Amreli જિલ્લામાં વરસાદનું રેડ એલર્ટ, જાફરાબાદ બંદર પર 3 નંબરનું સિગ્નલ

જાફરાબાદ બંદર પર  3 નંબરનું સિગ્નલ

ઐતિહાસિક જાફરાબાદ (Jafarabad) બંદર પર પરિસ્થિતિની ગંભીરતાને જોતા તંત્ર દ્વારા 3 નંબરનું સિગ્નલ લગાવી દેવામાં આવ્યું છે. દરિયામાં સતત વધી રહેલા કરંટ અને હાઈટાઈડ જેવી સ્થિતિને લઈને સ્થાનિક રહીશોમાં ચિંતાનું મોજું ફરી વળ્યું છે. દરિયાઈ પટ્ટી પર પવનની ગતિમાં નોંધપાત્ર વધારો થયો છે અને સમુદ્રમાં ઊંચા મોજા ઉછળી રહ્યા છે, જે કોઈ પણ અણધારી આફત તરફ ઈશારો કરી રહ્યા છે.

અણધારી આફતને પહોંચી વળવા તંત્ર દ્વારા આગોતરા પગલાં

આ સંજોગોને ધ્યાનમાં રાખીને તંત્ર દ્વારા માછીમારોને દરિયો ન ખેડવા માટે કડક સૂચના આપવામાં આવી છે. દરિયાકાંઠાના ગામડાઓને પણ સતર્ક (Alert) કરી દેવામાં આવ્યા છે. વહીવટી તંત્ર પળેપળની સ્થિતિ પર બાજ નજર રાખી રહ્યું છે અને આગામી કલાકોમાં વરસાદનું જોર વધવાની શક્યતા વચ્ચે તંત્ર દ્વારા તમામ આગોતરા પગલાં લેવામાં આવ્યા છે. નાગરિકોને પણ દરિયાકિનારાથી દૂર રહેવા અને તંત્રની સૂચનાઓનું પાલન કરવા અનુરોધ કરવામાં આવ્યો છે.

3 નંબરનું સિગ્નલ એટલે શું?

દરિયાઈ વિસ્તારોમાં '૩ નંબરનું સિગ્નલ' (Signal Number 3) એ સ્થાનિક સ્તરે સર્જાતા તોફાની હવામાન (Local Disturbance) ની ગંભીર ચેતવણી છે. જ્યારે બંદરની આસપાસ પવનની ગતિ સામાન્ય કરતાં વધી જાય અને સમુદ્રમાં અશાંતિ વ્યાપે, ત્યારે વહીવટી તંત્ર દ્વારા આ સિગ્નલ લગાવાય છે. આનો મુખ્ય ઉદ્દેશ્ય માછીમારોને દરિયો ન ખેડવા અને સુરક્ષિત રહેવા સાવધ કરવાનો છે. તે કોઈ મોટા વાવાઝોડાની આગાહી નથી, પરંતુ દરિયાઈ જોખમ ટાળવા માટે તંત્ર દ્વારા લેવામાં આવતું એક અત્યંત મહત્વનું સાવચેતીનું પગલું છે, જે જાન-માલની સુરક્ષા માટે ખૂબ જરૂરી છે.

આ પણ વાંચોઃ Banaskanth: ધાનેરામાં અનરાધાર વરસાદ, પ્રિ-મોન્સૂન કામગીરીની પોલ ખુલી