રાજસ્થાનથી ગણેશ ખારોલની ધરપકડ
એલસીબીને બાતમી મળી હતી કે, ભાવનગરમાં થયેલા લઠ્ઠાકાંડ બાદ ગણેશ ખારોલ ગુજરાત છોડીને રાજસ્થાન ભાગી ગયો હતો. પોલીસ તપાસ દરમિયાન તેની ભાળ રાજસ્થાનના ભીલવાડા સુધી પહોંચી હતી. ત્યારબાદ ટીમે કાર્યવાહી કરી લાડુ ઉર્ફે ગણેશ ખારોલને ઝડપી લીધો હતો. લાડુ ઉર્ફે ગણેશ ખારોલની ધરપકડને કેસની તપાસમાં મહત્વની કડી માનવામાં આવી રહી છે.
દારૂના પેકિંગનો સામાન સપ્લાય કરતો હતો લાડુ
તપાસમાં સામે આવેલી વિગતો મુજબ ગણેશ ખારોલ ઝેરી દારૂના પેકિંગમાં ઉપયોગમાં લેવાતા વિવિધ સામાનનો સપ્લાય કરતો હોવાનો આરોપ છે. તેમાં દારૂની બોટલ, સ્ટીકર અને પૂઠાં સહિતની વસ્તુઓનો સમાવેશ થાય છે. આ સામાનનો ઉપયોગ કથિત રીતે દારૂના પેકિંગ માટે કરવામાં આવતો હતો.
વરતેજમાં ઝેરી દારૂ બનાવાતો હોવાની માહિતી
તપાસમાં એવી વિગતો પણ સામે આવી છે કે વરતેજ વિસ્તારમાં ગૌતમ સોલંકીના ઘરે ઝેરી દારૂ બનાવવામાં આવતો હતો. સમગ્ર કેસમાં ઝેરી દારૂના ઉત્પાદનથી લઈને પેકિંગ અને સપ્લાય સુધીની કડીઓ શોધવા માટે તપાસ આગળ વધારવામાં આવી રહી છે. પોલીસ હવે ગણેશ ખારોલની પૂછપરછ કરી આ નેટવર્ક સાથે સંકળાયેલા અન્ય લોકો અંગે માહિતી મેળવવાનો પ્રયાસ કરશે.
8 ઓક્ટોબર સુધીના રિમાન્ડ
ધરપકડ પછી આરોપી ગણેશ ખારોલને કોર્ટ સમક્ષ રજૂ કરવામાં આવ્યો હતો. તપાસ એજન્સીએ વધુ પૂછપરછ અને કેસની કડીઓ જોડવા માટે તેના રિમાન્ડની માગણી કરી હતી. કોર્ટે ગણેશ ખારોલના 8 ઓક્ટોબર સુધીના રિમાન્ડ મંજૂર કર્યા છે. રિમાન્ડ દરમિયાન ઝેરી દારૂના નેટવર્ક, સામાનના સપ્લાય અને અન્ય સંડોવાયેલા આરોપીઓ અંગે મહત્વની વિગતો બહાર આવી શકે છે.
કુલ 42 આરોપીઓની ધરપકડ
ગણેશ ખારોલ ઝડપાતા ભાવનગર લઠ્ઠાકાંડ કેસમાં અત્યાર સુધીમાં કુલ 42 આરોપીઓની ધરપકડ થઈ છે. હવે પોલીસ તપાસમાં આ સમગ્ર નેટવર્કની કડીઓ શોધવા પર ભાર મૂકવામાં આવી રહ્યો છે. ખાસ કરીને ઝેરી દારૂ બનાવવા માટે સામાન ક્યાંથી આવતો હતો અને તેની સપ્લાય ચેઇન સાથે કોણ-કોણ સંકળાયેલું હતું તે અંગે તપાસ આગળ વધી રહી છે.
આ પણ વાંચો---- Banaskantha Car Accident: અમીરગઢ નજીક નાળામાં કાર ખાબકી, 5 મિત્રોનો ચમત્કારિક બચાવ
