Amreli: શેડુભારમાં રેલવે કામગીરી બાદ ખેડૂતો પરેશાન, તંત્ર સામે ભારે રોષ, જાણો શું કરી રહ્યા છે માગ?

વાવણીનો સમય નજીક, પણ ખેતર સુધી પહોંચવું મુશ્કેલ

ખેડૂતોનું કહેવું છે કે વરસાદ બાદ વાવણીનો સમય આવી ગયો છે, પરંતુ રસ્તા પર બે થી ત્રણ ફૂટ સુધી કાંપ જમા થઈ ગયો છે. જેના કારણે ટ્રેક્ટર (Tractor), સનેડા  કે અન્ય ખેતીના સાધનો ખેતર સુધી પહોંચી શકતા નથી. આ સમસ્યાને કારણે ખેડૂતો સમયસર પાકની વાવણી પણ કરી શક્યા નથી, જેથી તેમને આર્થિક નુકસાનનો ડર સતાવી રહ્યો છે. જોકે ગ્રામ પંચાયત દ્વારા જેસીબી (JCB) મશીનથી કામચલાઉ સફાઈ કરવામાં આવી હતી, પરંતુ તે પૂરતી નથી.

સ્થાયી ઉકેલ માટે સીસી રોડની માગ

શેડુભારથી જરખીયા (Jarkhiya) સુધીનો સાડા સાત થી આઠ કિલોમીટર લાંબો આ રસ્તો વર્ષો પહેલા એસ.ટી. બસ (ST Bus) માટે પણ ઉપયોગમાં લેવાતો હતો. આ રસ્તો હજારો વિઘા ખેતીની જમીન માટે જીવનદોરી સમાન છે. ખેડૂતોની માગ છે કે રેલવે વિભાગ આ રસ્તાને કાયમી ધોરણે સીસી રોડ તરીકે વિકસાવે, જેથી વારંવારની કાંપની સમસ્યામાંથી છુટકારો મળી શકે. અનેકવાર રજૂઆતો કરવા છતાં રેલવે વિભાગે માત્ર અમુક સ્થળોએ કામ કરી સંતોષ માન્યો છે, જેનાથી ખેડૂતોમાં વ્યાપક રોષ જોવા મળી રહ્યો છે. જો આગામી દિવસોમાં રસ્તાનું યોગ્ય મેટલિંગ (Metalling) કે સમારકામ નહીં કરવામાં આવે, તો ખેડૂતો આંદોલન કરવાની ચીમકી ઉચ્ચારી રહ્યા છે.

આ પણ વાંચોઃ Amreli જિલ્લામાં વરસાદનું રેડ એલર્ટ, જાફરાબાદ બંદર પર 3 નંબરનું સિગ્નલ