Banaskantha Accident: બે વાહનો વચ્ચે અકસ્માત સર્જાતાં બસ સ્ટેન્ડ ભોય ભેગું થયું, 1 વિદ્યાર્થીનો જીવ ગયો, કેટલાંક લોકો દટાયા

અકસ્માતમાં માસૂમ વિદ્યાર્થીએ ગુમાવ્યો જીવ

મળતી માહિતી અનુસાર, જ્યારે આ અકસ્માત સર્જાયો ત્યારે બસ સ્ટેન્ડની અંદર એક વિદ્યાર્થી બેઠો હતો. જીપ સીધી બસ સ્ટેન્ડમાં ઘૂસી જતાં અને બસ સ્ટેન્ડનો કાટમાળ માથે પડતાં ગંભીર ઇજાઓ થવાને કારણે આ માસૂમ વિદ્યાર્થીનું ઘટનાસ્થળે જ કમકમાટીભર્યું મોત નીપજ્યું હતું. આ ઘટનાને પગલે સમગ્ર પંથકમાં અરેરાટી વ્યાપી ગઈ છે અને મૃતક વિદ્યાર્થીના પરિવારમાં ભારે આક્રંદ જોવા મળી રહ્યો છે.

બસ સ્ટેન્ડની છત નીચે દટાયા 6 થી 7 લોકો

અકસ્માતની તીવ્રતા એટલી વધારે હતી કે જીપ અથડાતાની સાથે જ બસ સ્ટેન્ડની મજબૂત છત ધડાકાભેર જીપની ઉપર જ તૂટી પડી હતી. છત તૂટી પડવાના કારણે જીપમાં સવાર લોકો તેમજ આસપાસ ઉભેલા આશરે 6 થી 7 જેટલા લોકો કાટમાળ નીચે દટાઈ ગયા હતા. ઘટનાને પગલે આસપાસના સ્થાનિક લોકો તાત્કાલિક બચાવ કામગીરી માટે દોડી આવ્યા હતા અને કાટમાળ નીચે દટાયેલા લોકોને બહાર કાઢવાની તજવીજ શરૂ કરી હતી.

ખુશીનો પ્રસંગ માતમમાં ફેરવાયો

કહેવાઈ છે કે જીપમાં સવાર પરિવાર એક લગ્ન પ્રસંગમાં હાજરી આપવા માટે જઈ રહ્યો હતો. પરિવારમાં લગ્નનો હરખ અને ખુશીનો માહોલ હતો, પરંતુ દાંતા નજીક કાળમુખા અકસ્માતે આ આખા પરિવારની ખુશીઓને માતમમાં ફેરવી નાખી છે. અકસ્માતની જાણ થતા જ પોલીસ કાફલો અને એમ્બ્યુલન્સની ટીમ ઘટનાસ્થળે દોડી આવી હતી. તમામ ઇજાગ્રસ્તોને તાત્કાલિક ધોરણે નજીકની હોસ્પિટલમાં સારવાર અર્થે ખસેડવામાં આવ્યા છે, જ્યાં અમુકની હાલત ગંભીર હોવાનું જાણવા મળી રહ્યું છે. પોલીસ દ્વારા આ મામલે ગુનો નોંધી આગળની કાયદેસરની કાર્યવાહી હાથ ધરવામાં આવી છે.

આ પણ વાંચોઃ Gujarat Latest News: દાંતા નજીક બે વાહનો વચ્ચે થયેલા અકસ્માતમાં બસ સ્ટેન્ડ તૂટી પડ્યું, વિદ્યાર્થીનું મોત, 6-7 લોકો દટાય