વિક સ્તરે સ્પર્ધામાં ટકી શકશે."
તેમણે ઉદ્યોગોને પણ સરકારના આ કૌશલ્ય મિશનોમાં સક્રિયપણે જોડાવા માટે અપીલ કરી હતી.
રોજગાર અને ઇન્ટર્નશિપ માટે મહત્વના કરારો (MoU)
આ ઇવેન્ટ દરમિયાન ગુજરાતના યુવાનો માટે ઇન્ટર્નશિપ, ટ્રેનિંગ અને રોજગારના નવા દ્વાર ખોલવા માટે નેશનલ સ્કિલ ડેવલપમેન્ટ કોર્પોરેશન (NSDC) સાથે મહત્વના સમજૂતી કરારો (MoU) કરવામાં આવ્યા હતા. આ કરાર કરનારી સંસ્થાઓમાં સામેલ છે:
DSD (ડિરેક્ટોરેટ ઓફ સ્કિલ ડેવલપમેન્ટ)
KSU (કૌશલ્ય - ધ સ્કિલ યુનિવર્સિટી)
GTU (ગુજરાત ટેકનોલોજીકલ યુનિવર્સિટી)
GIFT City (ગિફ્ટ સિટી)
વિવિધ સેક્ટર્સ દ્વારા પ્રેઝન્ટેશન અને ભવિષ્યની તકો
કાર્યક્રમ દરમિયાન દેશની અગ્રણી સ્કીલ કાઉન્સિલ્સ જેવી કે ઇલેક્ટ્રોનિક્સ (ESSCI), ઓટોમોટિવ (ASDC) અને લોજિસ્ટિક્સ (LSC) ના નિષ્ણાતો દ્વારા ખાસ પ્રસ્તુતિઓ રજૂ કરવામાં આવી હતી. જેમાં આગામી સમયમાં કયા ક્ષેત્રમાં નોકરીઓની નવી તકો ઉભી થવાની છે, ઉદ્યોગોને કેવા પ્રકારના કુશળ માણસોની જરૂર છે અને તેના માટે કેવા શૈક્ષણિક સહયોગની જરૂર છે, તેની વિગતવાર ચર્ચા કરવામાં આવી હતી.
એકંદરે, આ આઉટરીચ કાર્યક્રમ માત્ર એક બેઠક પૂરતો સીમિત ન રહેતા, આગામી સમયમાં ગુજરાતના યુવાનો માટે રોજગારી અને કૌશલ્ય વર્ધનના નવા આયામો સર કરનારો સાબિત થશે. સરકાર, ઉદ્યોગો અને શૈક્ષણિક સંસ્થાઓનું આ ત્રિવેણી સંગમ આગામી દિવસોમાં રાજ્યના ઔદ્યોગિક વિકાસને નવી ગતિ આપશે. ટેક્નોલોજી અને ઉદ્યોગોની બદલાતી જરૂરિયાતો વચ્ચે, આવા સક્રિય પ્રયાસોથી ગુજરાતના યુવાનો માત્ર નોકરી મેળવનારા જ નહીં, પરંતુ વૈશ્વિક સ્તરે દેશનું નામ રોશન કરનારા કુશળ વ્યાવસાયિકો બનશે તેમાં કોઈ શંકા નથી.
આ પણ વાંચો : DSA Convocation 2026 Event : અમદાવાદમાં ડિજિટલ સંદિપ એકેડેમીનો ભવ્ય દીક્ષાંત સમારોહ સંપન્ન, 1500 થી વધુ યુવાનો રહ્યા હાજર
