Bhavnagar News: દીકરી પર થતો અત્યાચાર રોકવા જતાં જમાઈએ સસરાને પતાવી દીધા, કાળજું કંપાવતી ઘટના

સસરા જમાઈને સમજાવવા આવ્યા હતા

મળતી જાણકારી અનુસાર ભાવનગરના ચિત્રા વિસ્તારમાં રહેતી મહિલાને અચાનક પથરીનો દુખાવો ઉપડ્યો હતો. અસહ્ય દુખાવાના કારણે તે પોતાના કામ પર જઈ શકી ન હતી. પત્ની કામ પર ન જતાં તેનો પતિ રાકેશ કુંકાવાવ એકદમ ઉશ્કેરાઈ ગયો હતો અને તેણે પત્ની સાથે મારપીટ (Domestic Violence) શરૂ કરી દીધી હતી. આ ઘરકંકાસ અને દીકરી પર થઈ રહેલા અત્યાચારની જાણ જ્યારે સસરાને થઈ, ત્યારે તેઓ દીકરી વહારે આવ્યા હતા. સસરાએ જમાઈ રાકેશને શાંત પાડવાનો પ્રયાસ કર્યો હતો અને દીકરીને ન મારવા માટે ખૂબ જ પ્રેમથી સમજાવ્યો હતો.

Advertisement

જમાઈએ સસરાને પથ્થરનો બ્લોક માર્યો

જો કે, સસરાની આ સલાહ જમાઈ રાકેશ કુંકાવાવને બિલકુલ પસંદ આવી ન હતી. તેણે સસરા સાથે જોરદાર માથાકૂટ અને ઝઘડો શરૂ કરી દીધો હતો. વિવાદ એટલો વધી ગયો કે જમાઈએ માનવતાની તમામ સીમાઓ વટાવી દીધી હતી. રાકેશે ત્યાં હાજર પોતાના અન્ય 2 સંબંધીઓ સાથે મળીને સસરા પર એકસાથે હુમલો કરી દીધો હતો. આ હિંસક હુમલા દરમિયાન જમાઈએ સસરાના માથાના ભાગે સિમેન્ટનો ભારે પથ્થરનો બ્લોક ઝીંકી દીધો હતો.

ટૂંકી સારવાર બાદ સસરાનું મોત

માથા જેવા અત્યંત સંવેદનશીલ ભાગે પથ્થરનો બ્લોક વાગવાના કારણે સસરાને ગંભીર ઈજાઓ પહોંચી હતી અને તેઓ લોહીલુહાણ હાલતમાં ઢળી પડ્યા હતા. ઘટનાને પગલે આસપાસના લોકો એકઠા થઈ ગયા હતા અને ગંભીર રીતે ઘવાયેલા વૃદ્ધને તાત્કાલિક સારવાર માટે ભાવનગર શહેરની સર ટી. હોસ્પિટલ (Sir T. Hospital) ખાતે ખસેડવામાં આવ્યા હતા. જ્યાં ટૂંકી સારવાર દરમિયાન તેમણે દમ તોડી દીધો હતો.

પોલીસે ત્રણેય આરોપીને પકડી પાડ્યા

આ બનાવની જાણ થતાં જ બોરતળાવ પોલીસ સ્ટેશનનો કાફલો ઘટનાસ્થળે અને હોસ્પિટલ દોડી ગયો હતો. પોલીસે આ મામલે તુરંત એક્શન લઈને જમાઈ સહિત ત્રણેય હત્યારાઓને ઝડપી લીધા છે અને તેમની સામે હત્યાનો ગુનો નોંધી આગળની કાયદેસરની કાર્યવાહી શરૂ કરી છે.

આ પણ વાંચોઃ Bhavanagar News: ઘોઘામાં થયેલા અકસ્માત કેસમાં નવો વળાંક, શું જૂની અદાવતનો બદલો લેવા હત્યા કરી?