HCG હોસ્પિટલમાં મકાનની વિલ સોંપાઈ
જનાર્દનભાઈ ભટ્ટના મકાનની વિલ સોંપવાનો કાર્યક્રમ HCG હોસ્પિટલના સભાગૃહમાં યોજાયો હતો. આ પ્રસંગે તેમણે મકાનની વિલ ડૉ. હેડગેવર સોસાયટીના ટ્રસ્ટી કુલદીપસિંહ ગોહિલને સોંપી હતી. જીવનભરની મહેનતથી મેળવેલી સંપત્તિ સમાજને અર્પણ કરવાનો તેમનો નિર્ણય ઉપસ્થિત લોકો માટે પ્રેરણારૂપ બન્યો હતો.
2005 માં જ લીધો હતો સેનાનું ઋણ ચૂકવવાનો નિર્ણય
જનાર્દનભાઈ ભટ્ટે વર્ષ 2005 માં જ સેનાનું ઋણ ચૂકવવા માટે પોતાની સંપત્તિનો ઉપયોગ કરવાનો નિર્ણય લીધો હતો. તેમના મતે દેશની સુરક્ષા માટે સૈનિકો જે સમર્પણ કરે છે તેની સામે નાગરિકોનું પણ રાષ્ટ્ર પ્રત્યે કર્તવ્ય છે. આ ભાવનાથી તેમણે પોતાની સંપત્તિમાંથી સેના, શિક્ષણ અને સ્વાસ્થ્ય ક્ષેત્રે યોગદાન આપવાનું નક્કી કર્યું હતું.
ગુજરાત ફર્સ્ટે ભાવનગરમાં કરી હતી જનાર્દન દાદા સાથે મુલાકાત
ગુજરાત ફર્સ્ટે ભાવનગર ખાતે જનાર્દનભાઈ ભટ્ટની મુલાકાત લીધી હતી. ‘સ્ટુડિયો ઓન વ્હીલ્સ’ ના વિશેષ કાર્યક્રમ દરમિયાન જનાર્દન દાદા સાથે થયેલી વાતચીતમાં તેમણે દેશ અને સમાજ પ્રત્યેની પોતાની લાગણી વ્યક્ત કરી હતી. તેમની સાદગી અને રાષ્ટ્રસેવા માટેની વિચારધારા ત્યારે પણ ચર્ચાનું કેન્દ્ર બની હતી.
સમાજને કરી ખાસ અપીલ
જનાર્દનભાઈએ સમાજના લોકોને પણ રાષ્ટ્રસેવામાં યોગદાન આપવા ખાસ અપીલ કરી છે. તેમણે લોકોને રોજ માત્ર એક રૂપિયો રાષ્ટ્રની સુરક્ષા માટે અર્પણ કરવા જણાવ્યું છે. તેમનું માનવું છે કે જો દરેક નાગરિક પોતાની ક્ષમતા પ્રમાણે નાનકડું યોગદાન આપે તો દેશની સુરક્ષા અને સમાજકલ્યાણ માટે મોટું યોગદાન ઊભું થઈ શકે છે.
સેના, શિક્ષણ અને સ્વાસ્થ્ય માટે સંપત્તિ અર્પણ
જનાર્દનભાઈ ભટ્ટે પોતાની સંપત્તિને માત્ર વ્યક્તિગત વારસો ન માનતા તેને સમાજની અમાનત તરીકે જોવાનો સંદેશ આપ્યો છે. સેના ઉપરાંત શિક્ષણ અને સ્વાસ્થ્ય જેવા મહત્વના ક્ષેત્રોમાં પણ તેમણે સંપત્તિનું દાન કર્યું છે. 94 વર્ષની ઉંમરે પણ સમાજ અને રાષ્ટ્ર માટે કંઈક કરવાની તેમની ભાવના નવી પેઢી માટે પ્રેરણારૂપ બની રહી છે.
આ પણ વાંચોઃ Studio On Wheels: કરોડોની મિલકત સૈનિકોને સમર્પિત કરી! જાણો કોણ છે ભાવનગરના આ દાનવીર દાદા?
