Banaskantha MP Geniben Thakor: વરસાદ ખેંચાતા ખેડૂતો પર સંકટના વાદળો, સાંસદ ગેનીબેન ઠાકોરે મુખ્યમંત્રી સામે મૂકી આ મોટી માંગ

Banaskantha ના સાંસદ ગેનીબેન ઠાકોરે મુખ્યમંત્રીને લખ્યો પત્ર

સાંસદ ગેનીબેન ઠાકોરે રાજ્ય સરકાર સમક્ષ માંગ કરી છે કે રાજ્યમાં જે તાલુકાઓમાં ઓછો વરસાદ પડ્યો છે, તે તમામ વિસ્તારોને વહેલી તકે 'અછતગ્રસ્ત' જાહેર કરવામાં આવે. વરસાદની અનિયમિતતાને કારણે અન્નદાતાઓની મહેનત એળે ગઈ છે અને વાવેતર કરેલા પાકો નિષ્ફળ જવાની ભીતિ સેવાઈ રહી છે. આવી સ્થિતિમાં, તાત્કાલિક ધોરણે સર્વે હાથ ધરીને પ્રભાવિત ખેડૂતોને પાક નિષ્ફળ જવાની યોગ્ય સહાય ચૂકવવામાં આવે, જેથી તેમને આર્થિક સંકટમાંથી ઉગારી શકાય.

ખેડૂતો માટે સિંચાઈ અને પીવાના પાણીની માંગ

આ ઉપરાંત, પત્રમાં પીવાના પાણીની યોગ્ય અને પૂરતી વ્યવસ્થા ઊભી કરવા પર વિશેષ ભાર મૂકવામાં આવ્યો છે, કારણ કે ઘણા ગામોમાં પાણીની તંગી વર્તાઈ રહી છે. સાથે જ, ખેડૂતોના હિતમાં નર્મદા કેનાલનું પાણી તાત્કાલિક ચાલુ કરીને સિંચાઈ માટે ઉપલબ્ધ કરાવવા માટે પણ રજૂઆત કરવામાં આવી છે, જેથી ખેડૂતો બચાવી શકાય તેવા પાકોને પિયત આપી શકે.

મનરેગાના કામો શરૂ કરવા પત્ર દ્વારા કરી રજૂઆત

વરસાદના અભાવે ગ્રામ્ય વિસ્તારોમાં ખેતમજૂરી અને કૃષિ આધારિત રોજગારીના સાધનો ખૂટી પડ્યા છે, જેના કારણે લોકોનું સ્થળાંતર થવાની શક્યતાઓ વધી છે. આ સ્થળાંતર અટકે અને સ્થાનિક સ્તરે જ લોકોને આજીવિકા મળી રહે તે માટે મનરેગા (MGNREGA) યોજના હેઠળ પૂરતા પ્રમાણમાં કામો વહેલી તકે શરૂ કરવા માટે પણ સાંસદ ગેનીબેન ઠાકોરે મુખ્યમંત્રી સમક્ષ કડક રજૂઆત કરી છે. રાજ્ય સરકાર આ ગંભીર પરિસ્થિતિને ધ્યાનમાં રાખીને સત્વરે યોગ્ય અને સકારાત્મક પગલાં લેશે તેવી આશા તેમણે વ્યક્ત કરી છે.

આ પણ વાંચો:  Amreli Tragedy: અમરેલીના પીપળલગ ગામે હૃદયદ્રાવક ઘટના, તળાવમાં ડૂબી જવાથી બે સગા ભાઈઓનાં મોત