Amreli: પાણીના ધસમતાં પ્રવાહમાં એક વ્યક્તિ તણાઈ જતાં મોત , સમગ્ર પંથકમાં શોકનું મોજું

અચાનક આવેલા પાણીના પ્રવાહમાં શરદભાઈ તણાયા

પ્રાપ્ત વિગતો અનુસાર, ખોડિયાર ડેમના 9 દરવાજા ખોલવામાં આવતા નદીના પટમાં અચાનક પાણીનો ધસમસતો પ્રવાહ (Flash Flood) આવી ગયો હતો. આ સમયે સરંભડા (Sarambhada) ગામની નદીના પટમાં રહેલા શરદભાઈ મગનભાઈ કાછડીયા આ પાણીના પ્રવાહમાં ફસાઈ ગયા હતા અને તણાઈ ગયા હતા. આ દુર્ઘટના ગઈકાલે રાત્રે આશરે 8 વાગ્યાની આસપાસ બની હોવાનું જાણવા મળ્યું છે.

પરિવારમાં ભારે દુઃખ

ઘટનાની જાણ થતા જ સ્થાનિક તંત્ર અને ગ્રામજનો દ્વારા શોધખોળ હાથ ધરવામાં આવી હતી. આખરે આજે સવારે 9 વાગ્યાના સવારે નદીના પટમાંથી શરદભાઈનો મૃતદેહ મળી આવ્યો હતો. જે બાદ અમરેલીની હોસ્પિટલમાં મૃતદેહને ખસેડવામાં આવ્યો હતો.  આ દુર્ઘટના અંગે તાલુકા પંચાયતના સદસ્ય રાજુભાઈ કાછડીયાએ માહિતી આપતા જણાવ્યું હતું કે, ડેમમાંથી પાણી છોડવાને કારણે આવેલ અચાનક પૂરના કારણે આ કમનસીબ ઘટના બની છે. શરદભાઈના નિધનના સમાચાર મળતા જ સમગ્ર સરંભડા ગામમાં શોકનો માહોલ છવાઈ ગયો છે. પરિવારજનો પર દુઃખનું આભ ફાટી પડ્યું છે. હાલ વહીવટી તંત્ર દ્વારા સ્થિતિ પર નજર રાખવામાં આવી રહી છે.

આ પણ વાંચોઃ Amreli: શેડુભારમાં રેલવે કામગીરી બાદ ખેડૂતો પરેશાન, તંત્ર સામે ભારે રોષ, જાણો શું કરી રહ્યા છે માગ?