Aravalli News: અરવલ્લીમાં આંગણવાડીના પોષણક્ષમ આહારની હેરાફેરીનું રેકેટ ઝડપાયું, મોડાસા રૂરલ પોલીસની મોટી કાર્યવાહી

Aravalli માં સરકારી આહાર કૌભાંડ

પ્રાપ્ત વિગતો અનુસાર, મોડાસાના માલપુર રોડ પરથી પોલીસ દ્વારા શંકાસ્પદ પીકઅપ ગાડીને અટકાવવામાં આવી હતી. તપાસ દરમિયાન આ ગાડીમાંથી સરકારી 'બાલશક્તિ' બ્રાન્ડ લખેલા પોષણક્ષમ આહારના આશરે ૩૦૦ જેટલા કટ્ટા (કોથળા) મળી આવ્યા હતા. આ જથ્થાની આંતરજિલ્લા હેરાફેરી માટે ડ્રાઇવર કે અન્ય કોઈ પાસે કોઈપણ પ્રકારના અધિકૃત આધાર-પુરાવા કે દસ્તાવેજો મળી આવ્યા ન હતા, જેના આધારે પોલીસે જથ્થા સાથેની ગાડીને જપ્ત કરીને આગળની કાયદેસરની કાર્યવાહી હાથ ધરી છે.

અગાઉ પણ પ્રાંતિજમાંથી ઝડપાયો હતો જથ્થો

અગાઉ પણ પ્રાંતિજ વિસ્તારમાંથી આ જ પ્રકારે આંગણવાડીના પોષણક્ષમ આહારની હેરાફેરીનો જથ્થો પકડાયો હતો, જેના કારણે આ પ્રકારની હેરાફેરીમાં એક મોટું નેટવર્ક કામ કરી રહ્યું હોવાની આશંકા સેવાઈ રહી છે. બાળકોના હકના આહારને બજારમાં વેચવાના આ કૌભાંડે સ્થાનિક તંત્રની કામગીરી સામે પણ સવાલો ઉભા કર્યા છે. હાલ પોલીસ આ જથ્થો કોણે મોકલ્યો હતો અને ક્યાં લઈ જવામાં આવી રહ્યો હતો, તે દિશામાં તપાસ તેજ કરી છે.

આ પણ વાંચો:  Ahmedabad News: Ambuja Cements અને Leilac ની ભાગીદારી, ગુજરાતમાં બનશે વિશ્વનો સૌથી મોટો લો-કાર્બન સિમેન્ટ પ્લાન્ટ