Banaskantha Crime News: બનાસકાંઠા જિલ્લામાંથી સોશિયલ મીડિયાના દુરુપયોગ અને ન્યૂ-એજ ક્રાઈમનો એક ચોંકાવનારો કિસ્સો સામે આવ્યો છે. સોશિયલ મીડિયા પર પોતાની ઓળખ બનાવીને લોકોને બ્લેકમેલ કરતા અને રીલ બનાવીને 'તોડ' કરતા સંજયસિંહ રાજપૂત નામના કથિત સોશિયલ મીડિયા ઇન્ફ્લુએન્સરને જિલ્લા લોકલ ક્રાઈમ બ્રાન્ચ (LCB) ની ટીમે ઝડપી પાડ્યો છે. સોશિયલ મીડિયાના માધ્યમથી નિર્દોષ લોકોને ટાર્ગેટ કરી લાખો રૂપિયા પડાવતી આ ગેંગનો પર્દાફાશ થતા વેપારીઓ અને વ્યાવસાયિકોએ રાહતનો શ્વાસ લીધો છે.
કેવી રીતે ચાલતો હતો બ્લેકમેલિંગનો ખેલ?
પ્રાપ્ત વિગતો અનુસાર, પકડાયેલ આરોપી સંજયસિંહ રાજપૂત સોશિયલ મીડિયા પર રીલ્સ બનાવીને પ્રખ્યાત થવાનો દાવો કરતો હતો, પરંતુ તેની આડમાં તે સોશિયલ મીડિયાને બદનામીનું હથિયાર બનાવતો હતો. તે ખાસ કરીને ડોક્ટરો, નોકરીયાતો અને ધંધાર્થીઓને પોતાના નિશાના પર લેતો હતો. કોઈપણ પ્રતિષ્ઠિત વ્યક્તિ અંગે વિવાદાસ્પદ કે મનઘડંત રીલ બનાવીને સોશિયલ મીડિયા પર વાયરલ કરવાની ધમકી આપતો અથવા વાયરલ કરી દેતો હતો.
Advertisement ![Navratri Banner]()
ત્યારબાદ, તે ભોગ બનનાર વ્યક્તિનો સંપર્ક કરી સોશિયલ મીડિયામાંથી તે રીલ હટાવવાના બદલામાં લાખો રૂપિયાની ખંડણી માંગતો હતો. જો કોઈ વ્યક્તિ ડરના મારે પૈસા આપી દે, તો તે સોશિયલ મીડિયા પરથી રીલ ડિલીટ કરી નાખતો હતો અને આ રીતે મોટો આર્થિક તોડ કરતો હતો.
એલસીબીની કાર્યવાહી અને આગામી ખુલાસા
હાલમાં જ એક શખ્સ પાસે રૂપિયા 1 લાખની ખંડણી માંગીને તોડ કરતા હોવાની વ્યાપક ફરિયાદો મળી હતી. આ મામલાને ગંભીરતાથી લઈને બનાસકાંઠા એલસીબીની ટીમે ત્વરિત ટેક્નિકલ અને હ્યુમન સર્વેલન્સના આધારે જાળ બિછાવીને સંજયસિંહ રાજપૂતને ઝડપી લીધો છે. પ્રાથમિક તપાસમાં એવું પણ બહાર આવ્યું છે કે આ આરોપીએ અગાઉ પણ અન્ય 5 થી 10 જેટલા લોકો અંગે આવી જ રીતે ખોટી રીલ્સ બનાવીને લાખો રૂપિયા પડાવ્યા છે.
આ સમગ્ર રેકેટ અને તેના અન્ય સાગરિતો અંગે વધુ વિગતો બહાર લાવવા માટે જિલ્લા પોલીસ વડા દ્વારા ટૂંક સમયમાં જ એક વિશેષ પ્રેસ કોન્ફરન્સ યોજવામાં આવશે, જેમાં આ ગેરકાયદેસર પ્રવૃત્તિની તમામ કુંડળી સત્તાવાર રીતે જાહેર કરવામાં આવશે.
આ પણ વાંચો: Mehsana Firing News: ટ્રેક્ટરના પૈસાની લેવડદેવડ બાબતે યુવક પર ફાયરિંગ, પેટમાં ગોળી વાગતા અમદાવાદ સિવિલ ખસેડાયો
