ઉભેલા ટ્રેઈલર પાછળ કાર ઘુસી ગઈ
પ્રાપ્ત વિગતો અનુસાર દિલ્હી-મુંબઈ એક્સપ્રેસવે પર કેલોદ ગામની સીમમાં રોડની સાઈડ પર એક વિશાળ ટ્રેઈલર (Trailer) ઉભું હતું. આ દરમિયાન પાછળથી પૂરપાટ ઝડપે આવી રહેલી આંબોલીયા પરિવારની ઈકો વાન આ ઉભેલા ટ્રેઈલરની પાછળ ધડાકાભેર ઘુસી ગઈ હતી. અકસ્માત એટલો ભયાનક હતો કે ઈકો કારનો આગળનો ભાગ સંપૂર્ણપણે કચડાઈ ગયો હતો અને ગાડીનો કચુંબર નીકળી ગયો હતો. અકસ્માતના જોરદાર અવાજને પગલે આસપાસના સ્થાનિક લોકો અને હાઈવે પરથી પસાર થતા અન્ય વાહનચાલકો તાત્કાલિક મદદ માટે દોડી આવ્યા હતા.
કલાકો સુધી ચાલ્યું રેસ્ક્યુ
આ ભયાનક માર્ગ અકસ્માતમાં ઈકો ગાડી પતરાની જેમ વળી ગઈ હોવાથી અંદર બેઠેલા મુસાફરો ખરાબ રીતે ફસાઈ ગયા હતા. આ ગમખ્વાર અકસ્માતમાં ગંભીર ઈજાઓ થવાના કારણે માતા અને તેમના 12 વર્ષના માસૂમ પુત્રનું ઘટનાસ્થળે જ કમકમાટીભર્યું મોત નીપજ્યું હતું. ગાડીની સ્થિતિ એટલી હદે બિસ્માર થઈ ગઈ હતી કે, મૃતદેહો અને ફસાયેલા લોકોને બહાર કાઢવા માટે સ્થાનિક વહીવટીતંત્ર અને બચાવ ટુકડી (Rescue Team) ને કલાકો સુધી ભારે જહેમત ઉઠાવવી પડી હતી. કલાકોના રેસ્ક્યુ ઓપરેશન બાદ મા-દીકરાના મૃતદેહ બહાર કાઢી શકાયા હતા, જેને પગલે સમગ્ર પંથકમાં અરેરાટી વ્યાપી ગઈ છે.
અકસ્માતમાં અન્ય મુસાફરો ગંભીર રીતે ઈજાગ્રસ્ત
આ કરુણ ઘટનામાં પરિવારના અન્ય સભ્યોને પણ નાની-મોટી અને ગંભીર ઈજાઓ પહોંચી છે. મળતી માહિતી મુજબ, અકસ્માતમાં સૃષ્ટિ આંબલીયા, મનોજ આંબલીયા અને સોનલ ઘોઘારી સહિત કારમાં સવાર અન્ય લોકો ગંભીર રીતે ઈજાગ્રસ્ત થયા છે. તમામ ઈજાગ્રસ્તોને તાત્કાલિક સારવાર અર્થે નજીકની હોસ્પિટલ (Hospital) માં ખસેડવામાં આવ્યા છે, જ્યાં તબીબો દ્વારા તેમની સારવાર શરૂ કરવામાં આવી છે. ઘટનાની જાણ થતાં જ પોલીસ કાફલો પણ ઘટનાસ્થળે પહોંચી ગયો હતો.
હાઈવે પર આડેધડ પાર્કિંગ બન્યું જોખમી
દિલ્હી-મુંબઈ એક્સપ્રેસવે જેવા હાઈ-સ્પીડ કોરિડોર પર આ પ્રકારના અકસ્માતો પાછળ એક મોટું કારણ સામે આવી રહ્યું છે. સ્થાનિકો અને વાહનચાલકોના જણાવ્યા અનુસાર, એક્સપ્રેસવે પર રોડની સાઈડમાં નિયમો વિરુદ્ધ આડેધડ મોટા વાહનો (Heavy Vehicles) પાર્ક કરી દેવામાં આવે છે. રાત્રિના સમયે અથવા વહેલી સવારે આવા ઉભેલા વાહનો પાછળથી આવતા વાહનચાલકોને દેખાતા નથી, જેના કારણે આવા જીવલેણ અકસ્માતો (Fatal Accidents) સર્જાય છે. તંત્ર દ્વારા આવા બેજવાબદાર વાહનચાલકો સામે કડક પગલાં લેવામાં આવે તેવી માંગ ઉઠી રહી છે.
આપણ વાંચોઃ Dwarka: દ્વારકાધીશના દ્વારે જતા વૃદ્ધ સકારામ સાથે બની ચોરીની ઘટના, 3 શખ્સએ વાતોમાં ભોળવીને આપ્યો અંજામ
