Amreli: કલેક્ટર કચેરીને બોમ્બથી ઉડાવી દેવાની ધમકી, તંત્રમાં મચી દોડધામ

પત્ર મળતા જ પોલીસ તંત્ર સક્રિય

કલેક્ટર કચેરીમાં જ્યારે આ નનામો ધમકીભર્યો પત્ર (Threatening Letter) મળી આવ્યો, ત્યારે તાત્કાલિક ઉચ્ચ અધિકારીઓને જાણ કરવામાં આવી હતી. ધમકીની ગંભીરતાને ધ્યાનમાં રાખીને અમરેલી પોલીસ તંત્ર (Police Department) હરકતમાં આવ્યું છે. જિલ્લાના સુરક્ષા દળોએ તાત્કાલિક કલેક્ટર કચેરીમાં તપાસ હાથ ધરી છે.

પોલીસની વિવિધ ટીમો દ્વારા તપાસ

સુરક્ષાના ભાગરૂપે SOG, LCB, ડોગ સ્ક્વોડ  અને બોમ્બ સ્કોડની ટીમો ઘટનાસ્થળે પહોંચી છે. અધિકારીઓએ સમગ્ર કલેક્ટર કચેરીમાં સઘન ચેકિંગ (Intensive Searching) હાથ ધર્યું છે અને દરેક ખૂણાની તપાસ કરવામાં આવી છે. જોકે, તપાસ દરમિયાન કોઈ શંકાસ્પદ વસ્તુ મળી આવી નથી.

તપાસનો વ્યાપ વધારાયો

પ્રાથમિક તપાસમાં બહાર આવ્યું છે કે આ ધમકીભર્યો પત્ર પોસ્ટ મારફતે આવ્યો છે. જેથી પોલીસની તપાસ હવે પોસ્ટ ઓફિસ (Post Office) સુધી પહોંચી છે. પત્ર કયા વિસ્તારમાંથી પોસ્ટ કરવામાં આવ્યો અને તેને મોકલનાર કોણ છે, તે અંગે તપાસ તેજ કરવામાં આવી છે.