Amreli: ચતુરી ગામે સિંહ હુમલામાં બાળક ગુમાવનાર પરિવારને મળ્યા વનમંત્રી, જાણો ગ્રામજનોએ શું કરી માગ?

 વન વિભાગ સામે સવાલો

ચતુરી ગામની બજારોમાં આજે લોકોનો આક્રોશ સ્પષ્ટપણે જોવા મળ્યો હતો. ગ્રામજનોએ વન વિભાગની કામગીરી પર ગંભીર સવાલો ઉઠાવતા લેખિત રજૂઆત કરી હતી. મુખ્ય માગણી મુજબ રેવન્યુ વિસ્તારમાં ફરી રહેલા સિંહ અને દીપડાઓને તાત્કાલિક અસરથી જંગલ વિસ્તારમાં ખસેડવા માટે 'સ્પેશિયલ ઓપરેશન' (Special Operation) શરૂ કરવા પર ભાર મૂકવામાં આવ્યો હતો.

માલધારી અને ખેડૂતોની સુરક્ષા માટે માગ

સ્થાનિક માલધારીઓએ મંત્રી સમક્ષ પોતાની સુરક્ષા માટે કેટલીક મહત્વપૂર્ણ માગણીઓ મૂકી હતી. જેમાં ગીર જંગલની અંદર પશુઓ ચરાવવાની છૂટ આપવી અને ખેતી તેમજ પશુપાલન માટે જંગલ વિસ્તારમાં જતા લોકોને સ્વ-રક્ષણ માટે લાકડી કે કુહાડી જેવા સાધનો રાખવાની મંજૂરી આપવાની વાત મુખ્ય હતી. પોતાની આજીવિકા અને જીવના જોખમ વચ્ચે જીવી રહેલા લોકોની રજૂઆત સાંભળીને વનમંત્રી અને અધિકારીઓ પણ ગંભીર બન્યા હતા.

વનમંત્રીએ નવી SOP બનાવવા વચન આપ્યું

વનમંત્રી અર્જુનભાઈ મોઢવાડિયાએ આ ઘટનાને અસ્વાભાવિક ગણાવતા કહ્યું હતું કે, "સિંહ સામાન્ય રીતે માનવી પર હુમલો કરતા નથી, પરંતુ આ ઘટના ગંભીર છે." તેમણે આશ્વાસન આપ્યું હતું કે સિંહોના બદલાતા સ્વભાવ (Behavioral Change) પર ઊંડો અભ્યાસ કરવામાં આવશે. ભવિષ્યમાં આવી દુખદ ઘટનાઓ ન ઘટે તે માટે સરકાર ટૂંકાગાળાના અને લાંબાગાળાના નક્કર પગલાં લેશે. મંત્રીએ ખાતરી આપી હતી કે જનતાની સુરક્ષા સર્વોપરી છે અને આ સમસ્યાના કાયમી ઉકેલ માટે નવી એસ.ઓ.પી. (SOP) તૈયાર કરવામાં આવશે.

 આ પણ વાંચોઃDholera: વન મંત્રી અર્જુનભાઈ મોઢવાડિયાએ ડ્રમ પ્લાન્ટેશનનું કર્યું નિરીક્ષણ, ગ્રીનરી વધારવા આપ્યું માર્ગદર્શન