• અમદાવાદ વિમાન દુર્ઘટનામાં 270થી વધુનાં મોત
• વિમાન દુર્ઘટના પાછળ કારણ શું? તપાસ ચાલુ
• વિમાનના જમણી બાજુનું એન્જિન 3 મહિના પહેલા બદલવામાં આવ્યું
• વિજય રૂપાણી સહિત અનેક પ્રતિષ્ઠિત લોકોના મોત
• દુર્ઘટનાની તપાસમાં ઇન્ટરનેશનલ ટીમો જોડાઈ

Ahmedabad Plane Crash : અમદાવાદના સરદાર વલ્લભભાઈ પટેલ આંતરરાષ્ટ્રીય વિમાનમથક પરથી લંડન જતું એર ઈન્ડિયાનું વિમાન નંબર AI171, 12 જૂન, 2025ના રોજ ટેકઓફની થોડી સેકન્ડોમાં જ ક્રેશ થયું, જે ભારતની સૌથી ભયાનક હવાઈ દુર્ઘટનાઓમાંની એક બની. આ દુર્ઘટનામાં 12 ક્રૂ મેમ્બર્સ સહિત 242 મુસાફરોમાંથી માત્ર એક બ્રિટિશ-ભારતીય નાગરિક, વિશ્વાસકુમાર રમેશ, બચ્યા, જ્યારે 241 મુસાફરો અને જમીન પર ઓછામાં ઓછા 29 લોકોનાં મોત નીપજ્યાં. આ ઘટનાએ ઉડ્ડયન જગતમાં ખળભળાટ મચાવ્યો છે, અને તાજેતરના એક ખુલાસાએ સૌ કોઇને ચોંકાવી દીધા છે.

દુર્ઘટનાની વિગતો અને તેની ભયાનકતા

સૂત્રોએ જણાવ્યું હતું કે, આશરે 12 વર્ષ જૂના વિમાનના જમણી બાજુનું એન્જિનનું તાજેતરમાં સમારકામ કરવામાં આવ્યું હતું અને 3 મહિના પહેલા માર્ચ 2025 માં તેને બદલવામાં આવ્યું હતું. સૂત્રોએ જણાવ્યું હતું કે એર ઇન્ડિયાના આ વિમાનને જૂન 2023 માં વિગતવાર જાળવણી તપાસ પણ કરવામાં આવી હતી અને તેના આગામી રાઉન્ડની તપાસ આ વર્ષે ડિસેમ્બરમાં સુનિશ્ચિત કરવામાં આવી હતી. આ વિમાન, જે લંડનના ગેટવિક એરપોર્ટ જઈ રહ્યું હતું, બપોરે 1:38 વાગ્યે ટેકઓફ કર્યા બાદ માત્ર થોડી સેકન્ડોમાં જ મેઘાણીનગર વિસ્તારમાં બી.જે. મેડિકલ કોલેજની હોસ્ટેલ બિલ્ડિંગ સાથે અથડાયું. 125,000 લિટર ઈંધણથી ભરેલા આ વિમાનના અથડાવાથી જોરદાર વિસ્ફોટ થયો અને ભયંકર આગ ફેલાઈ, જેના કારણે મોટાભાગના લોકો જીવતા જ મોતને ભેટી ગયા. આ દુર્ઘટનામાં ગુજરાતના ભૂતપૂર્વ મુખ્યમંત્રી વિજય રૂપાણી સહિત અનેક જાણીતી વ્યક્તિઓનાં મોત થયાં. સ્થિતિ કેટલી હદે ખરાબ થઇ તેનો અંદાજો તમે એ વાત પરથી લગાવી શકો છે કે, મૃતદેહોની ઓળખ માટે DNA મેચિંગની પ્રક્રિયા હાથ ધરવામાં આવી, જેમાં 16 જૂન સુધીમાં 99 શબોની ઓળખ થઈ અને 64 શબો પરિવારજનોને સોંપવામાં આવ્યા.

એન્જિન અને જાળવણીનો ચોંકાવનારો ખુલાસો

આ દુર્ઘટના બાદ એક આશ્ચર્યજનક માહિતી સામે આવી છે કે વિમાનનું જમણી બાજુનું એન્જિન માર્ચ 2025માં બદલવામાં આવ્યું હતું, અને ડાબી બાજુના એન્જિનની તપાસ એપ્રિલ 2025માં ઉત્પાદકના પ્રોટોકોલ મુજબ કરવામાં આવી હતી. આ ઉપરાંત, વિમાનની વિગતવાર જાળવણી તપાસ જૂન 2023માં થઈ હતી, અને આગામી તપાસ ડિસેમ્બર 2025માં નિયત હતી. એર ઈન્ડિયાએ તેના બોઈંગ 787-8 ડ્રીમલાઈનરનું વીમા કવર એપ્રિલ 2025માં 750 કરોડ રૂપિયાથી વધારીને 850 કરોડ રૂપિયા કર્યું હતું. આ ઘટના દેશની સૌથી ખર્ચાળ ઉડ્ડયન વીમા દાવો બની શકે છે, જેનો અંદાજિત આંકડો 3,000 કરોડ રૂપિયા છે.

