Bhavnagar Rajkot Highway Accident : બુલેટ ડિવાઈડર સાથે અથડાતા 3 મિત્રોના કરુણ મોત, જાળીયા ગામમાં શોક

Bhavnagar Rajkot Highway Accident : નાસ્તો કરી પરત ફરતી વખતે સર્જાયો કાળ

મળતી માહિતી મુજબ, ઉમરાળા (Umrala) તાલુકાના જાળીયા ગામના ત્રણ મિત્રો બે દિવસ પહેલા રાત્રિના સમયે લીમડા ગામે નાસ્તો કરવા ગયા હતા. નાસ્તો કરીને પરત જાળીયા ફરી રહ્યા હતા ત્યારે લીમડા ગામ પાસે તેમનું બુલેટ (નંબર GJ-01-MV-1775) અચાનક રોડ વચ્ચેના ડિવાઈડર સાથે જોરદાર અથડાયું હતું. અકસ્માત એટલો ભયાનક હતો કે બુલેટના ફૂરચા ઉડી ગયા હતા.

હોસ્પિટલ પહોંચે તે પહેલા જ શ્વાસ તૂટ્યા

આ અકસ્માતમાં કમલેશભાઈ ડાભી અને બુલેટ ચલાવી રહેલા સદ્દામખાન દોલતખાન પઠાણનું ઢસાની સરકારી હોસ્પિટલમાં સારવાર મળે તે પહેલા જ મોત નીપજ્યું હતું. જ્યારે ગંભીર રીતે ઇજાગ્રસ્ત થયેલા ત્રીજા મિત્ર સંજયભાઈ સોલંકીને તાત્કાલિક અમરેલી હોસ્પિટલ ખસેડવામાં આવ્યા હતા, પરંતુ ટૂંકી સારવાર બાદ તેમણે પણ દમ તોડી દીધો હતો. એક જ ગામના ત્રણ મિત્રોના અકાળે અવસાનથી જાળીયા ગામમાં માતમ છવાઈ ગયો છે.

પોલીસ કાર્યવાહી અને FIR

ઘટનાની જાણ થતા જ ઉમરાળા પોલીસ કાફલો ઘટનાસ્થળે પહોંચી ગયો હતો. પોલીસે મૃતક સદ્દામખાન પઠાણ સામે ગુનો નોંધ્યો છે. FIR મુજબ, બુલેટ બેફિકરાઈથી અને અતિશય પુરપાટ ઝડપે ચલાવવામાં આવી રહ્યું હતું, જેના કારણે ચાલકે સંતુલન ગુમાવતા બુલેટ ડિવાઈડર સાથે અથડાયું હોવાનું પ્રાથમિક તપાસમાં બહાર આવ્યું છે.

આ પણ વાંચો : Jamnagar: હાપામાં મસાલા કંપનીમાં અગ્નિતાંડવ, કરોડોના સૂકા મરચા બળીને ખાખ!