Anand Visa Fraud Case: ચરોતરમાં વિઝા કૌભાંડ, નેધરલેન્ડ મોકલવાના નામે 6 યુવાનો સાથે 10.56 લાખની છેતરપિંડી

નેધરલેન્ડ મોકલવાના નામે 10.56 લાખ રૂપિયા પડાવ્યા

મળતી વિગતો અનુસાર, આણંદ જિલ્લાના ચરોતરમાં રહેતા માલવ ભુપેશ પટેલ (Malav Bhupesh Patel) નામના યુવાને ખંભાત પોલીસ સ્ટેશન (Khambhat Police Station) માં આ અંગે વિધિવત ફરિયાદ (FIR) નોંધાવી છે. ફરિયાદમાં જણાવ્યા મુજબ, માલવ પટેલ અને તેના અન્ય 5 મિત્રો સહિત કુલ 6 યુવાનોને નેધરલેન્ડ (Netherlands) મોકલવાની લાલચ આપવામાં આવી હતી. આરોપીઓએ આ યુવાનોને વર્ક વિઝા (Work Visa) અપાવવાનો ભરોસો આપ્યો હતો. આ વિઝા પ્રોસેસના પેટે આરોપીઓએ યુવાનો પાસેથી ટુકડે-ટુકડે કુલ 10.56 લાખ રૂપિયાની મોટી રકમ પડાવી લીધી હતી. જો કે, લાંબો સમય વીતી જવા છતાં યુવાનોને વિઝા મળ્યા ન હતા.

ભાજપ યુવા મોરચાના પ્રમુખ અને મંત્રી સામે પોલીસ ફરિયાદ

આ હાઈપ્રોફાઈલ છેતરપિંડી કેસમાં સત્તાધારી પક્ષના હોદ્દેદારોના નામ સામે આવતા ચકચાર મચી ગઈ છે. પોલીસે આ કેસમાં આણંદ જિલ્લા ભાજપ યુવા મોરચાના પ્રમુખ હિરેનગીરી ગોસ્વામી (Hirengiri Goswami) સામે ગુનો દાખલ કર્યો છે. આ ઉપરાંત, ખંભાત ભાજપ યુવા મોરચાના મંત્રી ચિરાગ ડોડીયા (Chirag Dodiya) સામે પણ પોલીસ ચોપડે ગુનો દાખલ કરાયો છે. આ બંને નેતાઓ ઉપરાંત વિઝાની મુખ્ય પ્રોસેસ કરનાર એજન્ટ દિવ્યેશ પટેલ (Divyesh Patel) સામે પણ છેતરપિંડી અને વિશ્વાસઘાતની કલમો હેઠળ ગુનો નોંધી આગળની તપાસ હાથ ધરવામાં આવી છે.

રૂપિયા કે વિઝા ન મળતા ભોગ બનનારે ન્યાયની ગુહાર લગાવી

ભોગ બનનાર માલવ ભુપેશ પટેલ (Malav Bhupesh Patel) અને તેના મિત્રોએ જ્યારે પોતાના વિઝા અંગે પૂછપરછ કરી, ત્યારે આરોપીઓ દ્વારા ગોળ-ગોળ જવાબો આપવામાં આવતા હતા. યુવાનોએ જ્યારે પોતાના વિઝા ન મળતા આપેલા 10.56 લાખ રૂપિયા પરત માંગ્યા, ત્યારે આરોપીઓએ નાણાં આપવાનો સ્પષ્ટ ઈનકાર કરી દીધો હતો.

આખરે વિદેશ જવાનું સપનું રોળાઈ જતાં અને પોતાની મહેનતની કમાણી ડૂબી જતાં માલવ પટેલે પોલીસનો આશરો લીધો હતો. હાલમાં પોલીસે ત્રણેય આરોપીઓ સામે કાયદેસરની કાર્યવાહી શરૂ કરી છે. રાજકીય વગ ધરાવતા નેતાઓના નામ ખુલતા આ કેસમાં પોલીસ પર કોઈ દબાણ આવે છે કે કેમ તે જોવું રહ્યું.

આ પણ વાંચો : પ્રેમિકાના હત્યારાને બચાવવા નકલી ખેલ, ગુજરાત હાઈકોર્ટે પકડી પાડી મહિલા વકીલની ચોરી, જાણો શું છે આખો મામલો