સરકાર અને એરલાઈનની ત્વરિત કાર્યવાહી

દુર્ઘટના બાદ ભારત સરકારે તાત્કાલિક પગલાં લીધાં. કેન્દ્ર સરકારે મુખ્ય સચિવના નેતૃત્વમાં ઉચ્ચ સ્તરીય તપાસ સમિતિની રચના કરી, જે 3 મહિનામાં પોતાનો અહેવાલ રજૂ કરશે. ડિરેક્ટોરેટ જનરલ ઓફ સિવિલ એવિએશન (DGCA) એ એર ઈન્ડિયાના બોઈંગ 787 ફ્લીટની સઘન સુરક્ષા તપાસ માટે માર્ગદર્શિકા જારી કરી. એર ઈન્ડિયાએ જણાવ્યું કે તેઓ DGCAની સૂચનાઓ મુજબ 33 બોઈંગ 787 વિમાનોમાંથી 9ની સુરક્ષા તપાસ પૂર્ણ કરી ચૂક્યા છે અને બાકીના 24 વિમાનોની તપાસ નિર્ધારિત સમયમર્યાદામાં પૂર્ણ કરવામાં આવશે. આ તપાસને કારણે લાંબા અંતરની ફ્લાઈટ્સ, ખાસ કરીને રાત્રિના કર્ફ્યુવાળા એરપોર્ટ્સ પર, વિલંબની શક્યતા છે.

વળતર અને પરિવારોને સહાય

એર ઈન્ડિયા અને તેની માલિક કંપની ટાટા ગ્રૂપે દુર્ઘટનામાં મૃત્યુ પામેલા મુસાફરો અને જમીન પરના પીડિતોના પરિવારો માટે 1 કરોડ રૂપિયાનું વળતર જાહેર કર્યું. આ ઉપરાંત, 14 જૂન, 2025ના રોજ એર ઈન્ડિયાએ મૃતકોના પરિવારો અને એકમાત્ર બચેલા વ્યક્તિ માટે વધારાના 25 લાખ રૂપિયાના વચગાળાના વળતરની ઘોષણા કરી. એરલાઈને અમદાવાદ, મુંબઈ, દિલ્હી અને ગેટવિક એરપોર્ટ્સ પર પરિવારો માટે સહાય કેન્દ્રો સ્થાપ્યા, જ્યાં 200થી વધુ પ્રશિક્ષિત કર્મચારીઓ પરિવારોને કાઉન્સેલિંગ અને અન્ય સેવાઓ પૂરી પાડી રહ્યા છે. ટાટા ગ્રૂપે બી.જે. મેડિકલ કોલેજની નાશ પામેલી ઈમારતના પુનઃનિર્માણ માટે પણ સહાયનું વચન આપ્યું છે.

તપાસની પ્રગતિ અને ભવિષ્યની ચિંતાઓ

દુર્ઘટના બાદ વિમાનનું ફ્લાઈટ ડેટા રેકોર્ડર (બ્લેક બોક્સ) કાટમાળમાંથી મળી આવ્યું, જે તપાસમાં મહત્વની ભૂમિકા ભજવશે. પાયલોટે ટેકઓફ બાદ તરત જ May-Day કોલ આપ્યો હતો, જે ગંભીર સમસ્યાનો સંકેત આપે છે. નિષ્ણાતોનું માનવું છે કે એન્જિન નિષ્ફળતા, બર્ડ સ્ટ્રાઈક અથવા ફ્લેપની ખામી આ દુર્ઘટનાનું કારણ હોઈ શકે છે. ભારતના એરક્રાફ્ટ એક્સિડન્ટ ઈન્વેસ્ટિગેશન બ્યુરો (AAIB), યુ.એસ.ના નેશનલ ટ્રાન્સપોર્ટેશન સેફ્ટી બોર્ડ અને યુ.કે.ના એર એક્સિડન્ટ્સ ઈન્વેસ્ટિગેશન બ્રાન્ચના નિષ્ણાતો આ તપાસમાં જોડાયા છે.

આ પણ વાંચો :  અમદાવાદ પ્લેન ક્રેશ બાદ એક નવો વીડિયો થયો વાયરલ, ભયભીત થયેલા વિદ્યાર્થીઓ જીવ બચાવવા કુદ્યા