Bhavnagar: આંગણવાડીમાંથી એક્સપાયરી જથ્થો મળ્યો, બાળકો-મહિલાઓના સ્વાસ્થ્ય સાથે રમત કેમ?

સર્વોદય કન્ઝ્યુમર સોસાયટીમાંથી આવ્યો હતો જથ્થો

મળતી માહિતી મુજબ આંગણવાડીમાં પહોંચેલો આ જથ્થો કુંભારવાડા વિસ્તારમાં આવેલી સર્વોદય કન્ઝ્યુમર સોસાયટીમાંથી આવ્યો હતો. આંગણવાડી ખાતે પહોંચેલા પેકેટોની તપાસ દરમિયાન કેટલાક પેકેટની એક્સપાયરી તારીખ પસાર થઈ ગઈ હોવાનું સામે આવતા સમગ્ર મામલો ચર્ચામાં આવ્યો છે.

માતૃશક્તિ યોજનાના જથ્થાની ગુણવત્તા સામે સવાલ

સરકાર દ્વારા મહિલાઓ અને લાભાર્થીઓના પોષણ માટે વિવિધ યોજનાઓ હેઠળ ખાદ્ય સામગ્રીનું વિતરણ કરવામાં આવે છે. ત્યારે આવી યોજનામાં આપવામાં આવતા ખાદ્ય જથ્થામાં જ એક્સપાયરી પેકેટ મળી આવવાના આક્ષેપથી જથ્થાની ગુણવત્તા અને ચકાસણી પ્રક્રિયા સામે સવાલો ઉભા થયા છે.

કોંગ્રેસ નગરસેવકે તંત્ર પર કર્યા આકરા પ્રહાર

આ મામલે કોંગ્રેસના નગરસેવક કિશન મેએ તંત્ર પર આકરા પ્રહારો કર્યા છે. તેમણે એક્સપાયરી જથ્થાને ગંભીર બેદરકારી ગણાવી લોકોના સ્વાસ્થ્ય સાથે ચેડા થઈ રહ્યા હોવાનો આક્ષેપ કર્યો છે. આ પ્રકારનો જથ્થો આંગણવાડી સુધી પહોંચ્યો તે બાબતે જવાબદારી નક્કી કરવાની પણ માગ કરવામાં આવી છે.

જવાબદારો સામે પગલાં લેવાની માગ

એક્સપાયરી થયેલો જથ્થો આંગણવાડી સુધી કયા સ્તરે અને કોની ભૂલના કારણે પહોંચ્યો તેની તપાસ કરવાની માગ ઉઠી છે. જથ્થો મોકલતા પહેલાં તેની ગુણવત્તા અને એક્સપાયરી તારીખની ચકાસણી કેમ કરવામાં ન આવી તે અંગે પણ તપાસ જરૂરી બની છે.

સમગ્ર મામલે જવાબદાર અધિકારીઓ અને પદાધિકારીઓ સામે તપાસ કરી જો બેદરકારી સાબિત થાય તો તેમની વિરુદ્ધ કડક પગલાં લેવામાં આવે તેવી માગ કરવામાં આવી છે. હવે તંત્ર દ્વારા આ અંગે શું કાર્યવાહી કરવામાં આવે છે તેના પર સૌની નજર છે.

 આ પણ વાંચોઃ Surendranagar: ધ્રાંગધ્રામાં 16 વર્ષીય સગીરા પર દુષ્કર્મ ગુજારનાર શખ્સ ઝડપાયો