Banaskantha Triple Accident: બહુચરાજીના પટેલ દંપતીને નડ્યો નડ્યો અકસ્માત, પત્નીનું કમકમાટીભર્યું મોત
- Banaskantha Triple Accident: સ્કોર્પિયો, ટ્રક અને એક્ટિવા વચ્ચે સર્જાયો અકસ્માત
- બહુચરાજીના પટેલ દંપતીને નડ્યો નડ્યો અકસ્માત, પત્નીનું કમકમાટીભર્યું મોત
- પાલનપુર ગઠામણ પાટિયા પાસે ટ્રક નીચે આવી જતાં મહિલાનું કમકમાટીભર્યું મોત
Banaskantha Triple Accident: બનાસકાંઠા (Banaskantha) જિલ્લાના પાલનપુર હાઈવે પર અકસ્માતોનો સિલસિલો યથાવત રહ્યો છે, ત્યારે પાલનપુરના ગઠામણ પાટિયા (Gathaman Patiya) પાસે એક અત્યંત કાળજું કંપાવી દેનારો ત્રીપલ અકસ્માત સર્જાયો છે. ટ્રક, સ્કોર્પિયો અને એક્ટિવા વચ્ચે થયેલા આ ભયાનક અકસ્માતમાં એક્ટિવા પર સવાર એક મહિલાનું ઘટનાસ્થળે જ કરૂણ મોત નીપજ્યું છે, જ્યારે તેમના પતિ ગંભીર રીતે ઘાયલ થતાં પંથકમાં અરેરાટી વ્યાપી ગઈ છે. અકસ્માતનો ભોગ બનનાર પતિ-પત્ની મહેસાણા જિલ્લાના બહુચરાજી (Becharaji) ના રહેવાસી હોવાનું સામે આવ્યું છે.
સ્કોર્પિયો ચાલકે પાછળથી ટક્કર મારતા એક્ટિવા સવાર દંપતી ફંગોળાયું
ઘટનાની વિગતો મુજબ, બહુચરાજીના રહેવાસી અમિત પટેલ (Amit Patel) અને તેમના પત્ની એક્ટિવા બાઈક પર સવાર થઈને પાલનપુર ગઠામણ પાટિયા પાસેથી પસાર થઈ રહ્યા હતા. આ દરમિયાન પાછળથી પૂરપાટ ઝડપે આવી રહેલી એક સ્કોર્પિયો (Scorpio) ગાડીના ચાલકે પોતાના વાહન પરનો કાબૂ ગુમાવ્યો હતો અને એક્ટિવાને જોરદાર ટક્કર મારી હતી. સ્કોર્પિયોની ટક્કર એટલી પ્રચંડ હતી કે એક્ટિવા પર સવાર પતિ-પત્ની રોડ પર ફંગોળાઈ ગયા હતા. કમનસીબે એક્ટિવા પર પાછળ બેઠેલા મહિલા રોડ પરથી પસાર થઈ રહેલી એક ટ્રક (Truck) ના તોતિંગ વ્હીલ નીચે આવી ગયા હતા, જેના કારણે ગંભીર ઈજાઓ થવાથી તેમનું ઘટનાસ્થળે જ કમકમાટીભર્યું મોત નીપજ્યું હતું.
ઈજાગ્રસ્ત અમિત પટેલ હોસ્પિટલમાં દાખલ, પોલીસ દ્વારા વધુ તપાસ શરૂ
આ અકસ્માતમાં એક્ટિવા ચાલક અમિત પટેલને પણ નાની-મોટી અનેક ઈજાઓ પહોંચી હતી. અકસ્માતને પગલે હાઈવે પર ચીસાચીસ થઈ ગઈ હતી અને જોતજોતામાં સ્થાનિક લોકો તથા વાહનચાલકોના ટોળેટોળા ઘટનાસ્થળે ઉમટી પડ્યા હતા. સ્થાનિક લોકોએ તાત્કાલિક 108 એમ્બ્યુલન્સને જાણ કરી ઘાયલ અમિત પટેલને નજીકની હોસ્પિટલમાં વધુ સારવાર અર્થે ખસેડ્યા હતા. ઘટનાની જાણ થતાં જ સ્થાનિક પોલીસ મથકનો કાફલો પણ તાબડતોડ ઘટનાસ્થળે દોડી આવ્યો હતો. પોલીસે મૃતક મહિલાના શવને પોસ્ટમોર્ટમ અર્થે હોસ્પિટલ ખસેડી અકસ્માતનો ગુનો નોંધી ફરાર વાહન ચાલકો સામે કાયદેસરની તપાસ હાથ ધરી છે.
આ પણ વાંચો: Ahmedabad: BRTS બસ અને બાઈક વચ્ચે ગંભીર અકસ્માત