Banaskantha News: થ્રેસરમાં આવી જતાં ખેડૂતના બંને હાથ કપાઈ ગયા, પરિવારમાં ભારે આક્રંદ

મકાઈનું થ્રેસરિંગ કરતી વખતે બની ઘટના

મળતી વિગતો અનુસાર જોધસર ગામના રહેવાસી અને મહેનતુ યુવાન ખેડૂત બુમ્બડીયા શીવાભાઈ મેઘાભાઈ પોતાના ખેતરમાં મકાઈનો પાક લીધા બાદ તેનું થ્રેસરિંગ કરી રહ્યા હતા. ઉનાળુ પાકની લણણીની સીઝન હોવાથી ખેતરમાં મશીનરી વડે મકાઈના દાણા છૂટા પાડવાની કામગીરી પૂરજોશમાં ચાલી રહી હતી. આ દરમિયાન મકાઈ ડૂંડા મશીનમાં નાખતી વખતે અચાનક જ કાળમુખા થ્રેસર મશીને જોરદાર ઝાટકો માર્યો હતો અને પળવારમાં જ શીવાભાઈના બંને હાથ મશીનની અંદર આવી ગયા હતા. મશીનની ગતિ એટલી તીવ્ર હતી કે ખેડૂતને પોતાનો હાથ બહાર કાઢવાની તક જ મળી ન હતી.

પરિવારે કમાઉ સભ્ય ગુમાવ્યો

આ ભયાનક ઘટના બનતાં જ ખેતરમાં ચીસાચીસ થઈ ગઈ હતી. આસપાસથી દોડી આવેલા લોકોએ તાત્કાલિક મશીન બંધ કરીને લોહીલુહાણ હાલતમાં શીવાભાઈને બહાર કાઢ્યા હતા. જોકે, આ ગંભીર અકસ્માતમાં તેમણે પોતાના બંને હાથ ગુમાવી દીધા છે. ઘટનાને પગલે યુવાનને લોહીલુહાણ અને ગંભીર હાલતમાં તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા હતા, જ્યાં તબીબો દ્વારા તેમની સારવાર શરૂ કરવામાં આવી છે.

આ ઘટનાની સૌથી વધુ કરુણતા એ છે કે ભોગ બનનાર શીવાભાઈ પોતાના પરિવારના એકમાત્ર કમાનાર સભ્ય હતા. તેમના આ અકસ્માતને કારણે તેમના 6 વર્ષથી પણ નાની ઉંમરના માસૂમ બાળકો હવે એક પ્રકારે નોધારા બની ગયા છે. પિતાની આ ગંભીર સ્થિતિ જોઈને માસૂમ બાળકો અને પરિવારજનોના આક્રંદથી વાતાવરણ ગમગીન બની ગયું છે.

આ પણ વાંચોઃ સિરોહીના ગિરવર ગામે યુવકના શંકાસ્પદ મોત બાદ ભારે હંગામો, આખું ગામ આરોપીના ઘર પર તૂટી પડ્યું!