ચાંદીપુરા વાયરસ વકર્યો: બનાસકાંઠામાં વધુ એક બાળકનું મોત! પાટણમાં બાળકીનો રિપોર્ટ પોઝિટિવ

બનાસકાંઠામાં કુલ 3 બાળકોના મોતથી ચિંતા વધી

બનાસકાંઠા જિલ્લાના અમીરગઢ (Amirgadh) તાલુકાના કાનપુરા (Kanpura) ગામના એક બાળકનું ચાંદીપુરા વાયરસના કારણે મોત થયું છે. આ પહેલા પાલનપુર (Palanpur) અને કાંકરેજ (Kankrej) માં પણ એક-એક બાળકનું મોત નીપજ્યું હતું. આમ, બનાસકાંઠા જિલ્લામાં કુલ 3 બાળકોના મોત નોંધાતાં આરોગ્ય વિભાગ હરકતમાં આવ્યું છે. પરિસ્થિતિ પર કાબૂ મેળવવા માટે આરોગ્ય વિભાગની 47 ટીમો અમીરગઢ અને આસપાસના વિસ્તારોમાં સઘન સર્વેની કામગીરીમાં લાગી ગઈ છે.

પાટણમાં 7 વર્ષની બાળકી ICU માં દાખલ

બીજી તરફ પાટણ જિલ્લાના સંખારી (Sankhari) ગામની 7 વર્ષીય બાળકીમાં ચાંદીપુરા વાયરસના લક્ષણો જણાતાં તેનો રિપોર્ટ કરાવવામાં આવ્યો હતો, જે પોઝિટિવ (Positive) આવ્યો છે. બાળકીની તબિયત નાજુક હોવાથી તેને ધારપુર (Dharpur) સ્થિત સિવિલ હોસ્પિટલના આઈસીયુ (ICU) વોર્ડમાં દાખલ કરીને સારવાર આપવામાં આવી રહી છે.

આરોગ્ય વિભાગ દ્વારા ડસ્ટિંગ અને સર્વે કામગીરી તેજ

પાટણમાં નવો કેસ સામે આવ્યા બાદ આરોગ્ય વિભાગ દ્વારા સંખારી ગામમાં દવાનો છંટકાવ અને હાઉસ-ટુ-હાઉસ સર્વેની કામગીરી હાથ ધરવામાં આવી છે. ઉલ્લેખનીય છે કે, અત્યાર સુધીમાં પાટણ જિલ્લામાં ચાંદીપુરા વાયરસથી 1 બાળકનું મોત થઈ ચૂક્યું છે. વાયરસનું સંક્રમણ વધુ ન ફેલાય તે માટે તંત્ર દ્વારા ગ્રામીણ વિસ્તારોમાં વિશેષ સાવચેતી રાખવાની અપીલ કરવામાં આવી છે.

આ પણ વાંચો: Dharoi Dam Water Level: ધરોઈ ડેમની જળસપાટીમાં સતત વધારો, આગામી દિવસોમાં પાણીની ચિંતા દૂર!