Fact Check: શામળાજી-રતનપુર બોર્ડર પાસે પ્લેન ક્રેશ અફવા! શું છે વાયરલ વીડિયોનું સત્ય? જાણો અહીં

શામળાજી-રતનપુર બોર્ડર પર પ્લેન ક્રેશનો ફેક વીડિયો વાયરલ

'બાબા બ્લેક સેવન' નામની આઈડી પરથી પોસ્ટ કરવામાં આવેલા આ વીડિયોમાં વિમાન દુર્ઘટનાના આબેહૂબ અને ડરામણા દ્રશ્યો જોવા મળતા લોકોમાં ભારે ફફડાટ વ્યાપી ગયો હતો. આ ફેક વીડિયોને અત્યાર સુધીમાં 8 લાખથી વધુ લોકો જોઈ ચૂક્યા છે, જેને કારણે સામાન્ય નાગરિકોમાં ગભરાટ અને ભયનો માહોલ સર્જાયો હતો.

સોશિયલ મીડિયા પર અફવાઓનો અતિરેક

 જ્યારે આ વીડિયોની પ્રાથમિક તપાસ કરવામાં આવી ત્યારે તે સંપૂર્ણપણે બનાવટી હોવાનું સાબિત થયું હતું. સોશિયલ મીડિયા પર વધુ વ્યૂઝ, લાઈક્સ અને ફોલોઅર્સ મેળવવાની લાલચમાં કેટલાક લોકો હવે AI ટૂલ્સનો દુરુપયોગ કરી ભ્રામક અને અફવા ફેલાવતી સામગ્રી બનાવી રહ્યા છે. આ ઘટનાએ ફરી એકવાર સાબિત કર્યું છે કે ડિજિટલ યુગમાં લોકોની લાગણીઓ અને તેમની સુરક્ષા સાથે ચેડાં કરવાનું વલણ વધતું જઈ રહ્યું છે.

લોકોમાં ભયનો માહોલ

આવી ગંભીર દુર્ઘટનાના નામે ફેક વીડિયો ફેલાવવાને કારણે આસપાસના વિસ્તારમાં અને સોશિયલ મીડિયા વપરાશકર્તાઓમાં ભય અને ગભરાટ ફેલાયો હતો. આ વીડિયો વાયરલ થયા બાદ સોશિયલ મીડિયા પર આક્રોશ જોવા મળી રહ્યો છે અને લોકો આ પ્રકારના ફેક કન્ટેન્ટ બનાવનારા તત્વો સામે કાયદેસરની કડક કાર્યવાહી કરવાની માંગ કરી રહ્યા છે.

શું કહે છે કાયદો?

કોઈપણ વ્યક્તિ કે સંસ્થા દ્વારા અફવા ફેલાવવી અથવા લોકોને ગેરમાર્ગે દોરવા તે કાયદેસરનો ગુનો છે. આ પ્રકારના ફેક વીડિયો બનાવીને સોશિયલ મીડિયા પર મૂકવા બદલ આઈટી એક્ટ હેઠળ કડક કાર્યવાહીની માંગ ઉઠી છે. લોકોએ પણ કોઈ પણ વીડિયો કે માહિતીને સત્યતા તપાસ્યા વિના શેર કરવાનું ટાળવું જોઈએ.

આ પણ વાંચો:  Ahmedabad traffic police News: અમદાવાદમાં ટ્રાફિક પોલીસનો 'તોડપાણી' નો વીડિયો વાયરલ, 300 રૂપિયાની કટકી લેતા કેમેરામાં કેદ!