ટાટા મોટર્સ માર્કેટ લીડર તરીકે યથાવત

જૂન 2026માં પણ ટાટા મોટર્સ (Tata Motors) ભારતીય ઇલેક્ટ્રિક કાર માર્કેટમાં ટોચના સ્થાને રહી છે. કંપનીએ જૂન મહિનામાં 12,187 ઇલેક્ટ્રિક કાર વેચીને 38.30% માર્કેટ શેર (Market share) પોતાના નામે કર્યો છે. ગયા વર્ષના જૂનની સરખામણીમાં ટાટાના વેચાણમાં 126.73% નો વધારો થયો છે, જ્યારે મે 2026 ની સરખામણીએ કંપનીનું વેચાણ લગભગ 18% વધ્યું છે.

મહિન્દ્રા બીજા અને MG ત્રીજા સ્થાને (Indian EV Market Report)

મહિન્દ્રા એન્ડ મહિન્દ્રા (Mahindra): કંપની 7,766 ઇલેક્ટ્રિક કારના વેચાણ સાથે બીજા ક્રમે રહી છે. મહિન્દ્રાએ વાર્ષિક ધોરણે 121.06% અને મે 2026 ની સરખામણીએ 25.06% નો ગ્રોથ મેળવ્યો છે. કંપનીનો માર્કેટ શેર 24.40% રહ્યો છે, જેમાં તેની 'બોર્ન ઇલેક્ટ્રિક' (Born Electric) સિરીઝનો મોટો ફાળો છે.

જેએસડબલ્યુ એમજી મોટર (JSW MG Motor): 5,861 ઇલેક્ટ્રિક કાર વેચીને કંપની ત્રીજા સ્થાને છે. એમજી મોટરે વાર્ષિક 24.94% અને માસિક 17.60% નો વધારો નોંધાવ્યો છે, જ્યારે તેનો માર્કેટ શેર 18.42% રહ્યો છે.

મારુતિ સુઝુકી ચોથા ક્રમે અને વિનફાસ્ટની એન્ટ્રી

દેશની સૌથી મોટી કાર નિર્માતા મારુતિ સુઝુકી (Maruti Suzuki) 1,919 ઇલેક્ટ્રિક કારના વેચાણ સાથે ચોથા ક્રમે રહી છે. કંપનીની 'eVitara' લોન્ચ થયા પછી EV સેગમેન્ટમાં આ તેનું પ્રથમ સંપૂર્ણ વર્ષ માનવામાં આવી રહ્યું છે. વળી, વિયેતનામની કંપની વિનફાસ્ટ (VinFast) પણ ભારતમાં ઝડપથી પગપેસારો કરી રહી છે, જેણે જૂનમાં 1,404 કાર વેચી છે.

અન્ય વૈશ્વિક બ્રાન્ડ્સનું પ્રદર્શન

ગ્રાહકોમાં પ્રીમિયમ અને લક્ઝરી ઇલેક્ટ્રિક કારોની ડિમાન્ડ પણ જોવા મળી છે. જૂન મહિનાના અન્ય કંપનીઓના વેચાણના આંકડા નીચે મુજબ છે:

• BYD: 873 યુનિટ્સ
• BMW: 497 યુનિટ્સ
• Kia: 449 યુનિટ્સ
• Hyundai: 352 યુનિટ્સ
• Mercedes-Benz: 234 યુનિટ્સ
• Volvo: 37 યુનિટ્સ

ટેસ્લા અને ટોયોટાએ પણ નોંધાવી હાજરી

અમેરિકન ઇલેક્ટ્રિક કાર કંપની ટેસ્લા (Tesla) એ ભારતમાં તેની 'Model Y SUV' ની 37 યુનિટ્સનું રિટેલ વેચાણ કર્યું છે. જ્યારે જાપાનીઝ કંપની ટોયોટા (Toyota) એ પોતાની નવી ઇલેક્ટ્રિક કાર 'Urban Cruiser Ebella' લોન્ચ કર્યા પછી પ્રથમ વખત આ લિસ્ટમાં 32 યુનિટ્સ સાથે એન્ટ્રી કરી છે. આ સિવાય સિટ્રોન (Citroen) કંપનીએ 24 ઇલેક્ટ્રિક કાર વેચી છે, જ્યારે અન્ય બ્રાન્ડ્સનું કુલ વેચાણ 151 યુનિટ્સ રહ્યું છે.

આ પણ વાંચો : Electric Car Conversion : મોંઘી ઇલેક્ટ્રિક કાર ખરીદવાનું ટેન્શન ખતમ! અડધા ખર્ચમાં જૂની કારને જ EV માં કન્વર્ટ કરો