Auto News : મલેશિયામાં ચીનની જાણીતી કાર ઉત્પાદક કંપની ચેરી ઓટો (Chery Auto)ની Omoda 5 SUV સાથે ચોંકાવનારી ઘટના બની છે. રસ્તા પર દોડતી કારનું પાછળનું એક્સલ (Rear Axle) અને બંને પૈડાં અચાનક અલગ પડી ગયાં હતાં. આ ઘટનાની તસવીરો અને વીડિયો સોશિયલ મીડિયા પર વાયરલ થતાં કારની સુરક્ષા (Car Safety) અને ગુણવત્તા અંગે ગંભીર સવાલો ઊઠ્યા છે.
ચાલતી કારનું આખું એક્સલ અલગ પડ્યું
મલેશિયાના જોહોર બાહરુ (Johor Bahru)માં 6 ઓક્ટોબર, 2026ના રોજ આ ઘટના બની હતી. જાલાન પંડન રોડ પર AEON Mall નજીક કાળા રંગની Chery Omoda 5 SUVનું પાછળનું સસ્પેન્શન (Rear Suspension) સંપૂર્ણપણે અલગ થઈ ગયું હતું. ઘટનાસ્થળની તસવીરોમાં કાર રસ્તા પર ઊભેલી અને પાછળનાં બંને પૈડાં એક્સલ સાથે અલગ પડેલાં જોવા મળ્યાં હતાં. સદનસીબે આ ઘટનામાં કોઈને ઈજા થયાના અહેવાલ નથી.
અગાઉ પણ સામે આવી હતી આવી ખામી
મહત્ત્વની વાત એ છે કે વર્ષ 2024માં પણ મલેશિયામાં આ જ મોડલની કારનું પાછળનું એક્સલ તૂટી ગયું હતું. ત્યારબાદ કંપનીએ 600 વાહનો માટે સુરક્ષા તપાસ અભિયાન શરૂ કર્યું હતું. તે સમયે વેલ્ડિંગ પ્રક્રિયામાં ખામી (Welding Defect) હોવાનું સામે આવ્યું હતું. જોકે, તાજેતરની ઘટનાનું કારણ પણ એ જ છે કે નહીં તે હજુ સ્પષ્ટ થયું નથી.
સરકારે નવા રજિસ્ટ્રેશન અટકાવ્યાં
આ ઘટનાને ગંભીરતાથી લેતાં મલેશિયાના રોડ ટ્રાન્સપોર્ટ ડિપાર્ટમેન્ટ (JPJ)એ સંબંધિત મોડલ અને વેરિઅન્ટ માટે નવા વાહનોના રજિસ્ટ્રેશન પર અસ્થાયી રોક લગાવી છે. સાથે કંપનીને ટેક્નિકલ તપાસ અને સંભવિત ખામીવાળા વાહનોની ઓળખ કરવા સૂચના આપવામાં આવી છે. બીજી તરફ, ચેરી ઓટો ભારતમાં પ્રવેશ કરવાની સંભાવનાઓ ચકાસી રહી હોવાના અહેવાલો છે. આવી સ્થિતિમાં મલેશિયાની આ ઘટનાએ કંપનીની કારની વિશ્વસનીયતા અને સુરક્ષા ધોરણોને લઈને નવી ચર્ચા જગાવી છે.
આ પણ વાંચો : WhatsApp માં આવ્યું AI Writing Help ફીચર, હવે મેસેજ લખવા બનશે પહેલાં કરતાં સરળ