3 વ્યક્તિઓ શંકાસ્પદ જણાતા તપાસ કરાઈ

મળતી વિગતો અનુસાર, આબુરોડ રીકો પોલીસ મથકનો સ્ટાફ માવલ ચોકી પાસે વાહનોનું સઘન ચેકિંગ કરી રહ્યો હતો. આ દરમિયાન પુણેથી જોધપુર જતી લક્ઝરી બસને તપાસ અર્થે રોકવામાં આવી હતી. બસમાં સવાર મુસાફરોની પૂછપરછ અને તેમની પાસે રહેલા સામાનની તલાશી લેતા ત્રણ વ્યક્તિઓ શંકાસ્પદ જણાતા તેમની પાસે રહેલા થેલાની તપાસ કરવામાં આવી હતી. તપાસ દરમિયાન તેમાંથી કિંમતી સોના અને ચાંદીના દાગીનાનો મોટો જથ્થો મળી આવતા પોલીસ પણ ચોંકી ઉઠી હતી.

 દસ્તાવેજ વિનાના સોના-ચાંદીના દાગીના મળ્યા

પોલીસે જ્યારે આ દાગીના અંગે તેની માલિકીના પુરાવા કે ખરીદીના બિલ અથવા કોઈ પણ પ્રકારના કાયદેસરના દસ્તાવેજો માંગ્યા, ત્યારે આ ત્રણેય મુસાફરો કોઈ સંતોષકારક જવાબ આપી શક્યા ન હતા કે ન તો કોઈ માન્ય દસ્તાવેજ રજૂ કરી શક્યા હતા. દાગીનાના વજનની ગણતરી કરતા તેમાંથી અંદાજે 2.8 કિલો સોનું અને 800 ગ્રામ ચાંદી હોવાનું સામે આવ્યું છે. બજાર કિંમત અનુસાર આ જપ્ત કરાયેલા મુદ્દામાલની અંદાજિત કિંમત આશરે 4 કરોડ રૂપિયા જેટલી થવા જાય છે.

પોલીસે સમગ્ર મામલે વધુ તપાસ હાથ ધદરી

આ ગેરકાયદેસર હેરફેર મામલે પોલીસે બસમાં મુસાફરી કરી રહેલા રમેશકુમાર પ્રજાપત, ગજેન્દ્રસિંહ રાજપૂત અને ચંદુલાલ સૈન નામના ત્રણ આરોપીની ઓળખ કરીને તેમની અટકાયત કરી છે. કાયદેસરના દસ્તાવેજોના અભાવે પોલીસે ભારતીય નાગરિક સુરક્ષા સંહિતા (BNSS) ની કલમ 106 હેઠળ તમામ દાગીના જપ્ત કરવાની કાયદેસરની કાર્યવાહી કરી છે. પોલીસ હવે એ દિશામાં તપાસ કરી રહી છે કે આટલી મોટી માત્રામાં સોનું ક્યાંથી લાવવામાં આવ્યું હતું અને તેનો ઉપયોગ હવાલા નેટવર્ક કે અન્ય કોઈ ગેરકાયદેસર પ્રવૃત્તિઓ માટે થવાનો હતો કે કેમ.

આ પણ વાંંચોઃ સિરોહીના ગિરવર ગામે યુવકના શંકાસ્પદ મોત બાદ ભારે હંગામો, આખું ગામ આરોપીના ઘર પર તૂટી પડ્યું!