અમરેલીના લીલીયા રેન્જમાં સિંહ દર્શન કરાવતી વખતે યુવકના મૃત્યુના કેસમાં વનવિભાગે તપાસ તેજ કરી છે. બે ધરપકડ કરાયેલા આરોપીઓના રિમાન્ડ પૂર્ણ થવાના છે. મૃતક દ્વારા જેમને વીડિયો કોલ કરાયા હતા તે સહિત ૫ લોકોના નિવેદનો નોંધાયા છે. વનવિભાગ આ ગંભીર મામલે કાયદાકીય કાર્યવાહી આગળ વધારી રહ્યું છે.
Amreli News: અમરેલીના લીલીયા રેન્જ (Liliya Range) વિસ્તારમાં સિંહ દર્શન દરમિયાન થયેલા હુમલામાં એક યુવકના મૃત્યુની કરુણ ઘટના બાદ વનવિભાગ (Forest Department) દ્વારા તપાસનો ધમધમાટ શરૂ કરવામાં આવ્યો છે. આ મામલે સિંહની પજવણી (Harassment of Lion) કરી ગેરકાયદે સિંહ દર્શન કરાવનારા 2 ઈસમોની અગાઉ ધરપકડ કરવામાં આવી છે, જેઓ હાલ રિમાન્ડ પર છે. આજે આ બંને આરોપીઓના રિમાન્ડ પૂર્ણ થતા હોવાથી વનવિભાગ તેમને ફરી એકવાર કોર્ટ સમક્ષ રજૂ કરવાની તૈયારી કરી રહ્યું છે.
વીડિયો કોલની મળી કડી
વનવિભાગની તપાસમાં એક મહત્વનો વળાંક આવ્યો છે. મૃતક યુવકે ઘટના સમયે 3 લોકોને વીડિયો કોલ કરીને સિંહ દર્શન કરાવ્યા હોવાનું સામે આવ્યું છે. આ કડીને પગલે વનવિભાગે તે ત્રણેય વ્યક્તિઓને તપાસ માટે બોલાવીને તેમના નિવેદનો નોંધ્યા છે. આ તપાસમાં સાવરકુંડલા વનવિભાગના આઉટ સોર્સ ટ્રેકર્સની પણ પૂછપરછ કરવામાં આવી છે અને તેમનું નિવેદન લેવામાં આવ્યું છે.
વનવિભાગની કડક કાર્યવાહી
સિંહની પજવણી અને સુરક્ષાના ભંગ બદલ વનવિભાગ દ્વારા અત્યાર સુધીમાં અલગ-અલગ 5 જેટલા લોકોના નિવેદનો લેવામાં આવ્યા છે. સિંહ જેવા સંવેદનશીલ વન્યપ્રાણીઓની સુરક્ષા માટે વનવિભાગ અત્યંત ગંભીર છે. આ ઘટનાએ વન્યજીવ પ્રેમીઓમાં ભારે આક્રોશ જન્માવ્યો છે, ત્યારે આરોપીઓને કડકમાં કડક સજા થાય અને ભવિષ્યમાં આવી ગેરકાયદે પ્રવૃત્તિઓ અટકે તેવો પ્રયાસ તંત્ર દ્વારા કરવામાં આવી રહ્યો છે. તપાસના અંતે વધુ વિગતો બહાર આવવાની શક્યતા છે.
આ પણ વાંચોઃ Amreli: ખાંભામાં પોલીસની મોટી કાર્યવાહી, દેશી બનાવટની પિસ્ટલ સાથે મધ્યપ્રદેશના શખ્સને પકડ્યો
આ પણ વાંચોઃ Kheda: સિંહ હુમલામાં મોતને ભેટલા બાળકનો મૃતદેહ મોદજ ગામે લવાયો, કરાયા અંતિમ સંસ્કાર, પરિવારમાં ભારે આક્રંદ
