ચાંદખેડા સીબીડી મોલ બહાર કથિત અપહરણ
સમગ્ર વિવાદની શરૂઆત અમદાવાદના ચાંદખેડા સ્થિત સીબીડી મોલ બહારથી થઈ હતી. નોંધાયેલી પોલીસ ફરિયાદ અનુસાર, કિંજલ રબારી અને ગોતરકા ગામના નરસિંહ ઉર્ફે મુકેશ રબારી અન્ય સગા-સંબંધીઓ સાથે મોલમાં ફિલ્મ જોવા ગયા હતા. રવિવારે બપોરે તેઓ બહાર નીકળ્યા ત્યારે કેટલાક અજાણ્યા શખ્સોએ મુકેશને પકડી રાખ્યો હતો અને કિંજલને એસયુવી (SUV) કારમાં બેસાડીને લઈ ગયા હોવાનો આક્ષેપ થયો હતો.
Advertisement ![Navratri Banner]()
જોકે, ચાંદખેડા પોલીસે સીસીટીવી ફૂટેજની ઝીણવટભરી તપાસ કરતાં ચિત્ર બદલાયું હતું. તપાસમાં સામે આવ્યું કે કિંજલ રબારી કોઈપણ બળજબરી વગર પોતાની મરજીથી કારમાં બેસતી જોવા મળી હતી. આ ઉપરાંત, કિંજલે સોશિયલ મીડિયા પર વીડિયો પોસ્ટ કરીને પોતે સુરક્ષિત હોવાની સ્પષ્ટતા કરી અપહરણની વાતને સંપૂર્ણ નકારી કાઢી હતી.
અશોક ચૌધરી સાથે છૂટાછેડા પેન્ડિંગ અને બીજા લગ્નનો વિવાદ
આ મામલે સૌથી મોટો કાનૂની વળાંક કિંજલ રબારીના વકીલના દાવા બાદ આવ્યો છે. વકીલના જણાવ્યા અનુસાર, કિંજલે અગાઉ 2 મે 2024 ના રોજ પરિવાર અને સમાજની મરજી વિરુદ્ધ જઈને અશોક ચૌધરી સાથે પ્રેમ લગ્ન કર્યા હતા. પંચમહાલના કાલોલ તાલુકાના ઘુસર ગામે બંનેએ પરસ્પર સહમતિથી લગ્નગ્રંથિથી જોડાયા હોવાના દસ્તાવેજો ઉપલબ્ધ છે.
કાનૂની વિવાદના મુખ્ય મુદ્દા:
છૂટાછેડાનો કેસ પેન્ડિંગ: અશોક ચૌધરી સાથેના લગ્ન અંગે રાધનપુર ફેમિલી કોર્ટમાં છૂટાછેડાની કાનૂની અરજી દાખલ કરવામાં આવી હતી, જેનો આખરી ચુકાદો હજી આવ્યો નથી.
કાયદાકીય સ્થિતિ: હિન્દુ મેરેજ એક્ટ મુજબ પ્રથમ લગ્નના કાયદેસર છૂટાછેડા ન થાય ત્યાં સુધી બીજા લગ્ન કાયદેસર ગણાતા નથી.
બીજા લગ્નનો આક્ષેપ: છૂટાછેડાની પ્રક્રિયા અધૂરી હોવા છતાં ગોતરકાના મુકેશ રબારી સાથે 12 ઓગસ્ટે કથિત લગ્ન કરાવવામાં આવ્યા હોવાનો આરોપ મૂકાયો છે.
પોલીસ ફરિયાદમાં મૈત્રી કરારનો દાવો
હાલમાં સોશિયલ મીડિયા પર કિંજલ રબારી અને નરસિંહ ઉર્ફે મુકેશ રબારીના લગ્નની તસવીરો ખૂબ ઝડપથી વાયરલ થઈ રહી છે, જેને પગલે ચાહકોમાં પણ ભારે ચર્ચા જાગી છે. પરંતુ આશ્ચર્યજનક બાબત એ છે કે મુકેશ રબારીએ અગાઉ પોલીસમાં નોંધાવેલી રજૂઆતમાં કિંજલ સાથે 'મૈત્રી કરાર' હોવાનો ઉલ્લેખ કર્યો હોવાનું બહાર આવ્યું છે.
એક તરફ લગ્નની તસવીરો સામે આવી રહી છે અને બીજી તરફ કાગળ પર મૈત્રી કરારની વાત થઈ રહી છે, જેના કારણે સંબંધોના કાનૂની સ્વરૂપ પર સવાલો ઊભા થયા છે.
સોશિયલ મીડિયામાં વીડિયો વાયરલ: કાયદેસરતા અંગે પ્રશ્નાર્થ
કિંજલ રબારીએ પોલીસ કમિશનર કચેરીમાં એક લેખિત પત્ર મોકલ્યો હોવાનું પણ સામે આવ્યું છે. આ પત્રમાં તેણીએ સ્પષ્ટ જણાવ્યું છે કે તેણી પોતાની રાજીખુશીથી અશોક ચૌધરી સાથે ગઈ છે અને તેનું કોઈએ બળજબરીપૂર્વક અપહરણ કર્યું નથી.
આ સમગ્ર પ્રકરણમાં હવે ચાંદખેડા પોલીસ બંને પક્ષોના નિવેદનો, લગ્નના કાગળો અને કોર્ટ કેસની ફાઇલ ચકાસી રહી છે. કોર્ટની સુનાવણી અને પોલીસ તપાસ પૂર્ણ થયા બાદ જ આ સંબંધો અને કથિત અપહરણની સાચી હકીકત લોકો સમક્ષ આવશે.
આ પણ વાંચો : Kinjal Rabari Marriage Controversy: શું કિંજલ રબારી અને અશોક ચૌધરીના લગ્ન કાયદેસર છે? વકીલની મોટી સ્પષ્ટતા
