Amreli Rain news: અમરેલી જિલ્લામાં મેઘરાજાએ તોફાની બેટિંગ શરૂ કરતા જ ઠેર-ઠેર જળબંબાકાર જેવી સ્થિતિ સર્જાઈ છે. ખાસ કરીને રાજુલા, જાફરાબાદ, ખાંભા અને લીલીયા પંથકમાં અનરાધાર વરસાદને કારણે જનજીવન અસ્તવ્યસ્ત થઈ ગયું છે. ખાંભા અને રાજુલામાં 9 ઈંચ જેટલો વરસાદ ખાબકતા ખેતરો બેટમાં ફેરવાઈ ગયા છે અને નદી-નાળા ગાંડાતુર બન્યા છે.
જાફરાબાદ અને રાજુલામાં કપરી સ્થિતિ
જાફરાબાદના ધારાબંદર ગામની ચારે તરફ પાણી ફરી વળતા ગામ સંપૂર્ણ સંપર્ક વિહોણું બન્યું છે. ધારાસભ્ય હીરાભાઈ સોલંકીએ તાત્કાલિક ઘટનાસ્થળે પહોંચીને લોકોને સલામત સ્થળે ખસેડવાની કામગીરી હાથ ધરી હતી અને તેમના રહેવા-જમવાની વ્યવસ્થા કરી હતી. તેમણે લોકોને સલામત સ્થળે ખસી જવા અપીલ કરી છે. આ ઉપરાંત, રાજુલાના ચૌત્રા ગામનો બ્રિજ પાણીમાં ગરકાવ થતા સંપર્ક તૂટ્યો છે, જ્યારે પીપાવાવ પોર્ટ ફોરવે માર્ગ પર પાણી ભરાતા નાના વાહનોની અવરજવર બંધ કરવામાં આવી છે.
ડેમોમાંથી પાણીની છોડવામાં આવ્યું
ભારે વરસાદને પગલે રાજુલાનો ધાતરવડી-2 ડેમ ઓવરફ્લો થતા તેના 20 દરવાજા 0.90 મીટર ખોલી 52,220 ક્યુસેક પાણી નદીમાં છોડવામાં આવ્યું છે. આ સાથે ધાતરવડી-1 ડેમ પણ ઓવરફ્લો થવાની તૈયારીમાં છે. ખાખબાઈ, રાજુલા, હિંડોરણા, વડ, ભચાદર, ઉચૈયા, રામપરા-2 અને લોઠપુર સહિતના નીચાણવાળા ગામોને એલર્ટ કરવામાં આવ્યા છે. બીજી તરફ, ખાંભાનો રાયડી ડેમ પણ ઓવરફ્લો થતા તેના 2 દરવાજા 1 ફૂટ ખોલવામાં આવ્યા છે.
અન્ય સ્થળોએ નુકસાન
સાવરકુંડલાના ગિણિયામાં દીવાલ ધરાશાયી થતા એક મહિલા ગંભીર રીતે ઈજાગ્રસ્ત થયા છે. રાજુલા-સાવરકુંડલા હાઈવે પર થોરડી બાયપાસ પાસે પાણી ભરાતા વાહનવ્યવહાર બંધ કરાયો છે. જિલ્લા કલેક્ટરે પરિસ્થિતિને પહોંચી વળવા NDRFની ટીમને પણ સ્ટેન્ડબાય રાખી છે. તંત્ર દ્વારા નદી-નાળા અને વહેતા પાણીથી દૂર રહેવા લોકોને ખાસ સૂચના આપવામાં આવી છે.
આ પણ વાંચો: Kon Banshe Gujarat No Genius: સુરતના ધોરણ 10 ના વિદ્યાર્થી દીપ ખૂંટએ ડિજિટલ દંગલ પાર કર્યું, આગામી રાઉન્ડમાં એન્ટ્રી
