MLA Jignesh Mevani સામે FIR નોંધવાની અરજીથી ખળભળાટ, ટિકિટ માટે 4 લાખ લીધાનો આક્ષેપ

રાજસ્થાન ચૂંટણીની ટિકિટને લઈને નાણાંના વ્યવહારનો આક્ષેપ

અરજદાર યાકુબ શેરશિયાના આક્ષપો મુજબ, રાજસ્થાન વિધાનસભા ચૂંટણી દરમિયાન તેમના એક મિત્રને ચૂંટણીની ટિકિટ અપાવવાના મામલે રૂ.25 લાખની માગ કરવામાં આવી હતી. ત્યારબાદ કથિત રીતે રૂ.14 લાખમાં સોદો નક્કી થયો હોવાનો અરજીમાં ઉલ્લેખ કરવામાં આવ્યો છે. આ રકમમાંથી રૂ.4 લાખ પાલનપુર સર્કિટ હાઉસ ખાતે રોકડ આપવામાં આવ્યા હોવાનો પણ આક્ષેપ કરવામાં આવ્યો છે.

બે વર્ષથી રૂ. 4 લાખ પરત ન આપ્યાનો દાવો

યાકુબ શેરશિયાએ અરજીમાં એવો દાવો કર્યો છે કે પાલનપુર સર્કિટ હાઉસ ખાતે આપવામાં આવેલા રૂ.4 લાખની રકમ પરત આપવામાં આવી નથી. અરજદારના જણાવ્યા પ્રમાણે આ નાણાકીય વ્યવહારને લઈને છેલ્લા બે વર્ષથી રકમ પરત મેળવવાનો પ્રયાસ કરવામાં આવી રહ્યો હતો. હવે સમગ્ર મામલે પોલીસ તપાસ કરી કાયદેસરની કાર્યવાહી કરવાની માગ કરવામાં આવી છે.

પોલીસ તપાસ કરી FIR નોંધવા માગ

પાલનપુર પશ્ચિમ પોલીસ મથકે કરાયેલી અરજીમાં અરજદારે સમગ્ર મામલાની તપાસ કરીને જીગ્નેશ મેવાણી સામે FIR નોંધવાની માગ કરી છે. પોલીસ અરજીમાં કરવામાં આવેલા આક્ષેપોની તપાસ કરશે.

યાકુબ શેરશિયાની પોલીસ સમક્ષ રજૂઆત

અરજદાર યાકુબ શેરશિયા, જેઓ ટોકરીયાના પૂર્વ સરપંચ છે, તેમણે સમગ્ર મામલે પોતાની રજૂઆત પોલીસ સમક્ષ કરી છે. આ આક્ષેપો બાદ રાજકારણમાં ચકચાર મચી ગઈ છે. હાલ તો આ સમગ્ર મામલે પોલીસે તપાસ હાથ ધરી છે.

આ પણ વાંચોઃ Jignesh Mevani પર ટિકિટના નામે ₹4 લાખ લીધાનો પૂર્વ સરપંચનો દાવો, ભાજપ નેતા મનીષાબેન વકીલના પ્રહાર